“Hər kəsin su tələbatı fərqlidir və standart “gündə 2 litr su” qaydası artıq keçərli deyil”.
Oxu.Az-ın gazeta.ru-ya istinadla verdiyi məlumata görə, bu barədə rusiyalı endokrinoloq və nutrisioloq Darya Xaykina bildirir.
Onun sözlərinə görə, suyun miqdarı insanın çəkisi, boyu, fiziki aktivliyi, iqlimi və sağlamlıq vəziyyətindən asılıdır.
“Əvvəllər 1 kq çəkiyə 30-40 ml su hesablanırdı, lakin bu formula bədən tərkibini nəzərə almadığı üçün yanlışdır. Məsələn, 100 kq çəkisi olan iki nəfərin suya ehtiyacı fərqli ola bilər, çünki əzələlər yağ toxumasına nisbətən daha çox su saxlayır”, – deyə mütəxəssis vurğulayıb.
Həkim bildirib ki, su ilə bağlı orqanizmin verdiyi siqnalları dinləmək lazımdır:
“Əgər sidik rəngi açıq sarı və ya saman rəngidirsə, bu normal hidrasiya səviyyəsini göstərir, əgər sidik tünddürsə – susuzlaşma var. Eyni zamanda, orqanizmdə su çatışmazlığı zamanı süstlük, baş ağrıları, diqqət və konsentrasiya çətinlikləri yaranır. Həmçinin dodaqların quruluğu, çatlar və dəridə qabıqlanma maye çatışmazlığından xəbər verə bilər. Kofeinli içkilər susuzlaşdırmır, amma spirtli içkilər su itkisinə səbəb olur. Ona görə də, içkidən sonra əlavə 1-2 stəkan su içmək tövsiyə edilir”.
