1993-cü il aprel ayının əvvəlində ölkəmizdə gedən siyasi hərc-mərcliklər və AXC-Müsavat hakimiyyətinin xalqımızın və ərazilərimizin təhlükəsizliyini təmin edə bilməməsi nəticəsində Qarabağın dilbər guşələrindən biri olan Kəlbəcər rayonu Ermənistan silahlı birləşmələri tərəfindən işğal olunur. İşğal nəticəsində onlarla tarixi abidə, 150-yə yaxın kənd, İstisu sanatoriyası və Kəlbəcər şəhəri dağıdılaraq xarabazara çevrilib.
İyirmi səkkiz ildən sonra Müzəffər Ali Baş Komandan İlham Əliyevin və rəşadətli Ordumuzun sayəsində Kəlbəcər 2020-ci il noyabrın 25-də işğaldan azad edilib.
İşğaldan azad olunan bütün ərazilərimizdə olduğu kimi, bu gün Kəlbəcərdə də misli görünməmiş tikinti-quruculuq və təmir-bərpa işləri sürətlə davam edir.
Tikinti şirkətinin layihə rəhbəri Vazeh Vəliyev AZƏRTAC-ın bölgə müxbirinə müsahibəsində Kəlbəcər rayonunda ilk məhəllələrin salınması prosesinin sürətlə davam etdiyini deyib: “Kəlbəcər rayonu ərazisində yaşayış binaları üçün ayrılmış yer 19.5 hektar ərazidir. Burada salınacaq ilk məhəllə 3.26 ha ərazini əhatə edir. Yaşayış məntəqəsində altı ədəd dördmərtəbəli iki blokdan ibarət binalar və qarşılarında isə ikimərtəbəli iki ədəd “townhouse” tikintisinin başa çatdırılması nəzərdə tutulub. Dördmərtəbəli binalar 27 mənzildən ibarət olmaqla iki, üç və dördotaqlı mənzillərdir”.
Ölkə başçısı İlham Əliyevin Sərəncamı ilə “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na əsasən digər işğaldan azad olunmuş ərazilərdə olduğu kimi Kəlbəcər rayonunda da Tədbirlər Planının icrası istiqamətində çoxşaxəli işlər görülməkdədir.
Ötən il sentyabrın 2-də ölkə başçısı tərəfindən təməli qoyulan Kəlbəcər şəhəri ikinci yaşayış məhəlləsində ayrılmış ərazinin ümumi sahəsi 1.76 hektardır. Bu layihədə isə 160 mənzildən ibarət yaşayış binaları yer alıb. Digər yaşayış məhəllələrinin isə konsept layihələri ilə bağlı işlər görülməkdədir.
Həmçinin bildirilib ki, yaxın zamanlarda Zar, Zallar və Yanşaq kəndlərində də tikinti işlərinə start verilməsi gözlənilir. Kəlbəcər şəhərində inzibati bina üçün ayrılan ərazinin sahəsi 2.42 hektar, şəhər parkı üçün ayrılan ərazi isə 10.9 hektar təşkil edəcək. Əlavə olaraq, 3.1 hektar ərazidə İşğal və Zəfər muzeyləri kompleksi layihəsinin həyata keçirilməsi nəzərdə tutulub.
Ümumi sahəsi 2.24 hektar olan Kəlbəcər Şəhər Təhsil Kompleksinin ərazisində 528 şagirdlik ümumtəhsil orta məktəbinin və 80 yerlik uşaq bağçasının, 7 peşə təhsili üzrə emalatxana və 70 yerlik yataqxananın tikintisinin də növbəti ildə tamamlanması gözlənilir.
Kəlbəcər rayonunda yerləşən İstisu qəsəbəsində isə 159 fərdi yaşayış evin inşası nəzərdə tutulub.
Təməli 2022-ci ilin 26 iyun tarixində qoyulan və hazırda da tikintisi davam edən “İstisu” Müalicə-İstirahət Kompleksi sağlamlıq turizmi baxımından ixtisaslaşacaq kompleksin 34 hektar ərazidə inşa edilməsi və orada hotel, restoran, kafe, kottec, inzibati bina, multifunksional konfrans zalı, əyləncə məkanları, açıq və qapalı hovuzların inşası planlaşdırılıb. 145 otaqdan ibarət olacaq hotel binasının qonaq qəbuletmə imkanının 420 olması ehtimal olunur.
Kəlbəcər düşmən tərəfindən xarabazara dönsə də, bu gün öz övladlarının ağuşunda gülüstana çevrilir. Möhtəşəm layihələr ard-arda fasiləsiz şəkildə start götürür. Azərbaycan xalqı Kəlbəcərin işğalını heç vaxt unutmayacaq, hər il Zəfər bayramında yenidən qurulan Kəlbəcərlə qürur duyacaq.
