Azərbaycanın ən yüksək generasiya gücü olan Elektrik Stansiyasının “8 Noyabr” adlandırılması və bu adı ona Müzəffər Ali Baş Komandanımızın verməsi əlbəttə, səbəbsiz deyil.
Musavat.com-un məlumatına görə, bu fikir deputat Sahib Alıyevə məxsusdur.
Milli Məclis üzvünün sözlərinə görə, böyük zəfərlər hər bir millətin gələcəyini nurlandıran sönməz enerji mənbəyidir və 2020-ci ilin 8 noyabrında başa çatan İkinci Qarabağ savaşında qazandığımız qələbə də bu baxımdan istisna deyil: “Sözügedən qələbə ilə təkcə torpaqlarımızı azad etmədik ki, həm də belə demək mümkünsə, milli enerji potensialımız buxovdan qurtuldu. İllər keçdikcə bunun, yəni 8 Noyabr Zəfər Gününün bir millət olaraq bizi nə cür enerjiləndirdiyini və qarşımızda necə böyük üfüqlər açdığını daha aydın hiss edəcəyik. Prosesləri ardıcıl izləyənlər son beş ildə Azərbaycanın təkcə Güney Qafqazda yox, bu regionun sərhədlərindən qat-qat uzaqlarda təsirinin nə qədər artdığını və dövlətimizin yeni bir güc mərkəzinin formalaşmasında oynadığı mən deyərdim ki, müstəsna rolu onsuz da görürlər.
Elə cənab Prezidentin iyunun 24-də açılışını etdiyi Elektrik Stansiyası da dövlətimizin gücünü, az qala bir addımlığımızda baş verən son dərəcə təhlükəli olaylara rəğmən necə böyük əzm və ustalıqla qarşısına qoyduğu hədəflərə doğru irəlilədiyini göstərmirmi?
Baxın, işğaldan azad olunan torpaqlarımızda, təqribən Livan boyda ərazidə Təkbaşına hər kəsi heyrətləndirən quruculuq işləri aparan və zəlzələdən böyük zərər görmüş Türkiyənin Kahramanmaraş şəhərində “Azərbaycan” məhəlləsi adlı yaşayış massivi tikib qardaşlarımıza hədiyyə edən Tək dövlət eyni zamanda Mingəçevirdə 1880 meqavatlıq yeni elektrik stansiyasını ərsəyə gətirir. Həm də cəmisi iki ilə. Halbuki, həmən stansiyanın açılışında cənab İlham Əliyev də qeyd etdi ki, belə böyük obyektlər bir neçə ilə zorla tikilir. “Misal üçün, elə sovet dövründə Mingəçevirdə “Azərbaycan” İstilik Elektrik Stansiyasının inşası 1974-cü ildə başlamışdır və birinci blok 1981-ci ildə istismara verilmişdir. Yəni, yeddi ildən sonra 300 meqavat enerji əldə edilmişdir”. Özü də bu, son 5 ildə tikilən səhv etmirəmsə, 40-cı elektrik stansiyasıdır. Xatırladım ki, Qarabağ və Şərqi Zəngəzurda bu müddət ərzində 38 su elektrik stansiyası istifadəyə verilib ki, onların da ümumi generasiya gücü 307 meqavatdır”.
S.Alıyev ardınca digər mühüm məqamlara da toxunub: “Əlbəttə, çox qısa müddətdə belə yüksək enerji ilə enerji potensialımızı artıra bilməmizin bir neçə səbəbi var ki, onların başında müstəqil dövlət olmağımız və torpaqlarımızı işğaldan azad etməyimiz gəlir.
Digər səbəblər isə cənab İlham Əliyevin “8 Noyabr” Elektrik Stansiyasının açılış törənindəki nitqində vurğulandığı kimi mövcud energetika bazamız, təcrübəmiz, energetiklərimizin peşəkarlığı və uğurlu beynəlxalq əməkdaşlıqdır. Bu stansiya da məhz İtaliya və Çin şirkətləri ilə sıx əməkdaşlıq nəticəsində cəmisi iki ilə ərsəyə gəldi.
8 Noyabr” Elektrik Stansiyası ölkənin hazırkı generasiya gücünün 40 faizdən çoxunun cəmləşdiyi Mingəçevirin Qafqazın energetika mərkəzi statusunu daha da gücləndirməklə yanaşı bütövlükdə qitənin enerji xəritəsinə ediləcək yeni düzəlişlərin reallaşması yönündə mühüm bir addımdır. Biz Azərbaycanın Pan-Avropa qaz təchizatçısı olaraq qalmayıb orta perspektivdə Pan-Avropa elektrik təchizatçısına çevrildiyini də görəcəyik. Verdiyimiz enerjinin qarşılığında alacağımız Enerji isə “middle power” olaraq böyük hədəflərə doğru irəliləməmizdə az karımıza gəlməyəcək”.
