Azər Badamov: “Hava limanlarının üçünün işğaldan azad olunmuş ərazilərdə ərsəyə gəlməsi həmin bölgənin daşımalar baxımından logistik rolunu artıracaq”
Prezident İlham Əliyev Türk Dövlətləri Təşkilatının Dövlət başçıları Şurasının qeyri-rəsmi iclasında çıxışı zamanı bildirib ki, Azərbaycanda hazırda 8 beynəlxalq hava limanı fəaliyyət göstərir və sayca 9-cu beynəlxalq hava limanı yaxın zamanlarda istifadəyə veriləcək. Bu mühüm infrastruktur layihələri ölkənin nəqliyyat-logistika potensialının sürətli inkişafını və regionların sosial-iqtisadi canlanmasını nümayiş etdirir.
Ən əlamətdar məqamlardan biri isə 9 beynəlxalq hava limanından 3-nün – Füzuli, Zəngilan və Laçın hava limanlarının – Azərbaycanın erməni işğalından azad edilmiş ərazilərində yerləşməsidir. Bu, həm iqtisadi, həm də strateji baxımdan böyük əhəmiyyət kəsb edir.
Qeyd edək ki, Azərbaycan son illər ərzində nəqliyyat infrastrukturuna böyük yatırımlar edib. Yeni hava limanları ilə yanaşı, 1,5 milyon ton yük qəbul etmə gücünə malik karqo terminalının inşası da aparılır. Bu terminal ölkənin beynəlxalq yükdaşıma sistemində rolunu əhəmiyyətli dərəcədə artıracaq.
Eyni zamanda avtomobil və dəmir yollarının yenidən qurulması və yeni yolların çəkilməsi davam edir. Azad edilmiş ərazilərdə Füzuli-Şuşa, Horadiz-Ağbənd kimi yollar artıq inşa olunmuş və ya inşası davam etdirilir. Zəngəzur dəhlizi layihəsi isə Azərbaycanın qlobal tranzit mərkəzinə çevrilməsinə xidmət edəcək. Azərbaycan hökuməti tərəfindən həyata keçirilən “Böyük Qayıdış” proqramı çərçivəsində köçkünlərin öz torpaqlarına qayıdışı üçün şərait yaradılır. Yeni salınan yaşayış məntəqələri, məktəblər, xəstəxanalar, mədəniyyət ocaqları və digər sosial obyektlər regionların dirçəldilməsinə yönəlib. Paralel olaraq, məşğulluq proqramları və sahibkarlığın təşviqi tədbirləri də reallaşdırılır.
Milli Məclisin deputatı Azər Badamov mövzu ilə bağlı “Yeni Müsavat”a bildirib ki, Azərbaycan son illər nəqliyyat sektoruna böyük sərmayələr yatırıb. Məhz bunun nəticəsidir ki, ölkəmizin nəqliyyat infrastrukturu müasirləşib. Belə ki, avtomobil və dəmir yolları yenidən qurulub, Beynəlxalq Dəniz Limanının yükaşırma gücünün 15 milyon tondan 25 milyon tona qədər artırılması istiqamətində layihə icra olunur. Dəniz donanmamızın gəmilərinin sayı 50-dən 60-a çatdırılır, BTQ-nin (Bakı-Tiflis-Qars) Gürcüstandan keçən hissəsinin yükgötürmə gücü isə 5 milyon tona çatdırılıb.
Həmçinin ölkəmizdə 8 hava limanı istifadəyə verilib, 9-cu hava limanının tikintisində son tamamlama işləri həyata keçirilməkdədir. Daşıma gücü 1,5 milyon ton olacaq karqo hava limanının tikintisi layihələndirilir. Azərbaycan ərsəyə gətirdiyi nəqliyyat layihələri ilə regionun logistik mərkəzinə çevrilib. Belə ki, 2024-cü ildə Türkiyə ilə Mərkəzi Asiya ölkələri arasında yükdaşımaların 11 milyon tonu keçməsi böyük göstəricidir.
İnşa etdiyimiz hava limanlarının üçünün işğaldan azad olunmuş ərazilərdə ərsəyə gəlməsi həmin ərazilərin həm yerli, həm də beynəlxalq daşımalar baxımından logistik rolunu artıracaq. İşğaldan azad olunmuş ərazilərin böyük iqtisadi potensialı mövcuddur. Bu baxımdan, həmin ərazilərdə yenidənqurma və bərpa işləri davam etdirildikcə, beynəlxalq daşımalarla bağlı olan tələbat bu ərazilərdə yaradılmış hava limanları vasitəsilə təmin olunacaq”.
Deputat əlavə edib ki, hava limanları ilə bağlı ən cəlbedici layihə, yükaşırma-daşıma gücü 1,5 milyon ton olacaq Ələt Karqo Beynəlxalq Hava Limanıdır: “Bu hava limanının beynəlxalq daşımalar baxımından əhəmiyyəti böyük olacaq. Məlumdur ki, Ələt Azad İqtisadi Zonasının iqtisadi potensialı çox böyükdür. Hazırda burada bir çox xarici sərmayədar öz investisiyalarını yatırmaqla yeni müəssisələrin yaradılması prosesini davam etdirir. Ələt Azad İqtisadi Zonasının özünəməxsus qanunları ilə idarə olunması bu ərazinin beynəlxalq ticarətə açıq platforma kimi xüsusi yanaşmaya malik olmasına səbəb olur.
Təbii ki, Ələt Azad İqtisadi Zonasının Beynəlxalq Ticarət Limanının yaxınlığında yerləşməsi, Bakı-Tiflis-Qars dəmir yoluna çıxışının olması və ərazidə 1,5 milyon ton yükdaşıma gücünə malik hava limanının inşası xarici sərmayədarların ölkəmizə marağını daha da artıracaq. Həm ölkəmizin üzərindən daşınan beynəlxalq yüklərin kəskin şəkildə artması, həm də yeni investisiya layihələrinin həyata keçirilməsi nəticəsində yeni müəssisələrin ərsəyə gəlməsi Azərbaycan iqtisadiyyatının güclənməsinə mühüm töhfə verəcək. Azərbaycan bu gün Türk Dövlətləri, Asiya ilə Avropa, eləcə də Qlobal Şimalla Qlobal Cənub arasında körpü rolunu oynayır. Bu da ölkəmizin dünyada həm siyasi, həm də iqtisadi mövqelərinin möhkəmlənməsinə yol açır”.
Yazını hazırladı: Afaq MİRAYİQ
