Bəs qəbir düzəltməsə necə?
Dədə – babalarımız bu qədim misalı ilk dəfə dilə gətirəndə doğulandan qəbir evinəcən öz pis xasiyyətlərindən və əməllərindən əl çəkməyən adamları nəzərdə tutublar. Bəlkə də Azərbaycanda bu misal yarananda əcdadlarımızın heç erməni adında qonşusu da olmayıb. Olsaydı, yəqin deyərdilər ki, bəzi qozbel millətləri nəinki qəbirlə, hətta dağları yaran külünglə, dəmir çəkiclə düzəltmək olmaz…
Şübhəsiz, hər bir millətin, eyni zamanda, dövlətin qan yaddaşı var.
Ermənilərin qərinələr öncə Qafqazda məskunlaşması, onların xislətindəki qozbellik, torpaq hərisliyi ilk növbədə bu regionda hökmranlıq etmək istəyən dövlətlərin də əlində açar olub. Zaman-zaman ən çox Azərbaycan torpaqlarını və neftini ələ keçirmək üçün özgələrinin alətinə çevrilən ermənilər aborigen xalq olduqlarını hər vasitə ilə təsdiqləməyə çalışıblar. XX əsrin əvvəllərindən sonuna kimi onların öz mənfur niyyətlərini reallaşdırmağın yolu isə azərbaycanlıların kütləvi soyqırımından, qanlı talanlardan, deportasiya siyasətindən, işğalçılıqdan keçdi. Təəssüf ki, dünya birliyi Azərbaycan xalqına qarşı ermənilər tərəfindən tarixən törədilən cinayətlərə, Xocalı soyqırımına, Qarabağın 30 ilə yaxın işğal altında qalmasına, BMT-nin məlum qətnamələrinə obyektiv qiymət vermədi.
Türkiyə Prezidenti Rəcəb Tayyib Ərdoğanın dediyi kimi: “Azərbaycan nəhayətində öz göbəyini özü kəsdi.”
Düzü, düşünürdük ki, 44 günlük Vətən müharibəsində Milli Ordumuzun uğurla başa çatdırdığı “Dəmir yumruq” əməliyyatı erməni millətinin qozbel “başbilənlərinin”, hərbi -siyasi rejiminin ağlını başına gətirər. Amma…
Ermənistan tərəfi məqsədyönlü şəkildə bölgədə vəziyyətin gərginləşdirilməsi üçün yenə təxribatlara əl atmaqdadır. Gah Azərbaycanla sərhədin Naxçıvan Muxtar Respublikasından keçən hissəsində atəşkəs rejimini pozaraq ərazilərimizi müxtəlif istiqamətlərdən atəşə tutur, gah üçtərəfli Bəyanatı kobud şəkildə pozaraq, öz silahlı qüvvələrinin şəxsi heyətini Rusiya Federasiyası sülhməramlı qüvvələrinin müvəqqəti yerləşdirildiyi Azərbaycan ərazilərinə daşıyır, eyni zamanda, Muxtarkənd, Şuşakənd məntəqələri yaxınlığında, eləcə də Kəlbəcər və Laçın rayonlarının inzibati hüdudlarının şərq istiqamətindəki ərazilərdə yeni erməni postları qurur.
Bir sözlə, 10 noyabr 2020-ci ildə Azərbaycan Respublikası Prezidenti, Rusiya Federasiyası Prezidenti və Ermənistan Baş nazirinin imzaladıqları üçtərəfli Bəyanata uyğun olaraq Ermənistan silahlı qüvvələrinin qalıqlarının tam şəkildə Rusiya Federasiyası sülhməramlı qüvvələrinin müvəqqəti yerləşdirildiyi Azərbaycan ərazilərindən çıxarılmasının təmin olunmaması vəziyyəti daha gərginləşdirir.
Bu barədə Azərbaycan Müdafiə Nazirliyinin son məlumatında bəhs olunur: “Bütün bunlar Ermənistanın yeni müdafiə naziri Arşak Karapetyanın Ermənistan ordusuna bütün vasitələrdən istifadə edərək güc tətbiq etmək barədə verdiyi məsuliyyətsiz və təhrikçi əmrinin fonunda baş verir. Xatırlatmaq istərdik ki, Ermənistanın sabiq müdafiə naziri David Tonayan da “yeni müharibələr, yeni ərazilər” adlandırdığı təxribatçı hərbi doktrina ilə çıxış etmişdi. Onun rüsvayçı aqibəti hər kəsə məlumdur.”
Aərbaycan Müdafiə Nazirliyi rus sülhməramlılarına da xəbərdarlıq edərək bildirdi ki, Rusiya Federasiyası sülhməramlı qüvvələri üçtərəfli Bəyanatın müddəalarına uyğun olaraq müvəqqəti dislokasiya olunduqları Azərbaycan ərazilərində Ermənistan silahlı qüvvələrinin yerləşdirilməsi hallarına son qoymalıdır.
Təbii ki, Azərbaycan Ordusu tərəfindən bütün adekvat tədbirlərin görülməsi diqqətə çatdırılır. Lakin Azərbaycan vətəndaşı olaraq hər birimizi bir sual narahat edir: Bu gün BMT-nin Qarabağda monitorinq missiyası yoxdur. Bu təşkilat öz işini yalnız tərəfləri mülki vətəndaşların təhlükəsizliyini və sakitliyini təmin etmək üçün bu günə qədər razılaşdırılmış müqavilələrə hörmət etməyə çağırmaqla bitmiş hesab edir. Bəs görəsən, Qarabağ ərazisində müvəqqəti yerləşdirilmiş Rusiya sülhməramlı kontingenti Xankəndidəki poliqonda hansı məqsədlərlə təlimlər keçirir? Dağlıq ərazidə təbii və düşmən mövqelərinin imitasiyası kimlərin bölgədəki marağına xidmət edir?
Digər tərəfdən, Ermənistanın baş naziri Nikol Paşinyan hökumətin iclasında bildirib ki, bölgədə düşmənçilik və qarşıdurmanın daha da dərinləşməsi yolverilməzdir. “Bu, təkcə regional deyil, həm də beynəlxalq təhlükəsizliyə təhdiddir”. Əgər baş nazirin dediyi kimi, Ermənistan ərazi zəbt etmək və ya hər hansı digər təcavüzkar fəaliyyətlərə getmək niyyətində deyilsə, bəs onda bölgədəki son təxribatların “ssenari müəllifləri” kimlərdir?
