Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN xidmət) sədri Ülvi Mehdiyev “Baykar” şirkətinin texniki direktoru Selçuk Bayraktar ilə görüşüb.
Qurumdan bildirilib ki, görüş zamanı “Baykar” şirkətinin və “Türkiyə Texnoloji Takımı”nın “Deneyap” proqramının Azərbaycanda icra olunması istiqamətində danışıqlar aparılıb. “Deneyap” proqramı uşaq və gənclər üçün iki illik təlim və bir il ərzində layihə hazırlanmasından ibarət texnoloji təhsil proqramıdır. Proqramın məqsədi texnologiyaların inkişafı üçün gənclərin tədqiqat və bacarıqlarının artırılmasıdır.
Müvafiq əməkdaşlıq çərçivəsində dövlət agentliyi ilə “Baykar” şirkəti, həmçinin “Türkiyə Texnoloji Takımı” arasında innovasiya və texnoloji təhsil sahəsində imzalanması nəzərdə tutulan Anlaşma Memorandumu barədə də fikir mübadiləsi aparılıb.
Qeyd edək ki, “Baykar” şirkəti ilə dövlət agentliyi arasında əməkdaşlıq 2020-ci ilin 4-6 dekabr tarixində dövlət agentliyinin “İnnovasiyalar Mərkəzi” tərəfindən təşkil olunmuş “Qlobal Müdafiə Texnologiyaları Hakatonu” çərçivəsində qurulub. “Baykar” şirkətinin rəhbəri və “Türkiyə Texnoloji Takımı”nın həmtəsisçisi və İdarə Heyətinin sədri Haluk Bayraktar Hakatonun rəsmi açılış mərasiminda iştirak edib, eyni zamanda jüri üzvü olub.
