Sağlamlığımız üçün əvəzolunmaz sayılan limon bəzi hallarda ciddi problemlər yarada bilər.
C vitamini mənbəyi kimi tanınan bu məhsul hətta allergik xəstəliklərə yol açır.
Mütəxəssislər limonun mədə turşusunu artıra, yanma və ya həzmsizlik kimi şikayətlərə səbəb ola biləcəyini qeyd edirlər. Mədə problemi olanların limondan uzaq durması tövsiyə olunur.
Tez-tez istehlak edilən limon zamanla diş minasının incəlməsinə səbəb ola bilər. Turşu quruluşu dişlərin təbii qoruyucu təbəqəsini aşındıraraq həssaslığa yol açır. Bu vəziyyət soyuq və ya isti qidalara ani reaksiyalarla özünü göstərə bilər. Diş sağlamlığı üçün limon qəbul etdikdən sonra mütləq ağzı su ilə yaxalamaq lazımdır.
Limonun tərkibində olan bəzi komponentlər, xüsusilə böyrək daşlarına meylli insanlar üçün risk yarada bilər. Daha əvvəl böyrək daşlarından əziyyət çəkən şəxslərə limon istehlakını məhdudlaşdırmaq tövsiyə olunur. Həddindən artıq istehlak böyrəklərdə kristallaşmanı sürətləndirə bilər.
Müəyyən dərmanlarla qəbul edildikdə, limon dərmanların təsirini artıra və ya azalda bilər. Xüsusilə qan durulducu dərmanlardan istifadə edənlər diqqətli olmalıdır.
Dərman qəbul edən şəxslər limon istehlakı ilə bağlı mütləq həkimləri ilə məsləhətləşməlidir.
Bundan əlavə, limon suyu birbaşa dəriyə tətbiq edildikdə, xüsusən də günəş işığına məruz qaldıqda ciddi ləkələrə səbəb ola bilər. Dərinin həssaslığı və ya qıcıqlanması da mümkündür. (Publika.az)
