Bu ərazilər artıq belə ADLANACAQ – RƏSMİ
Milli Məclisin iclasında “Quba rayonunun bəzi ərazi vahidlərinin adlarının dəyişdirilməsi haqqında” Azərbaycan Respublikası qanununun layihəsi müzakirəyə çıxarılaraq qəbul edilib.
Musavat.com-un məlumatına görə, layihəni təqdim edən Regional məsələlər komitəsinin sədri Siyavuş Novruzov öncə bildirib ki, Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən ardıcıl və məqsədyönlü dövlət siyasəti nəticəsində ölkəmiz son illərdə dinamik inkişaf yolu keçib, regionun siyasi, iqtisadi və humanitar mərkəzlərindən birinə çevrilib:
“Dövlət başçısının rəhbərliyi ilə həyata keçirilən genişmiqyaslı islahatlar Azərbaycanın iqtisadi qüdrətini daha da artırıb, regionların sosial-iqtisadi inkişafını sürətləndirib, vətəndaşların rifah halının yüksəldilməsinə mühüm töhfələr verib. Xüsusilə qeyd etmək lazımdır ki, Prezident İlham Əliyevin regionların inkişafına xüsusi diqqət və qayğısı nəticəsində ölkənin bütün bölgələrində müasir infrastruktur layihələri həyata keçirilib, yeni yollar çəkilib, sosial obyektlər tikilib, kənd təsərrüfatı və sahibkarlığın inkişafı üçün əlverişli şərait yaradılıb. Regionların sosial-iqtisadi inkişafına dair dövlət proqramları ölkənin hərtərəfli və balanslı inkişafını təmin etməklə yanaşı, milli-mənəvi dəyərlərimizin, tarixi yaddaşımızın və milli kimliyimizin qorunmasına da xidmət edib”.
Komitə sədri qeyd edib ki, bu gün Azərbaycan öz tarixi köklərinə, milli dəyərlərinə və dövlətçilik ənənələrinə xüsusi həssaslıqla yanaşır:
“Dövlətimizin həyata keçirdiyi siyasətin əsas istiqamətlərindən biri də xalqımızın milli yaddaşının qorunması, tarixi toponimlərin bərpası və gələcək nəsillərə çatdırılmasıdır. Tarixi yer adları xalqın keçmişini, mədəniyyətini, etnik yaddaşını və mənəvi kimliyini özündə yaşadan mühüm irs nümunələridir. Bu baxımdan müxtəlif dövrlərdə ölkəmizin ayrı-ayrı yaşayış məntəqələrinə verilmiş yad mənşəli adların dəyişdirilərək milli toponimlərlə əvəz olunması xüsusi əhəmiyyət daşıyır. Belə ki, Azərbaycan Respublikasının Milli Məclisinə Quba rayon ictimaiyyəti tərəfindən müraciət daxil olub. Həmin müraciətdə rayonun Vladimirovka, Alekseyevka və Timiryazev kəndlərinin sakinlərinin tarixi-milli dəyərlərin qorunması və yaşayış məntəqələrinin yerli xüsusiyyətlərini daha dolğun əks etdirən adlarla əvəz olunması məqsədilə bu kəndlərin adlarının dəyişdirilməsi təşəbbüsü ilə çıxış etdikləri, bununla bağlı müvafiq təkliflərin irəli sürüldüyü bildirilib.
Qeyd edilməlidir ki, Vladimirovka və Alekseyevka kəndlərində ilkin dövrlərdə əsasən rus etnik mənsubiyyətli şəxslər yaşayıb. Lakin hazırda əhalisi 3437 nəfər olan Vladimirovka kəndində rus etnik mənsubiyyətli cəmi 7 ailə yaşayır, əhalisi 3719 nəfər təşkil edən Alekseyevka kəndində isə rus etnik mənsubiyyətli ailə yoxdur. Timiryazev kəndinə gəldikdə isə, həmin kəndə bu ad 1965-ci ildə verilib. Bunun səbəbi kənd ərazisində fəaliyyət göstərən sovxozun rus bioloqu Kliment Arkadyeviç Timiryazevin şərəfinə adlandırılması olub. Kəndin əvvəlki adları “11 Verst” və “11 nömrəli sovxoz” olmuşdur. Hazırda əhalisi 2567 nəfər olan bu kənddə də rus etnik mənsubiyyətli ailə yaşamır. Mühüm məqamlardan biri də ondan ibarətdir ki, qeyd olunan hər üç kəndin sakinləri və aidiyyəti bələdiyyələri yaşayış məntəqələrinin adlarının dəyişdirilməsi təşəbbüsünü dəstəkləyib və bununla bağlı müvafiq müraciətlə çıxış ediblər. Bu isə onu göstərir ki, təklif olunan dəyişikliklər yerli əhali tərəfindən də rəğbətlə qarşılanır və ictimai əsaslara söykənir.
Təklif olunur ki, Quba rayonunun Vladimirovka kənd inzibati ərazi dairəsi tərkibinə daxil olan Vladimirovka kəndi Elbir, Alekseyevka kənd inzibati ərazi dairəsi tərkibinə daxil olan Alekseyevka kəndi Çinarlı, Timiryazev kəndi isə Bəhrəli adlandırılsın”.
S.Novruzov qeyd edib ki, Azərbaycan Respublikasının Milli Məclisi yanında Toponimiya komissiyasının 2026-cı il 11 mart tarixli 1-VIIQR nömrəli Qərarı ilə bu təkliflərə müsbət münasibət bildirilib:
“Bu isə təqdim olunan təşəbbüsün tarixi, hüquqi və elmi baxımdan əsaslandırıldığını bir daha təsdiq edir. Onu da vurğulayım ki, toponimlər sadəcə coğrafi adlar deyil. Onlar xalqın tarixi yaddaşını, milli kimliyini, mədəni irsini və mənəvi dəyərlərini yaşadan mühüm amillərdir. Tarixi və milli dəyərlərimizə uyğun adların bərpası dövlətçilik təfəkkürünün gücləndirilməsi, milli-mənəvi irsin qorunması və gələcək nəsillərə ötürülməsi baxımından xüsusi əhəmiyyət daşıyır. Bu baxımdan təqdim olunan təkliflərin həm tarixi ədalətin bərpasına, həm də milli toponimik irsimizin zənginləşdirilməsinə xidmət etdiyini hesab edirəm.
Beləliklə, Milli Məclisin Regional məsələlər komitəsində bu məsələ müzakirə edilərək təsdiqini tapıb. Təklif edirəm ki, Quba rayonunun Vladimirovka kəndinin Elbir, Alekseyevka kəndinin Çinarlı və Timiryazev kəndinin Bəhrəli adlandırılması məsələsi Milli Məclisin plenar iclasının gündəliyinə daxil edilsin”.
Layihə səsə qoyularaq qəbul edilib.
E.Paşasoy,
Musavat.com
