Erməni siyasətinin hiyləgərliyi Sentyabrın 12-si gecə saatlarından başlayaraq Ermənistan silahlı qüvvələrinin Azərbaycanın Kəlbəcər, Laçın, Daşkəsən və Zəngilan rayonları istiqamətində törətdiyi genişmiqyaslı təxribatlar bir daha bütün dünyaya göstərir ki, Azərbaycanla Ermənistan arasında sülh müqaviləsinin imzalanması üçün intensiv danışıqların getdiyi bir zamanda rəsmi İrəvan yenə öz ampluasına sadiq qalaraq bu prosesi pozmaq üçün təxribat əməllərinə əl atmaqdan çəkinmir. Azərbaycan öz suverenliyinə və ərazi bütövlüyünə qarşı hər cür təhdidlərə layiqli cavab vermək gücündədir. Ermənistan ötən əsrin 90-cı illərinin eyforiyasındadır, amma unudurlar ki, Azərbaycan bu gün həm siyasi, həm iqtisadi, həm də hərbi baxımdan bölgənin lideridir. Müzəffər Ali Baş Komandanın “düşmən sülhə gəlməzsə, “dəmir yumruq” yerindədir” xəbərdarlığından dərs almayan işğalçı erməni ordusu bir daha qəhrəman Azərbaycan əsgərinin gücünə şahid olur. Öz ərazisinə mümkün hərbi təhlükəni önləmək, aparılan quruculuq işlərində iştirak edən mülkü şəxslərin təhlükəsizliyini təmin etmək üçün Azərbaycan ordusu dövlət sərhəddimizdəki təxribatların layiqli cavabını verir. Uzun illər ərzində Ermənistan və Ermənistanın ərazisi məhz regionda gərginliyin yaradılması üçün istifadə olunub. Sıravi erməni xalqı əsrlər boyu bu siyasətin qurbanı olub və məhz bu siyasətin nəticəsində Ermənistan müasir beynəlxalq münasibətlər sisteminin dalan dövlətinə çevrilmişdir. 13 sentyabr tarixində baş vermiş təxribat bir daha rəsmi İrəvan tərəfindən mina xəritələrinin Azərbaycana təhvil verilməməsi məsələsini aktuallaşdırır. Xəritələrin verilməməsi Ermənistanın hərbi hücumlarını asanlaşdırdığı halda, Azərbaycan üçün əksinə, müdafiənin təşkilini əsaslı şəkildə çətinləşdirir. 13 sentyabr tarixli təxribat eyni zamanda, rəsmi İrəvanın hərbi cinayətlərinə bəraət qazandırılmasına hesablanıb. Azad olunmuş ərazilərdə basdırılmış minaların mövcudluğu mülki əhalinin təlafatına səbəb olduğu üçün rəsmi İrəvan, eyni zamanda, terrorçu ölkə kimi tanınmalıdır. 13 sentyabr tarixli insident va bu kimi digər erməni təxribatları ölkədə həmrəylik mühitinin və siyasi sabitliyin qorunmasının müstəsna əhəmiyyətini göstərir. Qarşı tərəf və onun havadarları, nəhayət, anlamalıdırlar ki, xalqına və qüdrətli ordusuna arxalanan Prezident, Müzəffər Ali Baş Komandan cənab İlham Əliyevin siyasi iradəsi və qətiyyəti ölkəmizin ərazi bütövlüyünə və suverenliyinə qarşı istənilən addımın qarşısının alınması üçün hər zaman yetərlidir və bu reallıq qarşısında Ermənistanın sülh prosesinə qoşulmaqdan başqa alternativi yoxdur. 13 sentyabr tarixində yaşanmış hadisələr bilavasitə siyasi motivli hərbi təxribatdır. Belə ki, bu təxribat cari ilin 15-16 sentyabr tarixində Özbəkistanın Səmərqənd şəhərində keçiriləcək Şanxay Əməkdaşlıq Təşkilatının növbəti sammitində Azərbaycana qarşı təzyiqlərinin artılmasına hesablanıb. Ermənistanın Azərbaycan sərhəddində törətdiyi genişmiqyaslı təxribatdan sonra Prezident İlham Əliyevin bu sammitə qatılması, orada Rusiya, Türkiyə, Çin prezidentləri və rəsmilərlə bir sıra görüşlər keçirməsi şübhəsiz ki, Azərbaycanın haqlı mübarizəsində çox böyük önəm daşıyacaq.
YAP Bərdə rayon təşkilatı təbliğat qrupunun üzvü, Bərdə Tarix diyarşünaslıq muzeyinin şöbə müdiri Ülkər Mehdizadə
