Ceyhun Məmmədov: “Elə xüsusi şərt yoxdur ki, Ramazanda mütləq yeməkxanalar bağlı olmalıdır”
“Orucu pozan 3 amil var: yemək, içmək və ər-arvad münasibətləri. Bunlardan başqa içkili, musiqili məkanda olmaq, orada iftar açmaq orucu batil etməz. Dinimizdə belə bir qadağa və ya o cür haram yoxdur”. “ARANTV.AZ”ın məlumatına görə, bu sözləri Yenicag.az-a açıqlamasında ilahiyyatçı Elşad Miri orucun hansı hallarda pozulması məsələsinə toxunarkən deyib.
Onun sözlərinə görə, elə restoranlar var ki, sahibi özünü dindar göstərmək üçün Ramazanda yalnız iftar vaxtı fəaliyyət göstərir. “Bu, doğru deyil. Səfərdə olanları, turistləri, xəstəliyindən dolayı oruc tuta bilməyən insanları nəzərə almaq lazımdır. Niyə öz əqidəni və ya dünyagörüşünü məcburi şəkildə başqalarına qəbul etdirəsən ki? Bu, Allahla sənin aranda olan məsələdir”.
Ancaq İslam Peyğəmbərindən (s) hədis var, buyurur ki, “içkili məclislərə getməyin”. Başqa bir hədisə görə, “içkili məclisə gələn bəla oradakı möminlərə də gələcək”.
O zaman belə məkanlarda iftar açmaq nə dərəcədə caizdir? Bu, tutulan orucun savabını azaltmazmı? Üstəlik, iftar açmaq üçün alternativ variant(lar) varsa…
Ceyhun Məmmədov
İlahiyyat üzrə fəlsəfə doktoru, deputat Ceyhun Məmmədov mövzu ilə bağlı “Yeni Müsavat”a dedi ki, bütün ibadətlərin əsas məqsədi həm də insanların mənəvi kamilliyinə nail olmaqdır: “Əlbəttə, hökm baxımından orucu nə pozur, bu məlumdur. Eyni zamanda oruc tutan insan oruca xələl gətirən, yalan danışmaq, qeybət etmək, pislik etmək kimi əməllərdən də çalışıb uzaq olmalıdır. Sırf dini baxımdan məsələyə yanaşdıqda isə söhbət iftar mərasimləri üçün seçilən yerlərdən gedirsə, iftar üçün seçilən yerlərdə yaxşı olar ki, bu yerlər şəriətin qaydalarına əməl edən qaydalar olsun. Bu, dinimizin tələbidir. Dinimizin yanaşması odur, o yerlərdə iftar açılmalıdır ki, o yerdə İslam prinsipləri və qaydaları gözlənilir. Yeməkxanaların açılması məsələsinə gəldikdə isə məsələyə qlobal yanaşırıq, elə insanlar var ki, onlar oruc tutmurlar. Elə insanlar var ki, onlar müsəlman deyillər. Onlar bu imkanlardan istifadə edə bilərlər və yaxud xəstə insanlar var. Elə xüsusi şərt yoxdur ki, Ramazanda mütləq yeməkxanalar bağlı olmalıdır. Bəli, bəzi yeməkxanalar bunu edir, amma qeyd etdiyimiz məsələlər nəzərə alınaraq bu məsələyə baxıla bilər”.
Tural İrfan
İlahiyyatçı Tural İrfan isə mediaya açıqlamasında deyib ki, içki verilən və içilən məkanlarda oturmaq, iftar açmaq, namaz qılmaq olar: “Sadəcə, əgər başqa daha uyğun yer varsa, içki və haram olan yeri dəyişmək lazımdır. Bəziləri İran təbliğatına uyub guya mühafizəkarlıq etmək istəyirlər. Peyğəmbər 13 il Məkkədə yaşadı və orada şərab da içirdilər, digər haramlar da edirdilər. Hətta Kəbədə içirdilər, Peyğəmbər də orada namaz qılırdı, təvaf edirdi. Oruc da tuturdu, iftar da edirdi. Hətta içən adamları evinə dəvət edib onlara nəsihət edirdi, dini təbliğ edirdi. Sadəcə, bizim bəzi insanlar bilmir ki, oruc tutduğunu necə reklam etsin. Bu da normal deyil. İbadət edən adam, oruc tutan adam heç bildirməməlidir ki, o orucdur. Adi, normal vaxtda harada yemək yetirsə, elə orada da oruc aça bilər. Haram hər yerdə, hər zaman haramdır. Dində belə bir şey yoxdur ki, adi vaxtda içki olan kafedə nahar etmək olar, oruc vaxtı olmaz. Əgər olmasa, adi vaxtda da olmaz, iftar vaxtı da olmaz”.
