Azərbaycan Respublikasının Qida Təhlükəsizliyi Agentliyi ölkəmizin bütün ərazilərində kənd təsərrüfatı məhsullarının istehsalına və emalına dair “Strateji Yol Xəritəsi”ndə nəzərdə tutulmuş tədbirlərin həyata keçirilməsini təmin etmək, qida təhlükəsizliyinə nəzarət sistemini təkmilləşdirmək, bu sahədə şəffaflığı daha da artırmaq məqsədi ilə yaradılmış bir orqandır.
Qoşqar Təhməzlinin sədrlik etdiyi bu agentlik Prezident İlham Əliyevin 10 fevral 2017-ci il tarixli “Azərbaycan Respublikasında qida təhlükəsizliyi sisteminin təkmilləşdirilməsi ilə bağlı əlavə tədbirlər haqqında” fərmanı əsasında yaradılıb.
Qeyd edək ki, Qida Təhlükəsizliyi Agentliyinin əsas fəaliyyət istiqamətləri bunlardan ibarətdir. Müvafiq sahədə vahid dövlət siyasətinin hazırlanmasında iştirak etmək və bu siyasətin həyata keçirilməsini təmin etmək, müvafiq sahədə dövlət tənzimləməsini, dövlət nəzarətini və əlaqələndirməni həyata keçirmək, müvafiq sahədə normayaratma fəaliyyətini, o cümlədən qida məhsullarının təhlükəsizliyinə dair normativ tənzimləməni həyata keçirmək, ölkəmizdə istehsal edilən və ölkəyə idxal olunan qida məhsullarını, habelə onları qablaşdırma materiallarını qida təhlükəsizliyi baxımından dövlət qeydiyyatına almaq və reyestrini həyata keçirmək, qida məhsulları istehlakçılarının hüquqlarının müdafiəsi haqqında qanunvericiliyə riayət edilməsinə dövlət nəzarətini həyata keçirmək, xarici ölkələrə ixrac edilən qida məhsullarına qida təhlükəsizliyi sertifikatı vermək, müvafiq sahələrin inkişafını təmin etməkdən və s. kimi addımları atmaqdan ibarətdir.
Hazırda Qida Təhlükəsizliyi Agentliyi belə bir vəzifələri həyata keçirməyə məsul olsa da, faktdır ki, bu quruma qarşı geniş ictimaiyyət arasında fərqli münasibət, fərqli yanaşma mövcuddur. Yəni, tam əksəriyyət Qoşqar Təhməzlinin rəhbərlik etdiyi bu agentliyi, məhz fəaliyyətsiz bir qurum hesab etməkdən belə çəkinmirlər. Çünki, belə bir yanaşmanın orta qoyulmasının kifayət qədər əsasları var.
Məsələnin maraqlı tərəfi ondan ibarətdir ki, Qida Təhlükəsizliyi Agentliyi öz fəaliyyətsizliyini təkcə Bakı şəhəri ərazisində deyil, digər şəhər və rayonlarda, ələlxüsus regionlarda daha çox nümayiş etdirməkdədir.
Düşündürücü hal odur ki, ilk vaxtlar bu qurum fəaliyyətə başlayarkən ictimai fikirdə Qida Təhlükəsizliyi Agentliyinə qarşı müəyyən inam hissi var idi. Yəni, hər kəs belə hesab edirdi ki, cənab Prezidentin imzaladığı Fərman əsasında yaradılmış bu quruma rəhbərlik edən Qoşqar Təhməzli, sonrakı fəaliyyətində ölkə rəhbərinin, bir sözlə hər kəsin ümidlərini doğruldacaq. Təəssüflər olsun ki, bu heç də belə olmadı və ölkə əhalisinin güvəndiyi “uca dağların başına qar yağdı”.
Adicə bir faktı qeyd edək ki, bu Agentliyin Bərdə regional bölməsinin fəaliyyətsizliyi ucbatından, Bərdə şəhərində “Şirvanli yolu” adı ilə tanınan ərazidə 1kq-ı 6 manata ət satılır. Yəni, belə bir ucuz qiymətə satılan ətin mənşəyi, haradan gətirilməsi, hansı heyvana məxsus olması və s, bilinmir.
Bundan əlavə, yol kənarlarında balıq satanlar heç bir gigiyenik qaydalara əməl etmədən onların satışını həyata keçirirlər.
Şəhərin bəzi ərazilərində çörəklərin satışı kağız parçalarında deyil, məhz kiçik salofanlarda həyata keçirilir ki, bu da qanunla qadağandır.
Digər tərəfdən, ət kəsimi məntəqələrində heç bir qaydalara riayət olunmur.
Yəni, diri heyvanlar çox zaman insanların gəlib-keçdiyi açıq ərazilərdə kəsilir ki, bu da daha çox azyaşlıların psixologiyasına öz mənfi təsirini göstərir. Satışı həyata keçirilən ət məhsullarının laboratoriyalarda analizi həyata keçirilmir və belə bir halın varlığı da, məhz böyük bir təhlükənin varlığından xəbər verir.
Şəhərin əksər ərazilərində, daha çox bazarlarda, insanların daim sıx olduqları ərazilərdə keyfiyyətsiz toyuq ətlərindən istifadə edən dönərxanalar fəaliyyət göstərir.
Bu birbaşa cinayət əməli olsa da, hələ də işbazlar “öz ampulalarındadırlar”. Yəqin ki, hər kəs o haqda məlumata malikdir ki, hələ bir neçə il bundan öncə Səhiyyə Nazirliyi Respublika Gigiyena və Epidemiologiya Mərkəzi “Fast food” yeməklərindən toyuq dönərini daha təhlükəli hesab edərək, onun satışını qadağan etdi.
Mərkəzin qidalanma gigiyenası şöbəsinin müdiri İmran Abdullayev, bu haqda mətbuata açıqlamasında toyuq dönərini əhali üçün ciddi təhlükə mənbəyi hesab etmişdi. Bir sözlə, hal-hazırda Bərdə rayonu ərazisində fəaliyyət göstərən əksər ictimai-iaşə müəssisələrində koronavirus infeksiyasının profilaktikasına dair metodiki göstərişlərin tələblərinə, qüvvədə olan sanitar-texniki və sanitar-gigiyenik normalara, qida məhsullarının saxlanma rejiminə, işçilərin şəxsi gigiyena qaydalarına, mal qonşuluğu prinsiplərinə və s. heç bir halda əməl olunmur.
Bütün bunlar da onu sübut edir ki, Qida Təhlükəsizliyi Agentliyinin Bərdə regional bölməsi, bu gün də üzərinə düşən vəzifələri yerinə yetirmir, yaxud da hansısa maraqlar çərçivəsində yerinə yetirməyə cəhd göstərmir. Bu da birbaşa məsuliyyət yaradan halın varlığıdır. Ona görə düşünürük ki, aidiyyatı dövlət qurumları bu Agentliyin fəaliyyətsizliyinə bir daha diqqət yetirib, problemlərin həlli yöndə müvafiq qərarlarını verəcəklər. Əgər belə bir addım atılmazsa, o halda ölkə əhalisinin qida təhlükəsizliyi məsələsi ortaya çoxsaylı sualların çıxması ilə nəticlənəcək.
Problemlərin varlığını diqqətdə saxlayacağıq.
