Bu il ölkəmizi Avropa arenasında təmsil edən bütün futbol klublarımızın rəqibləri məlumdur. 15 ilə yaxındır ki, Azərbaycanın xarici meydanlarda qürur mənbəyinə çevrilən son çempion “Qarabağ”ın rəqibi İrlandiya komandası “Şelburn”dur. Əfsanə baş məşqçimiz Qurban Qurbanovun kollektivi bu səddi aşarsa, “Şkendiya” (Şimali Makedoniya) – FCSB (Rumıniya) cütünün qalibi ilə qarşılaşacaq.
Digər təmsilçilərimizin də qarşıdakı oyunda qalib gələrlərsə, ondan sonrakı potensial rəqibləri də aydınlaşıb. Avropa Liqasında “Sabah” uduzandan sonra 3 klubumuz da Konfrans Liqasında mübarizə aparacaq, yəni Avropa Liqasında heç bir klubumuz qalmayıb.
“Petrokub” (Moldova) – “Sabah” cütünün qalibi Avropa Liqasının “Levski” (Sofiya, Bolqarıstan) – “Braqa” (Portuqaliya) cütünün məğlubu ilə görüşəcək.
“Zirə” (Azərbaycan) – “Hayduk” (Xorvatiya) cütünün qalibi “Atletik Klub d’Escaldes” (Andorra) – “Dinamo Siti” (Albaniya) cütünün qalibi ilə qarşılaşacaq.
“Araz-Naxçıvan” (Azərbaycan) – “Aris” (Yunanıstan) cütünün qalibi isə “Omonia” (Kipr) – “Torpedo” (Kutaisi, Gürcüstan) cütünün qalibinə rəqib olub.
Artıq bu gündən etibarən bütün diqqətlər “Qarabağ”a yönələcək. Azərbaycan çempionu Avropa turuna çıxır. Bakı vaxtı ilə saat 22:45-də “Şelburn” – “Qarabağ” qarşılaşması start götürəcək. Komandalar arasındakı cavab görüşü isə ayın 30-da Bakıda baş tutacaq.
Kənan Məstəliyev
İdman mütəxəssisi Kənan Məstəliyev “Yeni Müsavat”da klublarımızın şanslarını ayrı-ayrılıqda şərh etdi: “Bu mövsüm avrokuboklarda püşk baxımından bəxtimizin o qədər də gətirmədiyini düşünürəm. Yeganə istisna “Qarabağ”dır. Ağdamlıların rəqibi olan “Şelburn” İrlandiya çempionu olsa da, möhkəm və mübariz komandadır. Ancaq təmsilçimiz daha güclü, daha təcrübəlidir, favorit tərəf də bizik. Düşünürəm ki, Qurban Qurbanovun yetirmələri turu keçməyə yaxın tərəfdir və keçəcəklər. “Qarabağ”ın heyətində çox yaxşı, istedadlı futbolçular toplaşıb, üstəlik, yaxşı komanda oyunu da nümayiş etdirirlər. Bütün bunlar bizi qələbəyə daha yaxın tərəf edir. Qurban Qurbanovun rəqibi yaxından tanımaq imkanı, hazırlıqları etmək imkanı olub. “Ağ-göylər” yaxşı bir toplanış keçib, lazımi yüklənməni alıb, heyəti sınaya bilib. İlk matçda müəyyən səhvlər olacaq, ancaq yavaş-yavaş hər şey qaydasına düşəcək.
“Sabah” Sloveniya “Çelye”siylə yox, nisbətən asan rəqiblə düşsəydi, Avropa Liqasında turu keçən tərəf olacaqdı. Masazırlılar çox gözəl mübarizə nümayiş etdirdilər, sona qədər vuruşmağa çalışdılar. Ancaq güc və təcrübə azlığı öz sözünü dedi. İndi rəqib “Petrokub”dur. Moldova komandası son zamanlar yüksəlişdədir, hətta ölkə çempionu da olublar. Ancaq hazırda “Sabah” daha güclüdür, daha yaxşı performans nümayiş etdirə bilir. “Petrokub” son illərdə yüksəlişdə olsa da, keçiləsi komandadır. Dambrauskas da öz komandasını tanımaq üçün yetərli vaxt əldə edib, gücünə bələddir. Bir fors-major olmasa, düşünürəm ki, Valdas Dambrauskasın yetirmələri bu dəfə turu keçərək yollarına davam edəcəklər.
“Zirə” çox ciddi rəqiblə qarşılaşacaq. “Hayduk” güclü, çox çətin komandadır. Xorvatiya kimi çempionatda qızıl medalları son anda əldən verib. Heyətində Marko Livaya kimi universal, hərtərəfli hücumçuları, yaxşı, formalaşmış komandaları var. Qattuzodan sonra daha praqmatik oynamağa çalışırlar. Heyətləri “Zirə”dən daha üstündür. Birmənalı şəkildə cütün favoriti xorvatlardır. Şansımız azdı, amma yox da deyil. Səbrli, təmkinli oynasaq və gücümüzü düzgün bölə bilsək, uğura ümid edə bilərik. Bir sözlə, rəqib üçün heç də asan olmayacaq.
“Araz Naxçıvan”a da çətin rəqib düşüb. “Aris” köklü klublardandır. Dinamik, çevik futbol oynayırlar. Heyətlərində keyfiyyətli oyunçular var, Avropanın yaxşı yerlərindən transferlər edirlər. Asan olmayacaq. “Araz” da yayda yaxşı keçidlər rəsmiləşdirib. Gözlənilməz, güclü futbolçu transferləri ilə bütün nöqtələrini möhkəmləndirib. Elmar Baxşıyev də praqmatik düşüncəli, avrokubok təcrübəsi olan məşqçidir. Düşünürəm ki, naxçıvanlıların ilk oyunda özlərini yaxşı tərəfdən göstərəcəyi, yaxşı hesab əldə edəcəyi halda, turu keçmək şansları var. Yunanlar yaxşıdılar, amma biz də asan təslim olmayacağıq”.
Cavanşir ABBASLI,
“Yeni Müsavat”
