Basdırılan minaların xəritəsi Ermənistandan və Rusiya sülhməramlılardan tələb edilməlidir – AÇIQLAMA
Xəbər verdiyimiz kimi, Qubadlı istiqamətində tabor komandiri, mayor Muxtarov Sərxan mina partlayışı nəticəsində şəhid olub. Bu barədə Milli Məclisin deputatı Qənira Paşayeva özünün “Facebook” hesabında paylaşım edib.
Təəssüf ki, işğaldan azad olunan ərazilərdə minaya düşərək şəhid olan hərbi qulluqçularımızın sayı artır. Bu cür halların baş verməsində bir çoxları Rusiya sülhməramlılarını günahlandırırlar. Bildirilir ki, Rusiya sülhməramlıları həmin ərazilərdə basdırılan minaların xəritəsini ermənilərdən alıb Azərbaycan ordusuna verməlidirlər.
İşğaldan azad olunan ərazilərdəki minalarla bağlı fikirlərini Sonxeberaz-la bölüşən Vətən Müharibəsi Əlilləri İctimai Birliyinin sədri, Qarabağ qazisi Firudin Məmmədov bildirib ki, minaları basdıran hərbi hissə onu xəritələşdirir:
“Hərbi qaydalara və müharibə qanunlarına görə, basdırılan minalar xəritələnməlidir. Ən azından basdıran tərəfin özünün məlumatı olması və basdıranın minaya düşməməsi üçün xəritə vacibdir. Düşünürəm ki, mütləq belə bir xəritə var. Ermənilər uzun müddətdir ki, orada yerləşiblər. Hesab edirəm ki, onlar həmin əraziləri xəritə ilə minalayıblar. Bundan əlavə, həm də ermənilər qaçan zaman pərakəndə şəkildə minanı basdırıb həmin ərazidən uzaqlaşıb. Hətta aidiyyəti olmayan ərazilərə də basdırıblar.
Biz Ermənistandan həmin xəritəni tələb etməliyik. Mümkün deyil ki, minanı basdırsınlar, amma xəritə olmasın. Çünki basdırdıqları minaya özləri düşə bilərlər. Minanı basdıran hissə və döyüşən kəşfiyyatçıların hərbi hissələri ayrı olur. Döyüşən əsgərlərdə o xəritə olmasa, minanın olub-olmadığını necə biləcəklər? Mina basdırılan zaman yaradılan xəritə hərbi hissələrə ötürülür. Düzdür, o xəritələrə də inam yoxdur. Əslində mina təmizləyən hərbi hissə və hərbçilər didik-didik hər tərəfi axtarıb, minaları tapmalıdırlar. Hərbçilərimiz minalar təmizlənənə qədər diqqətli olmalıdırlar”.
Firudin Məmmədov vurğulayıb ki, həmin ərazilərdə təxribatların da olması mümkündür:
“Hesab edirəm ki, ermənilərin xüsusi silahlı qruplaşmaları gəlib, içərimizdə o minaları basdıra da bilərlər. Mən bu mənfurluğu onlardan gözləyirəm. Çünki hələ də orada döyüşmək istəyən və tabe olmayan qüvvələr var. Onlar içəriyə girib, o minaları basdıra bilərlər. Bundan əlavə, Rusiya sülhməramlıları minaların xəritəsini ermənilərdən alıb Azərbaycan ordusuna təhvil verməlidirlər”.
