Paytaxtda görünməmiş FACİƏ – Valideyn məsuliyyətsizliyi, yoxsa…
Bakıda parklanma zamanı sürücü səhlənkarlığı ölümlə nəticələnib. Bu barədə Baş Dövlət Yol Polisi İdarəsi məlumat yayıb.
Bildirilib ki, atasına məxsus avtomobildə nəzarətsiz qalan iki azyaşlı nəqliyyat vasitəsini hərəkətə gətirib. Xətai rayon sakini İlham Qasımov “VAZ” markalı avtomobili yaşadığı evin qarşısında, sərt enişli ərazidə, qapıları açıq vəziyyətdə saxlayaraq oradan uzaqlaşıb. Bu vaxt onun 7 və 6 yaşlı övladları avtomobilə əyləşərək sürətlər qutusuna müdaxilə ediblər. Nəticədə avtomobil hərəkətə gəlib. Uşaqlar nəqliyyat vasitəsindən düşməyə imkan tapsalar da, eniş istiqamətində sürət yığan avtomobil yolda olan iki qadını vurub. Hadisə zamanı piyadalardan biri xəsarət alıb, digəri isə həyatını itirib. Bu hadisə göstərir ki, nəqliyyat vasitəsinin saxlanılması zamanı təhlükəsizlik tələblərinə əməl olunmaması ağır nəticələrə səbəb ola bilər. “Yol hərəkəti haqqında” Qanunun tələblərinə uyğun olaraq, enişli yolda saxlanılan avtomobilin duracaq tormoz sistemi qoşulmalı, təkərlər təhlükəsiz istiqamətə çevrilməli, nəqliyyat vasitəsi isə qapıları kilidli vəziyyətdə tərk edilməlidir. Əgər həmin avtomobildə bu sadə, lakin həyati əhəmiyyət daşıyan təhlükəsizlik tədbirləri görülmüş olsaydı, bu gün iki ailə ağır faciə ilə üz-üzə qalmazdı. Konkret halda valideyn-sürücü hansı məsuliyyəti daşıyır? Qanunun tələbləri öz yerində, daha nələr edilməlidir ki, belə faciələr təkrarlanmasın?
Tanınmış vəkil Cavad Cavadov Musavat.com-a deyib ki, baş verən hadisə bir daha sübut etdi ki, valideyn məsuliyyətsizliyi ağır nəticələrə səbəb ola bilir: “İlham Qasımovun sərt enişli ərazidə avtomobili qapıları açıq, tormozu qoşulmamış vəziyyətdə tərk etməsi, həyati təhlükəsizlik qaydalarına əməl etməməsi hüquqi məsuliyyət doğurur. “Yol hərəkəti haqqında” Qanunun tələbinə görə nəqliyyat vasitəsi saxlanıldıqda duracaq tormozu qoşulmalı, təkərlər təhlükəsiz istiqamətə yönləndirilməli, qapılar kilidli vəziyyətdə olmalıdır. Bu qaydalara əməl edilməməsi yalnız qanun pozuntusu deyil, həm də nəticəsi ağır fəsadlar doğura biləcək səhlənkarlıqdır. Qanuna görə, övladların avtomobildə nəzarətsiz qalması valideyni məsuliyyətə cəlb edilməsinə əsas ola bilər. Belə hadisələrdə valideyn cinayət məsuliyyəti daşıya bilər – xüsusilə ölüm və ya ağır xəsarət halları baş verdikdə məsuliyyət nəqliyyat vasitəsinin sahibinin, bu halda valideynin üzərinə düşür. Bu, həm də hüquqi xəbərdarlıqdır ki, məsuliyyətsizlik nəticəsində insan həyatı riskə atıla bilməz”.
Cavad Cavadov bildirib ki, belə faciələrin qarşısını almaq üçün həm valideynlərin, həm də dövlətin maarifləndirmə, nəzarət və hüquqi tədbirləri gücləndirməsi vacibdir:
“Sadə, amma həyati qaydalara əməl olunması həm övladların, həm də ictimaiyyətin təhlükəsizliyini təmin edər. Bu hadisə aydın şəkildə göstərir ki, valideyn məsuliyyətsizliyi hüquqi məsuliyyət doğurur. Azərbaycan Respublikası Cinayət Məcəlləsinin 263‑cü maddəsi ehtiyatsızlıqdan ölümə səbəb olan yol qəzalarını, 267‑ci maddəsi isə avtomobilin təhlükəsiz saxlanılması qaydalarının pozulması nəticəsində ölüm halları üçün nəzərdə tutulub. Hadisədə uşaq avtomobili idarə etməyə cəhd edib, nəticədə iki qadından biri həyatını itirib, digəri xəsarət alıb. Bu faktlar valideynin məsuliyyətini artırır və CM-in 189‑cu maddəsi çərçivəsində uşaqların baxımsız qalması ilə bağlı əlavə hüquqi məsuliyyət doğura bilər. Sadə, amma həyati təhlükəsizlik qaydalarına əməl etməmək nəticəsində bir ailə faciə ilə üz-üzə qalır. Bu, həm valideynlər üçün, həm də ictimaiyyət üçün qanuni xəbərdarlıqdır: hər bir məsuliyyətsiz addım insan həyatına ciddi təhlükə yaradır”.
E.Məmmədəliyev,
Musavat.com
