Qurban ətini belə saxlayanlar BÖYÜK SƏHV EDİR
Qurban bayramında kəsilən ətin yanlış şəkildə saxlanılması həm dadını korlaya, həm də qısa müddətdə xarab olmasına səbəb ola bilər. Mütəxəssislərin sözlərinə görə, kəsimdən dərhal sonra paketlərə doldurulub soyuducuya qoyulan ətlər kifayət qədər dincəlmədiyi üçün həm sərtləşir, həm də bakteriya yaranmasına daha açıq olur.
Musavat.com xəbər verir ki, xüsusilə isti havalarda edilən ən böyük səhvlərdən biri ətin iri hissələr şəklində üst-üstə saxlanılmasıdır. Hava almayan ətlərdə bir neçə saat ərzində pis qoxu və rəng dəyişikliyi başlaya bilər.
Bir çox insan əti kəsilən kimi dondurucuya yerləşdirsə də, mütəxəssislər bunun düzgün üsul olmadığını bildirirlər. Yeni kəsilmiş ətin əvvəlcə sərin və günəş görməyən mühitdə bir neçə saat dincə qoyulması tövsiyə olunur.
Mütəxəssislərə görə, qurban əti əvvəlcə sərin şəraitdə nəfəs almalıdır. Daha sonra isə kiçik porsiyalara bölünərək saxlama qablarına və ya soyuducu paketlərinə yerləşdirilməlidir.
Ətin üst-üstə və havasız şəkildə doldurulmaması vacib sayılır. Xüsusilə isti halda soyuducuya qoyulan ət soyuducunun daxili temperaturunu yüksəldə və digər qidaları da risk altına sala bilər.
Dərin dondurucuda saxlanacaq ətlərin isə bir istifadəyə uyğun porsiyalar şəklində hazırlanması tövsiyə olunur. Bu üsul əridilib yenidən dondurulmanın qarşısını alır və sağlamlıq riskini azaldır.
Qida mütəxəssisləri bildirirlər ki, qurban ətinin yuyulması da geniş yayılmış səhvlərdən biridir. Ətin su ilə təması bakteriyaların yayılma riskini artıra və saxlanma müddətini qısalda bilər.
Həmçinin ətin ağzı tam bağlı isti paketlərdə uzun müddət saxlanılması təhlükəli hesab olunur. Xüsusilə yay istisində uyğun şəraitdə qorunmayan ətlərdə xarab olma prosesi bir neçə saat ərzində başlaya bilər.
