Prezident İlham Əliyevin Antalya Forumunda iştirakı: Azərbaycanın dünya siyasətində artan nüfuzunun daha bir təsdiqi
Aprelin 11 –də Türkiyə Prezidenti Rəcəb Tayyib Ərdoğanın himayəsi və qardaş ölkənin Xarici İşlər Nazirliyinin (XİN) ev sahibliyi ilə başlayan IV Antalya Diplomtiya Forumunda «Parçalanmış dünyada diplomatiyanı bərpa etmək» mövzusu geniş müzakirə obyektinə çevrilib. Xatırladaq ki, Antalya Diplomatiya Forumu (ADF) 2021-ci ildən başlayaraq Türkiyənin Antalya şəhərində keçirilən beynəlxalq diplomatiya üzrə illik konfransdır. Forum zamanı siyasətçilər, diplomatlar və akademiklər tərəfindən diplomatiya, siyasət və bizneslə bağlı fikir mübadilələri aparılır. Antalya Forumunda Azərbaycan Prezidenti İlham Əliyev də iştirak edir. Eyni zamanda, ADF-ə dörd mindən çox qonaq, o cümlədən dünyanın 140-dan çox ölkəsindən 20-dən artıq dövlət və hökumət başçısı qatılıblar. 50-dən çox ölkənin xarici işlər nazirlərinin iştirak etdikləri Foruma, həmçinin 60-yaxın beynəlxalq təşkilatın nümayəndələri də dəvət ediliblər.
Türkiyə mətbuatının məlumatına görə Forum üç gün davam edəcək. Tədbirin əsas mövzuları müxtəlif coğrafiyaları əhatə edən məsələlər, o cümlədən iqlim dəyişikliyi, terrorizmlə mübarizə, humanitar yardım, rəqəmsallaşma, ərzaq təhlükəsizliyi və süni intellekt kimi qlobal gündəmlə bağlıdır. ADF-də müzakirələr 50-dən çox sessiyada davam edəcək. O da məlumdur ki, Foruma qatılan Azərbaycanın xarici işlər naziri Ceyhun Bayramovun türkiyəli və rusiyalı həmkarları Hakan Fidan və Sergey Lavrovla görüşü də nəzərdə tutulub.
Xatırladaq ki, hələ iki gün əvvəl ölkəmizdə buna bənzər bir beynəlxalq forum Bakıda ADA Universitetində «Yeni dünya nizamına doğru» mövzusunda keçirilmişdir. Ölkəmizin başçısı burada da regiondakı vəziyyətlə bağlı beynəlxalq aləmə önəmli mesajlarını çatdırmışdır.
Bu, bir reallıqdır ki, son 22 ildə Prezident İlham Əliyevin həyata keçirdiyi qətiyyətli və müdrik siyasət nəticəsində Azərbaycan dövləti nəinki iqtisadi-hərbi güc qazanıb, eyni zamanda, geosiyasi mövqelərini möhkəmləndirib. Xüsusilə 2020-ci ildə İkinci Qarabağ müharibəsində qazandığımız tarixi Zəfər ölkəmizin ərazi bütövlüyünü və suverenliyini bərpa etməklə bərabər, etibarlı tərəfdaşlarımızın və dostlarımızın da sayını artırıb. Çünki hazırkı ənənəvi geosiyasi tendensiya belədir ki, güclülərin dost və tərəfdaşları artan xətlə irəliləyir. Eyni zamanda, hazırda ölkəmiz beynəlxalq aləmdə sabitlik, inkişaf və əməkdaşlıq məkanı kimi tanınır və çıxış edir. Məhz bunun nəticəsidir ki, qüdrətli Azərbaycanla əməkdaşlıq etmək istəyən dövlətlərin və beynəlxalq təşkilatların sayı davamlı olaraq artır. Xüsusilə Prezident İlham Əliyevin yürütdüyü xarici siyasətdə balanslaşdırılma dəst- xətti ilə bərabər, həm də qarşılıqlı hörmətə və səmərəli əməkdaşlığa əsaslanan münasibətlər Azərbaycanın beynəlxalq nüfuzunun artmasına yeni imkanlar açır.
Bu, bir qürurverici məqamdır ki, Azərbaycan Prezidentinin təşəbbüsü ilə ölkəmizdə keçirilən nüfuzlu beynəlxalq tədbirlərdə dünyanın sayılıb-seçilən insanları-prezidentlər, baş nazirlər, nazirlər, beynəlxalq təşkilatların rəhbərləri məmnuniyyətlə iştirak edirlər. Çünki Prezident İlham Əliyevin siyasi nüfuzu və qətiyyətli lider imici beynəlxalq aləmi ona yüksək hörmət və diqqət göstərməyə sövq edir. Eyni diqqəti ölkəmizin başçısının xarici ölkələrdə və beynəlxalq təşkilatlarda keçirilən nüfuzlu beynəlxalq təşkilatlara davamlı dəvət edilməsində də görürük. Cənab İlham Əliyev həmin tədbirlərin çoxuna nəinki, Azərbaycanın dövlət başçısı kimi, həm də praqmatik lider və siyasətçi və şərəf qonağı kimi dəvət edilir.
Qeyd edək ki, son bir neçə ildə Prezident İlham Əliyevin Mərkəzi Asiya Dövlət Başçılarının 5-ci Məşvərət Görüşündə, Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 6-cı Zirvə Görüşündə, Şanxay Əməkdaşlıq Təşkilatının sammitlərində, Ərəb Dövlətləri Liqasının 31-ci Sammitində, SPECA – Mərkəzi Asiya Ölkələrinin İqtisadiyyatları üçün Xüsusi BMT Proqramının Zirvə Görüşündə, Davos Dünya İqtisadi Forumunda iştirakı ölkəmizə və onun başçısına diqqət və marağın əyani nümunəsidir. Bu mənada Prezident İlham Əliyev aprelin 11–13-də Türkiyənin Antalya şəhərində keçirilən IV Antalya Diplomatiya Forumunda iştirak etməsi də önəmli siyasi hadisədir. Dünya liderlərinin iştirak etdikləri bu Forum da beynəlxalq nüfuzuna görə diqqət çəkir.
Əvvəldə qeyd etdiyimiz kimi, Forumda «Parçalanmış dünyada diplomatiyanı bərpa etmək» mövzusu ətrafında qlobal çağırışların müzakirəsi nəzərdə tutulur. Ölkəmizin başçısının məhz beynəlxalq münasibətlər sahəsində zəngin təcrübəsi, dünya nizamına strateji baxışları və hadisələrə praqmatik yanaşmaları, onu beynəlxalq platformalarda böyük maraqla qarşılanan qətiyyətli liderə çevirib. Çünki Prezident İlham Əliyevin siyasi nüfuzu və qətiyyətli lider imici beynəlxalq aləmi ona yüksək hörmət və diqqət göstərməyə sövq edir. Forum həm də ona görə əhəmiyyətlidir ki, burada keçiriləcək görüşlər Azərbaycan-Türkiyə münasibətlərinin daha da inkişafına yeni zəmin yaradacaq. Xüsusilə iki qardaş ölkənin siyasi, iqtisadi, enerji, nəqliyyat, müdafiə və digər sahələrdə daha da dərinləşdirilmiş əməkdaşlığına yeni təkan veriləcək. Məlumdur ki, bu gün hər iki ölkə nəinki Cənubi Qafqazda, hətta Mərkəzi Asiyada sülhün və qardaşlığın əsl tərənnümçüləridir. Bu mənada böyük Turanın, yəni türk birliyi ideyasının da əsas yaradıcıları da məhz prezidentlər İlham Əliyev və Rəcəb Tayyib Ərdoğandır.
Ölkəmizin başçısının qardaş Türkiyəyə işgüzar səfəri və Antalya Diplomatik Forumunda iştirakı təkcə iki ölkə arasında strateji münasibətlərin daha da möhkəmləndirilməsi baxımından deyil, həm də Azərbaycanın beynəlxalq mövqelərinin güclənməsi və sülh təşəbbüslərinin reallaşması baxımından mühüm hadisə olacaq. Həmçinin bu gün regional nəqliyyat və logistika mərkəzinə çevrilən Azərbaycan hər il davamlı və xeyirxah təşəbbüslərlə çıxış edir. Bakı–Tbilisi–Qars dəmir yolu, Bakı Beynəlxalq Dəniz Ticarət Limanı və reallaşan layihələr Azərbaycanın regionun əsas nəqliyyat qovşağına çevrilməsini təmin edir. Sözügedən layihələr təkcə regional deyil, həm də Asiya ilə Avropa arasında strateji əlaqələrin möhkəmlənməsində mühüm əhəmiyyət kəsb edir.
Bundan başqa, Azərbaycanın uğurlu diplomatiyasının nəticəsi olaraq ölkəmiz beynəlxalq əməkdaşlıq platformalarında da fəal iştirak edir. COP29 kimi mötəbər beynəlxalq tədbirin 2024-cü ildə Azərbaycanda uğurla keçirilməsi ölkəmizin qlobal ekoloji gündəmdəki mühüm rolunu və iqlim dəyişikliyi ilə mübarizəyə verdiyi töhfələri bir daha təsdiqlədi. Bu nüfuzlu tədbir vasitəsilə Azərbaycan bəşəriyyətin qarşısında dayanan ən aktual problemlərin həllində önəmli tərəfdaş olduğunu nümayiş etdirdi.
Xüsusi vurğulamaq lazımdır ki, Azərbaycanın BMT, İslam Əməkdaşlıq Təşkilatı, Qoşulmama Hərəkatı və digər beynəlxalq qurumlarla sıx əməkdaşlığı nəinki ölkəmizə, eyni zamanda, bölgəmizə sabitlik, humanizm gətirir. Məhz Prezident İlham Əliyevin Azərbaycanın Qoşulmama Hərəkatına sədrliyi dövründə inkişaf etməkdə olan ölkələrin maraqlarını müdafiə etməsi, beynəlxalq arenada ədalətin bərpasına yönəlmiş addımlar atması dünya ictimaiyyəti tərəfindən yüksək qiymətləndirilib.
Son olaraq demək lazımdır ki, ölkəmizin başçısının Antalya Forumunda iştirakı Azərbaycanın dünya siyasətində mühüm söz sahibi olan dövlətə çevrildiyini bir daha təsdiq edir. Yəni, Azərbaycan bu gün əməkdaşlıq və dayanıqlı inkişaf naminə beynəlxalq birlikdə fəal mövqe tutaraq, regionun və dünyanın gələcəyinə öz dəyərli töhfələrini verir.
Elçin Zaman, «İki sahil»
