Azərbaycanda gündəlik yoluxanların sayının 300-ü keçməsi son günlər karantin rejiminin yenidən sərtləşəcəyi ilə bağlı ehtimalı gücləndirib. Hətta martın 19-dan sonra ölkə ərzisində yenidən karantin rejiminin 2 həftəlik sərtləşəcəyi ilə bağlı fikirlər səsləndirilir. Doğrudanmı Azərbaycanda martın 19-dan karantin rejimi 2 həftəlik sərtləşəcək?
Bununla bağlı Sonxeber.az-a açıqlama verən Tibb üzrə fəlsəfə doktoru Vasif İsmayıl bildirib ki, bayram günləri koronavirusa yoluxanların sayının artmaması üçün Operativ Qərargah tərəfindən qoyulan qaydalara əməl edilməsi vacibdir:
“Sosial məsafənin qorunmaması və maskadan düzgün istifadə edilməməsi yoluxanların sayını yenidən artıra bilər.Yoluxma sayının artması da təbii ki, yenidən karantin rejiminin sərtləşdirilməsi məcburiyyətini yaradır.
Qeyd etdiyim kimi, yoluxma sayı artan dinamika ilə davam edərsə, karantin rejimi yenidən sərtləşdiriləcək. Təbii ki, bununla bağlı qərar vermək səlahiyyəti Operativ Qərargaha aiddir.
Düşünürəm ki, Operativ Qərargah mövcud vəziyyəti analiz edib, düzgün qərar qəbul edəcək.Onu da qeyd edim ki, istənilən halda hər bir şəxsin məsuliyyətli olub, qaydalara əməl etməsi vacib şərtdir”.
