“2020-ci ildə Dövlət Miqrasiya Xidmətinin qanunsuz miqrantların saxlanılma mərkəzlərində saxlanılan əcnəbilərin heç birində koronavirusa yoluxma qeydə alınmayıb”.
ARANTV.AZ-ın məlumatına görə, bunu Dövlət Miqrasiya Xidmətinin rəisi, III dərəcəli dövlət miqrasiya xidməti müşaviri Vüsal Hüseynov 2020-ci ilin yekunlarına dair keçirdiyi onlayn mətbuat konfransında bildirib.
Onun sözlərinə görə, ötən il qanunsuz miqrasiya ilə bağlı qeydə alınan faktlarda 51 faiz azalma olub:
“Bu rəqəm 2019-cu ildə 14 834 olubsa, 2020-ci ildə 7 317-yə düşüb”.
“Qanunsuz miqrantların saxlanılma mərkəzlərində yerləşdirmədə 73 faiz azalma olub. 2019-cu ildə mərkəzlərə 1 237, 2020-ci ildə isə 332 nəfər yerləşdirilib”, – deyə o əlavə edib.
