44 günlük Zəfərdən sonra dəyişən xəritə
Azərbaycan son 6 ildə bütün dünyanın diqqətini üzərinə cəmləyən bir ölkəyə çevrilib. Heç şübhəsiz ki, buna ən çox səbəb olan amil 44 günlük Vətən müharibəsində əldə olunan tarixi Qələbəmizdir. Bu tarixi Zəfər təkcə torpaqlarımızın işğaldan azad olunması ilə məhdudlaşmadı. Azərbaycan bu qələbə ilə illərlə bölgədə formalaşdırılmış ədalətsiz status-kvonu dağıtdı, BMT qətnamələrini özü icra etdi və artıq fəaliyyətsizliyə çevrilmiş ATƏT-in Minsk qrupunu siyasi tarixinin arxivinə göndərdi.
Bu gün regionda yeni reallıqları formalaşdıran tərəf Azərbaycandır. Prezident İlham Əliyev daim çıxışlarında Qafqazda yeni geosiyasi oyun qurmaq istəyən dairələrin planlarını hədəfə alır.
Eyni zamanda son 6 ildə işğaldan azad edilmiş Qarabağ və Şərqi Zəngəzurda aparılan genişmiqyaslı bərpa-quruculuq işləri Azərbaycanın gücünü və dövlət iradəsini nümayiş etdirir. Dağıdılmış şəhərlərin yenidən qurulması, keçmiş məcburi köçkünlərin doğma torpaqlarına qayıdışı, ekoloji və mədəni vandalizmin dünyaya çatdırılması yeni mərhələnin əsas istiqamətlərindəndir. Dövlət başçısının bölgəyə səfərləri zamanı şəhid ailələri və sakinlərlə səmimi dialoqları isə dövlət-vətəndaş birliyinin ən güclü göstəricilərindən biri kimi ön plana çıxır.
Dünyada müharibələrin genişləndiyi, İran-İsrail-ABŞ qarşıdurmasının qlobal iqtisadiyyata, xüsusilə enerji və ərzaq bazarına ciddi təsir göstərdiyi bir vaxtda Azərbaycandakı sabitlik və təhlükəsizlik mühiti daha aydın görünür. Hörmüz boğazı ətrafında yaranan risklər dünya iqtisadiyyatını silkələsə də, Azərbaycan güclü idarəçilik, düşünülmüş xarici siyasət və milli həmrəylik sayəsində bölgənin sabitlik adasına çevrilib. Bu reallıq Prezident İlham Əliyevin liderlik bacarığının, siyasi qətiyyətinin və qalib dövlət modelinin ən mühüm göstəricilərindən biri kimi qiymətləndirilir.
Milli Məclisin deputatı Bəhruz Məhərrəmov Musavat.com-a dedi ki, dünyada mövcud siyasi nizamın sarsıldığı, beynəlxalq təsisatların fəaliyyətsiz qaldığı çox mürəkkəb bir dönəmdə rəsmi Bakının hərbi-siyasi zəfərlərinə əsaslanan və regionda təhlükəsizliyə təminat verən yeni model formalaşdırması Azərbaycana öz müstəqil iradəsi ilə yeni bir regional reallıq diktə etməyə imkan verir: “Uzun illər davam edən imitasiya xarakterli danışıqlar prosesini və beynəlxalq hüququn selektiv tətbiqini tarixin arxivinə göndərən Azərbaycan bu gün qlobal güclərin ikili standartlarına qarşı ən kəskin etiraz səsini ucaldan ölkədir. Prezident İlham Əliyevin rəhbərliyi ilə həyata keçirilən strateji gedişlər, onilliklər boyu kağız üzərində qalan BMT qətnamələrinin hərbi-siyasi yolla icrasının təmin edilməsi və 44 günlük müharibənin siyasi nəticələri təkcə ərazi bütövlüyünün bərpası deyil, həm də neokolonialist ambisiyalar güdən xarici dairələrin, xüsusilə Fransanın Cənubi Qafqazdakı təsir rıçaqlarının qırılmasına əsaslanan arxitektura formalaşdırdı. Nəticə etibarilə indi Bakıdan gələn qətiyyətli mesajlar bölgədə kənar müdaxilələrə yer olmadığını və sülhün yalnız yerli reallıqlar üzərində qurula biləcəyini təsdiqləyir. Eyni zamanda işğaldan azad edilmiş Qarabağ və Şərqi Zəngəzurda aparılan sürətli bərpa işləri Azərbaycanın iqtisadi qüdrətinin və gələcək vizyonunun bariz nümunəsi kimi həm də önəmli güc göstəricisinə çevrilib. Vandalizmə məruz qalmış torpaqların yenidən canlandırılması və “Böyük Qayıdış” proqramı dövlət-vətəndaş münasibətlərini yeni mərhələyə qaldırıb, dövlət başçısının xalqla birbaşa və səmimi təması isə bu birliyi daha da sarsılmaz edir.
Bir sözlə, görünən odur ki, Yaxın Şərqdə gərginliyin artdığı, enerji və ərzaq təhlükəsizliyinin təhdid altında olduğu bir vaxtda cənab İlham Əliyevin rəhbərliyi altında sərgilədiyi balanslı və uzaqgörən siyasət ölkəni “təhlükəsizlik adası”na çevirib.
Təbii ki, bu situasiyaya nail olmaqla ölkəmiz təşəbbüslərə qoşulan, yaxud ideyaları dəstəkləyən subyektdən təşəbbüskar güc sahibinə çevrilib”.
Cavanşir ABBASLI
Musavat.com
