Mayın 17-si İslam Ölkələrinin Standartlar və Metrologiya İnstitutu (SMIIC) tərəfindən Ümumdünya Halal Standartları Günü elan olunub. “HALAL” sertifikatlaşma qida məhsullarının islam qaydalarına uyğun istehsalını təsdiqləyən xidmət növüdür.
Azərbaycan Qida Təhlükəsizliyi İnstitutundan (AQTİ) AZƏRTAC-a verilən məlumata görə, İnstitut tərəfindən “HALAL” sertifikatlaşma prosesi davam etdirilir. Bu günə qədər “OIC/SMIIC-1:2019 Halal qidaya dair ümumi tələblər” standartı üzrə 4 müəssisəyə 5 istiqamət üzrə AQTİ-nin “HALAL” sertifikatı təqdim olunub. Ümumilikdə isə 14 müəssisə sertifikat almaq üçün müraciət edib.
Sertifikat əldə etmək istəyən müəssisələr bir neçə mərhələdən keçməlidir. İlk mərhələdə sahibkar tərəfindən www.afsi.gov.az veb-səhifəsində təqdim olunan müraciət forması və ərizə doldurularaq halal@afsi.gov.az elektron poçt ünvanına göndərilir. Daxil olan müraciət AQTİ tərəfindən yoxlanılır, qiymət təklifi və müqavilə göndərilir. Növbəti mərhələdə obyektin halal qaydalara uyğunluğu və həmin müəssisənin qida təhlükəsizliyi idarəetmə sistemi qiymətləndirilir. Tələblərə cavab verdiyi təqdirdə, müəssisəyə etibarlılıq müddəti 3 il olan “HALAL” uyğunluq sertifikatı təqdim edilir.
“HALAL” sertifikatlaşma prosesi 4 kateqoriya üzrə aparılır. Bu kateqoriyalar iri və xırdabuynuzlu heyvanlarla quşların kəsimini, balıq məhsullarının emalını, süd və süd məhsullarını, eyni zamanda, emal olunmuş ət məhsullarını əhatə edir.
AQTİ Türkiyə Respublikasının Halal Akkreditasiya Qurumu (HAK) tərəfindən akkreditasiya olunub. Beləliklə, AQTİ-nin həyata keçirdiyi halal sertifikatlaşma beynəlxalq səviyyədə tanınan və etibarlı sertifikatlaşma xidməti olaraq fəaliyyət göstərir.
