Bədnam qonşularımızın tarixi saxtalaşdırmaqda nə dərəcədə mahir olduqları çoxdan məlumdur. Məşhur rus tarixçi akademiklərdən birinin dediyi kimi, “ermənilər öz tarixlərinə görə tarixə deyil, tarixçilərə borcludur”.
Ermənilərin Azərbaycan xalqına qarşı törətdiyi soyqırımı aktlarının, digər vəhşilik və vandallıqların əsas ideoloji nədəni də məhz budur – qondarma tarix. Hansı “tarixə” görə ki, Qafqazda ermənilər guya aborigen, türklər isə gəlmədir. Halbuki tam əksinədir.
Bunun isbatı üçün dağa-daşa çıxmağa, baş sındırmağa dəyməz. Bölgənin dörd bir yanına səpələnmiş, türklərə məxsus mədəni-dini abidələrə nəzər salmaq yetər. Təəssüf ki, onların əksəriyyəti vəhşi qəbilə tərəfindən dağıdılıb. Ancaq cinayətin izləri əlbəttə ki, qalır. Dünyanın mötəbər arxivlərindəki xəritələri, foto-faktları nəzərdə tuturuq. Eləcə də Qarabağda əsrlər boyu erməniləşdirilən alban dini-mədəni irsi…
Bu mənada Azərbaycanla sülhə ən böyük təhlükə təkcə Ermənistan konstitusiyasındakı ərazi iddiası ilə bağlı müddəadan yox, eyni zamanda və ondan da çox saxta erməni tarixindən qaynaqlanır, hələ də məktəblərdə tədris olunan qondarma tarix dərsliklərindən mənbə götürür. Çünki həmin kitablar “miatsum”un ideoloji bazası rolundadır.
İndi guya Nikol Paşinyan nəsə etməyə, vəziyyəti yaxşıya dəyişməyə çalışır. Hətta tarix dərsliklərini, konstitusiyanı “real Ermənistan”a uyğunlaşdırmaq üçün cəhdlər edir. Alınacaqmı? Xalqı ona bu işdə, referendumda gərəkən dəstəyi verəcəkmi?
Söyləmək çətindir. Bir şey dəqiqidir ki, erməni toplumu öz qərarı ilə öz taleyinə möhür basmış olacaq: o, qonşularla dinc-yanaşı yaşamağı, inkişafı seçir, yoxsa müharibəni, izolyasiyanın davamını və rəzaləti?..
Hərgah Paşinyan hökumətinin özünün də 44+1 günlük savaşdan sonra ağıllandığını söyləmək mümkün deyil. Götürək ATƏT-in üzdəniraq Minsk Qrupunun rəsmi ləğvinə İrəvanın hələ də razılıq verməməsini, bu il üçün rekord həddə – ÜDM-nin 6%-i! qədər hərbi büdcə müəyyən etməsini, altdan-altdan hücum ordusu revanşist planlar qurmasını, konstitusiya dəyişikliyi məsələsini uzatmasını. Bunlar qətiyyən Azərbaycanla sülhü yaxınlaşdırmaq əzminin təzahürləri sayıla bilməz.
Yaxud belə bir fakt. Ermənistanın İstintaq Komitəsi Azərbaycanın Qarabağda həyata keçirdiyi antiterror əməliyyatında sonra, 2023-cü il sentyabrın 20-də “cinayət işi” açıb. Bu barədə qurumdan “Sputnik Ermənistan”ın sorğusuna cavab olaraq bildirilib. “Azərbaycanın Dağlıq Qarabağ əhalisinə qarşı soyqırımı ilə bağlı ibtidai istintaq davam edir”, – cavabda qeyd edilir və təfərrüat açıqlamır.
Nə açıqlanacaq ki? Yenə Bakıya qarşşı barmaqdan sovrulmuş “dəlil-sübutlar” əsasında dünyanı heyrətə salacaq “sənəd”mi hazırlanır? Hansı “soyqırımı faktları”? Erməni əhalinin Qarabağdan köçü dinc şəkildə, Azərbaycan tərəfdən heç bir təzyiq olmadan, bir sakinin belə burnu qanamadan, dünyanın gözü qarşısında, az qala on-line rejimdə baş verib. Fakt istəyirsizsə, bu!!
Soyqırımının sübutu üçün dəlil axtarırsınızsa, Xocalı, Meşəli, Başlıbel qətlimalarının əks etdirən qandonduran görüntülər, sağ qalan canlı şahidlər. Ən azından Xocalı hərbi canisi Serj Sərkisyanın “Qara və Bağ” kitabındakı (müəllif – Tomas de Vall) sözləri. Digər hərbi cani Robert Köçəryanın AŞ PA tribunasından bəyan elədiyi (2003), Azərbaycan və erməni xalqlarının “etnik uyuşmazlığı” haqda faşist xislətli və sərsəm iddiası.
O zaman bu nə istintaq oyunbazlığıdır?..
Şəkk-şübhəsizdir ki, erməni tərəfi bu yolla yenə beynəlxalq birliyi çaşdırıb əleyhimizə kökləməyi, paralel surətdə masa arxasında güclü mövqe qazanmağı xəyal edir. Ağılları gedib ötən əsrin texnologiyanın zəif inkişaf elədiyi dövrünə.
Hərçənd XXI əsrdə də böyük yalanlara inanmaq istəyən varsa, yalana ehtiyac azalmayacaq. Özəlliklə Qərbdəki antitürk, islamofob mərkəzləri, ermənidən çox erməni olmaq istəyən çevrələri deyirik. Bizim davamız həm də onlarladır…
Z.SƏFƏROĞLU
