Azərbaycan və Belarus sürücülük vəsiqələrini qarşılıqlı tanıyacaq.
Bu, Milli Məclisin bu gün keçirilən iclasında müzakirəyə çıxarılmış “Azərbaycan Respublikası Hökuməti ilə Belarus Respublikası Hökuməti arasında sürücülük vəsiqələrinin qarşılıqlı tanınması və dəyişdirilməsi haqqında Saziş”in təsdiq edilməsi barədə” qanun layihəsində əksini tapıb.
Nəqliyyat məsələləri üzrə ekspert Adil Nəbiyev Musavat.com-a şərhində bildirib ki, bəzi ölkələr müəyyən müddət üçün sürücülük vəsiqələrini qarşılıqlı tanıyır:
“Bəzi ölkələrdə tərcümə tələb olunur. Azərbaycan vətəndaşları, məsələn, Rusiyaya qısamüddətli, 3 yaxud 6 aylıq səfər edərkən sürücülük vəsiqəsindən istifadə edə bilirlər. Vəsiqələrin qarşılıqlı tanınması rəsmiləşdikdə isə heç bir əlavə prosedura ehtiyac olmur.
Qarşılıqlı tanınma o deməkdir ki, sürücülər üçün əlavə problem yaradılmır. Bəzi ölkələrdə isə tanınma rəsmiləşməyibsə, sürücülük vəsiqəsinin dəyişdirilməsi tələb olunur, əks halda, cərimə tətbiq edilir. Bütün dövlətlər arasında belə bir razılaşma olsa, yaxşı olar. Məsələn, uzun yol sürücüləri üçün heç bir məhdudiyyət yoxdur.
Azərbaycanda uzun müddət yaşamağı planlaşdıran əcnəbi vətəndaşlar sürücülük vəsiqəsi almaq üçün imtahan verir, ölkədə qalmaq üçün qeydiyyat müddəti bitdikdə isə vəsiqəni yeniləməli olurlar. Sürücülük vəsiqəsinin tanınması o deməkdir ki, yaşayış icazəsi olan sürücülər avtomobillərini öz vəsiqələri ilə rahat idarə edə bilərlər”.
Parlamentin İnsan hüquqları komitəsinin sədri Zahid Oruc müzakirələr zamanı bildirib ki, Belarusla imzalanan sənəd sürücülər üçün hüquqi baryerləri aradan qaldırır, daşımalar üçün yeni imkanlar açır:
“Təkcə yükdaşıma sektorunda 5 mindən artıq aktiv daşıyıcı şirkət və 30-50 min arası peşəkar sürücü fəaliyyət göstərir. Belə bir şəraitdə Belarusla imzalanan saziş müəyyən sayda sürücülərə yeni imkanlar açır – vətəndaşlarımız daimi yaşadıqları halda hüquqi və inzibati baryerlərdən azad olunur, vəsiqələri tanındığı və dəyişmək imkanı qazandığı üçün hərəkət müstəqilliyi əldə edir, işləməkdən ötrü əlavə imtahanlardan keçmir, izafi vaxt və maliyyə resursu itirmir. Nəticədə, əmək bazarı genişlənir, gəlir dövriyyəsi və iqtisadi aktivlik artır.
İkincisi, saziş logistika şirkətləri üçün ciddi üstünlüklər yaradır çünki sürücü çatışmazlığı dünyada böyük problemdir. Nəinki Avropada, keçmiş sovet məkanında da yüz minlərlə sürücüyə ehtiyac var. Bir sürücü xaricdə həftələrlə bürokratiyaya və sənədlərini dəyişməyə sərf edirsə, bütün logistika zənciri zəifləyir. Ona görə də müzakirəyə çıxarılan Saziş mühüm iqtisadi-sosial əhəmiyyətə malik olmaqla, iki ölkə arasında tranzit sürətini artırır, xərcləri azaldır və daha rəqabətli mühit yaradır. Hesablamalara görə, belə razılaşmaların geniş tətbiqi nəticəsində yükdaşımaların səmərəliliyi 10-15 faiz arta, logistika xərcləri 5-10 faiz azala, ümumi tranzit gəlirləri isə orta müddətdə yüz milyonlarla dollar arta bilər”.
Komitə sədri onu da vurğulayıb ki, Azərbaycan artıq Türkiyə, Gürcüstan, Qazaxıstan, Ukrayna və digər ölkələrlə oxşar sazişlər imzalayıb.
Qeyd edək ki, sazişin imzalanmasında əsas məqsəd hər iki dövlət arasında avtomobil daşımalarının təhlükəsizliyini artırmaq, yol hərəkətini yaxşılaşdırmaq, sürücülük vəsiqələrinin qarşılıqlı tanınmasını və dəyişdirilməsini təmin etməkdir. Sazişə əsasən tərəflər səlahiyyətli qurumları tərəfindən öz dövlətlərinin milli qanunvericiliklərinə uyğun olaraq verilmiş daimi və etibarlı sürücülük vəsiqələrinin qarşılıqlı olaraq tanıyır.
Sazişin müddəaları sürücülük vəsiqələrinin ixtisas imtahanından keçmədən dəyişdirmək hüququnun həyata keçirilməsi, ərizə ilə müraciət qaydaları, müəyyən edilmiş daxili rüsumların ödənilməsi, sürücülük vəsiqələrinin ekvivalentliyi, nümunələrinin mübadiləsi, bunun üçün səlahiyyətli qurumların müəyyən edilməsi, zəruri məlumatların ötürülməsi, fikir ayrılıqlarının həlli və sair məsələləri tənzimləyir.
Sənədin digər müddəaları onun qüvvəyə minməsinə dair zəruri dövlətdaxili prosedurları, Sazişin ləğvi və digər məsələləri tənzimləyir. Layihə müzakirələrdən sonra səsverməyə qoyularaq bir oxunuşda qəbul edilib.
