Artıq tarixi Zəfərimizin ikinci ilini qeyd edirik. Bu iki il azad edilmiş şəhərlərimizin, kəndlərimizin bərpası, yenidən qurulması ilə xarakterizə olunur. Dövlət başçısı İlham Əliyevin “ağıllı şəhər” və “ağıllı kənd” strategiyasına uyğun olaraq bütün şəhər və kəndlərimiz müasir tələblər əsasında qurulur, bərpa edilir. Şəhərlərlərin Baş planları hazırlanıb təqdim olunur. Bu prosesdə sakinlərin də iştirakı onların istəklərinin nəzərə alınmasında mühüm rol oynayır. Əsas hədəf soydaşlarımızın gələcəkdə bu torpaqlarda yüksək həyat şəraitinin təmin edilməsidir.
Hər zaman qeyd etdiyimiz kimi, bu torpaqlar erməni vəhşiliklərinin təqdimatıdır. Şəhər və kəndlərimiz tamamilə dağıdılıb, yerlə-yeksan edilib. Cəbrayıl şəhərində mətbuata bəyanatında diqqəti bu kimi məsələlərə yönəldən dövlət başçısı İlham Əliyev “İşğal dövründə ermənilər bizim bütün şəhərlərimizi, kəndlərimizi yerləbir etmişlər” söyləyərək onu da qeyd etdi ki, Cəbrayıl şəhərindən bu dağılmış binalar qalıb. Bu dağıntılar Birinci Qarabağ savaşında deyil, məhz işğal dövründə ermənilər tərəfindən törədilmişdir: “Görün onlarda Azərbaycan xalqına qarşı nə qədər nifrət var idi ki, bütün binaları yerlə-yeksan etdilər. Bunun əsas məqsədi ondan ibarət idi ki, azərbaycanlılar heç vaxt bu torpaqlara qayıtmasınlar, qayıtmağa yer olmasın. Ancaq biz qayıtmışıq, qan tökərək qayıtmışıq, savaşaraq, döyüşərək qayıtmışıq və bu gün artıq həyat bu bölgəyə qayıdıb.”
İşğaldan azad edilmiş ərazilərdə bu ilin mühüm hadisələrindən biri “ağıllı kənd” layihəsi çərçivəsində yenidən qurulan, bərpa edilən, şəhər təəssüratı yaradan Zəngilanın Ağalı kəndinin sakinlərinə qovuşması oldu. Böyük Qayıdışın ilk addımı kimi dəyərləndirilən bu hadisə Azərbaycanın bərpa işlərini qısa zamanda başa çatdırması ilə malik olduğu imkanlarını təqdim etdi. Dövlət başçısı Cəbrayıldan səsləndirdiyi çağırışlarında bir daha diqqəti Ağalı kəndində olduğu məktəbə yönəldərək bildirdi ki, məktəbdə 70 uşaq oxuyur. Yəni, o uşaqların heç biri buranı görməyib: “Hətta onların bir çoxunun valideynləri də işğal dövründə doğulub, bir çoxları işğal baş verəndə özləri uşaq idi. Amma onlar qayıdıblar. Çünki torpaq çəkir, Vətən çəkir və hamımız qayıdacağıq. Bütün keçmiş məcburi köçkünlər qayıdacaqlar. Biz onların qayıdışı üçün əlimizdən gələni edirik, gecə-gündüz çalışırıq və bu bərpa-quruculuq işlərində türk qardaşlarımız bizimlə bir yerdədirlər.”
Bugünümüzün reallıqları bizi 44 günlük İkinci Qarabağ müharibəsi dövründə cəbhədən gələn Qələbə xəbərlərinin soydaşlarımızda yaratdığı hissləri, səsləndirdikləri fikirləri yada salmağa çağırış edir. 30 il torpaq həsrəti ilə yaşayan, dogma yurd-yuvalarına qayıdacaqları günü səbirsizliklə gözləyən keçmiş məcburi köçkünlərin sevincinə sevinc qatan “Artıq biz qaçqın deyilik” ifadəsinin söz olaraq deyil, reallıqda öz əksini tapması oldu. Dövlət baçısı İlham Əliyev keçmiş qaçqın və məcburi köçkünlərlə görüşlərində daim onlar üçün yaradılan şəraitdən bəhs edərkən bunların müvəqqəti xarakter daşıdığını, tezliklə Qarabağ münaqişəsinin ədalətli həllini tapacağını və soydaşlarımızın öz dogma yurd-yuvalarına qayıdacaqlarını bildirirdi. Bu əminliyə əsas verən haqqın, ədalətin bizim tərəfimizdə olması, həmçinin Azərbaycan Ordusunun gücü, qüdrəti idi. Cənab İlham Əliyev ən yüksək tribunalardan bəyan edirdi ki, sülh danışıqları səmərə vermədiyi təqdirdə Azərbaycan öz torpaqlarını hərb yolu ilə azad edəcək.
30 il dünya ədaləti, beynəlxalq hüququ maraqlarının arxasında gizlətdi. Ermənistana BMT qətnamələrinin icrası ilə bağlı sanksiyaların tətbiq olunmaması, təzyiq göstərilməməsi böyük iddialarla yaşamasına səbəb oldu. İkili standartlara əsaslanan siyasətin hansı problemlərə yol açdığını geniş şərh etməyə ehtiyac yoxdur. 30 illik işğal, həmçinin 44 günlük İkinci Qarabağ müharibəsinin getdiyi və postmünaqişə dövrünün reallıqları həmin problemlərin təqdimatıdır.
İşğalçı dövlət torpaqlarımızı dağıdıb, yerlə-yeksan etsə də bu həqiqəti çox yaxşı bilirdi ki, bu ərazilərin Azərbaycan xalqına məxsusluğunu inkar etmək, tarixi silmək qeyri-mümkündür. 44 günlük İkinci Qarabağ müharibəsində tarixi Zəfərimiz bunun təsdiqi oldu.
Bu gün Qarabağ və Şərqi Zəngəzur bərpa edilir, yenidən qurulur. Türkiyə Prezidenti Rəcəb Tayyib Ərdoğan mətbuata bəyanatında diqqəti işğaldan azad edilmiş ərazilərimizdə aparılan bərpa-quruculuq işlərinə yönəldərək bildirdi ki, dağıdılmış, yerlə-yeksan edilmiş bu bölgələr hazırda qardaşım İlham Əliyevin liderliyi ilə bənzərinə az rast gəlinən böyük bir inkişaf həmləsi ilə yenidən dirçəlir: “Körpüləri, dəmir yolları, avtomobil yolları, magistralları ilə yenidən bir Azərbaycan inşa edilir. İndi biz bunları yaşayırıq, görürük. Eşidərək deyil, görərək bu ifadələri işlədirik. Bu, təbii ki, başda qardaşım İlham Əliyev olmaqla, bütün komandası ilə əl-ələ verərək atdıqları addımlar, gördükləri işlərlə bu qədər qısa müddətdə Azərbaycan, necə deyərlər, burada sıfırdan başlayaraq yenidən ayağa qalxır.”
