Avropa Futbol Assosiasiyaları Birliyi (UEFA) koronavirus pandemiyası səbəbindən təxirə salınan 2020-ci il Avropa çempionatına təşkilatçı sayının azaldılması üçün dörd variantı nəzərdən keçirir.
Bu barədə “Sputnik Azərbaycan” xəbər yayıb.
AVRO-2020-nin ssenarilərdən biri ev sahibliyi edən şəhərlərin sayının 12-dən 10-a endirilməsidir.
İkinci ssenari AVRO-2020-yə ev sahibliyi edəcək şəhərlərin sayının beşə, üçüncü variant isə ikiyə endirilməsini nəzərdə tutur. Sonuncu dəfə iki ölkədə Avropa çempionatı 2012-ci ildə keçirilib. Onda turnirə Polşa və Ukrayna ev sahibliyi edib.
Nəhayət, dördüncü variant keçən il Avropa Liqasının həlledici mərhələsində olduğu kimi, AVRO-nun bir ölkədə keçirilməsini nəzərdə tutur.
Eyni zamanda, təşkilatçılar siyahısından hansı şəhərlərin çıxarıla biləcəyi bildirilmir, lakin şəhərlərin azalmasının çox sayda səfərin qarşısını almaq zərurəti ilə əlaqəli olduğu qeyd edilir.
Coğrafi prinsipdən yanaşılsa, Avropanın qalan hissəsindən ən uzaq olanlar Bakı və Sankt-Peterburqdur. Bu səbəbdən AVRO-2020 üçün ev sahibliyi etmək ehtimalı olan şəhərlər siyahısından çıxarılan ilk namizədlər məhz bu şəhərlər ola bilər.
Digər tərəfdən, üç qarşılaşması Bakıda keçiriləcək “A” qrupunda Türkiyə yığması da oynayır və ənənəvi olaraq fəal şəkildə komandalarını dəstəkləyən mümkün Türkiyə azarkeş axınını nəzərə alsaq, Bakı UEFA matçlarının keçirilməsi üçün sərfəli yer ola bilər. Bununla yanaşı, Bakı ilə eyni qrupa daxil olan Uels millisinin azarkeşləri üç min kilometrə yaxın məsafəni qət etməli olacaqlar.
UEFA AVRO-2020-yə ev sahibliyi edən şəhərlərin sayını kəskin şəkildə azaltmağa qərar verərsə, AVRO-2020 matçlarının keçiriləcəyi dörd Avropa şəhəri qeyd ediləcək – Münhen (Almaniya), London (Böyük Britaniya), Vyana (Avstriya), Lissabon (Portuqaliya).
UEFA AVRO-2020-nin təşkilatçılarının sayının azalması ilə bağlı son xəbərlərə münasibət bildirməyib. Eyni zamanda qeyd edilib ki, assosiasiya hazırda 12 təşkilatçı ilə çempionat dövründə stadionların doldurulması ssenariləri üzərində işləyir.
Bu ssenarilərə görə, çempionat zamanı tribunalar 50-dən 100% -ə qədər, 20-dən 30% -ə qədər doldurula və ya tamamilə tamaşaçısız ola bilər.
Bakı futbol üzrə Avropa çempionatının dörd matçına ev sahibliyi edəcək. Bakı Olimpiya Stadionunda İsveçrə – Uels, Türkiyə – Uels və İsveçrə – Türkiyə milli komandaları arasında “A” qrupunun oyunları və 1/4 final görüşlərindən biri keçiriləcək.
AVRO-2020-nin 11 iyun – 11 iyul tarixləri arasında keçirilməsi planlaşdırılır.
Avropa çempionatının formatı ilə bağlı son qərar martın əvvəlində açıqlanacaq.
