“Mətbuatda Səfərbərlik və Hərbi Xidmətə Çağırış üzrə Dövlət Xidməti ilə birlikdə Azərbaycan Respublikası Baş Prokurorluq tərəfindən keçirilmiş birgə kompleks tədbirləri nəticəsində Xəzər rayonu Səfərbərlik və Hərbi Xidmətə Çağırış üzrə Dövlət Xidmətinin rəisi və bir neçə zabiti həbs ediliblər. Məsələ ilə bağlı ictimai rəydə gedən bəzi fikirləri təhlil edərkən belə qənaətə gəlirəm ki, həmin xidmətdə islahatlara maneə olan və orada kök salmış xeyli əməkdaşlar var”.
ARANTV.AZ xəbər verir ki, bu fikirləri Demokrat.az-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.
O bildirib ki, hazırda Səfərbərlik və Hərbi Xidmətə Çağırış üzrə Dövlət Xidmətində obyektivliyin təmin edilməsində, çağırışa yararlı şəxslərin TƏBİB-in nəzdindəki həkimlər tərəfindən müəyyən edilməsində xeyli irəliləyiş var:
“Tibbi kommissiyaların səfərbərlik xidmətinə deyil, TƏBİB-ə tabe olması xidmətin rəhbərliyi tərəfindən qaldırılmış məsələlərdən biridir. Belə olan halda çağırışa gələn şəxslər TƏBİB-in həkimləri tərəfindən müayinə edilir və məsuliyyəti TƏBİB öz üzərinə götürür. Biz bilirdik ki, bu sahədə neqativ hallar var idi. Çağırışa yararlı olan və olmayan şəxslər müxtəlif vasitələrlə sağ-çürük edilirdi”.
Çingiz Qənizadə qeyd edib ki, orada çirkin oyunlar gedir, pul müqabilində müəyyən insanlar əsgərliyə çağırılır, digərləri hərbi xidmətdən kənarlaşdırılırdı:
“Bu kimi halların aradan qaldırılması ilə bağlı xidmətin rəhbərliyinin kommissiyanın TƏBİB-in nəzdində olması məsələsini qaldırması obyektivliyin təmin edilməsinə xidmət edən məqamdır. Hesab edirəm ki, bu,həmin dövlət xidmətində aparılan islahatların tərkib hissəsidir. Azərbaycan Respublikası Prokurorluq orqanlarının keçirdiyi əməliyyat şübhəsiz ki, həmin xidmətin özünün əldə etdiyi məlumatların prokurorluğa ötürülməsi ilə keçirdiyi birgə əməliyyatdır. Həbslərlə, inzibati metodlarla nəyəsə nail olmağın tərəfdarı olmasam da, hər hansı dövlət qurumunda islahatlara kölgə salan şəxslər mövcuddursa, onlar ya vəzifədən uzaqlaşdırılmalı, ya da həbs edilməlidir”.
Onun sözlərinə görə, insanların övladlarını hərbi xidmətə göndərən qurum hər zaman ailələrin və cəmiyyətin diqqətindədir:
“Aparılan islahatları alqışlamaq və dəstəkləmək lazımdır. Bu qurumda kök salmış müəyyən cinayətkar ünsürlər uzaqlaşdırılmalıdır. Yaxın vaxtlarda qurumda islahatların uğurla başa çatmasının da şahidi olacağıq. Mən 10 il Milli Məclisin deputatı vəzifəsində olarkən bölgələrdə tədbirlərdə olmuşam. İmişli və Beyləqanda deputat kimi kommissarlar ilə görüşmüşəm. Qurumun maddi təminatında problemlər olduğunu düşünürəm. Komissarlarla görüş zamanı inzibati binaların köhnə dövrlərdən qalması, komissarların əmək haqqlarının az olması, rayona vəzifəyə təyin olarkən kirayədə qalmaq problemlərinin yaranması haqqında söhbətlərimiz olmuşdu. Dövlət bu quruma daha çox diqqət ayırmalı, maddi-texniki bazanın yaxşılaşdırılması, əmək haqqlarının artırılması, sosial problemlərin həll olunması üçün xüsusi diqqət göstərilməlidir. Bu problemlərin aradan qaldırılması üçün vəsait ayrılmalıdır. Qurumda aparılan islahatlar dövlət qayğısı ilə birlikdə olduqda gələcəkdə də neqativ halların sayı azalacaq.
Doğrudan da bu cür tədbirlər müddətli həqiqi hərbi xidmətə çağırış sahəsində vəzifəli və digər şəxslər tərəfindən yol verilən qanunsuzluqların qarşısının alınması, korrupsiyaya qarşı mübarizə və şəffaflığı artırılmasına xidmət edir. Əvvəlki illərdən kök salmış neqativ halların aradan qaldırılması nə qədər çətin olsa da, olduqca vacib məsələdir. Bu sahədə neqativ halların aradan qaldırılması üçün görülən işlərdə uğurlar arzulayırıq”.
