Şəhidlər bütün Azərbaycan xalqının başının tacı, vətən torpaqlarının azad olunmasına görə hər zaman ehtiramla yad ediləcək qəhrəmanlarımızdır. Ancaq bəzi şəxslər Qaradağ rayonu ərazisindəki şəhid məzarlığına bilərəkdən zərər vurmağa çalışıblar. Məqsəd açıq aşkar ortadadır. Şəhid ailələrinin emosionnalığından istifadə edərək problem yaratmaq, ölkədə ən ali dəyərlərdən hesab olunan şəhid adını ləkələmək, şəhid məzarlarını təhqir etmək. Amma onlar öz çirkin məqsədlərinə heç vaxt nail ola bilməyəcəklər. Çünki şəhidlərimizin adları daim bu millətin qəlbində yaşayır.
ARANTV.AZ xezerxeber.az-a istinadən bildirir ki, Azərbaycan 30 ildir işğal altında olan torpaqlarını birlik-bərabərlik nümayiş etdirərək geri aldı və bu, qəhrəman Azərbaycan əsgərinin fədakarlığı, canı, qanı bahasına başa gəldi.
Ancaq bəzi şəxslər şəhid adının, onun yüksəldiyi uca zirvənin dəyərini bilmədən, anlamadan Qaradağ rayonu ərazisindəki ümumşəhər qəbiristanlığında dəfn edilən vətən müharibəsi şəhidlərinin məzarlarını yararsız hala salıb. Bu da haqlı olaraq şəhid adının dəyərini bilən hər bir Azərbaycan vətəndaşının haqlı etirazına səbəb olub. əvvəla məsələyə dini baxımdan yanaşsaq şəhidlərin yeri Cənnətdir. Yəni fərqi yoxdur şəhid harda dəfn olunub. Şəhid məzarlarına qarşı hörmətsizlik edənlər bilməlidirlər ki, şəhid adı fərdi bir anlayış deyil və vətən uğrunda canından keçən hər kəs bütün Azərbaycan xalqının şəhididir. Hətta bəzi şəxslər qəbiristanlıqda məzar daşlarını qırmağa da cəhd göstəriblər. Ancaq öncədən də xəbər verdiyimiz kimi 18 şəhidin dəfn olunduğu ərazidə şəhidlər xiyabanı memorial kompleksi yaradılır. Artıq kompleksin hansı şəkildə görünəcəyi ilə bağlı layihə də hazırdır. Bununla bağlı Bakı Şəhər Əhaliyə Vətəndaşlıq Xidməti Trestindən verilən məlumata görə qəbirstanlıq ərazisindəki şəhidlər xiyabanında işlər ən qısa zamanda yekunlaşdırılacaq və ərazi qısa zamanda şəhidlərə layiq olan yeni görkəminə bürünəcək.
Şəhid məzarlına hörmətsizlik edənlər unudurlar ki, hətta müharibənin davam etdiyi bir vaxtda Azərbaycan hərbçisinə ən yüksək dəyəri müzəffər ali baş komandan İlham Əliyev dönə-dönə vurğulamışdı. Azərbaycan ordusunun qalibiyyətini yalnız müasir texnologiyalarla bağlayanlara qəti şəkildə etiraz edən dövlət başçısı dəfələrlə qeyd etmişdi, ki, o torpaqları azad edən, orda Azərbaycanın üçrəngli şanlı bayrağını qaldıran Azərbaycan hərbçisidir, Azərbaycanın mərd oğullarıdır. Dövlət başçısı dəfələrlə bildirmişdi ki, bütün Azərbaycan xalqı qəhrəman hərbçiləri ilə fəxr edir və hər an onların arxasında dayanaraq lazım olan bütün dəstəyi göstərir.
Müharibə bitəndən sonra ali baş komandan İlham Əliyev tərəfindən 100 minə yaxın hərbçiyə medal və ordenlərin verilməsi, şəhid ailələrinə hərtərəfli yardımın göstərilməsi üçün kompleks tədbirlər planının icrası, şəhid yaxınlarının sosial müdafiəsinin gücləndirilməsi, onların problemlərinin həlli, şəhid ailələrinə əlavə güzəştlərin verilməsi ilə bağlı tapşırıqlar hamısı dövlətin ən ali səviyyədə şəhid ailələrinin yanında olduğunu hər kəsə nümayiş etdirdi.
