Bakıda it oğurlamaqda təqsirləndirilən şəxs həbs edilib. Həmin şəxs oğurladığı itin yerinə öz itini bağlayıb.
Musavat.com-un xəbərinə görə, hadisə Baş Dövlət Yol Polis İdarəsinin Ekologiya Postunun yaxınlığında baş verib.
37 yaşlı Anar (ad şərtidir) postun arxasından keçən zaman “Malinka” cinsli itin dəmir dirəyə bağlandığını görüb. Dediyinə görə, iti gəzdirmək üçün ipini açaraq götürüb. Öz itini də həmin yerə bağlayıb.
Anar iti evə apararaq bir gün saxlayıb. Həmin günün səhəri itlə birlikdə Avtovağzal ərazisində yerləşən gül mağazasına gəlib. Orada olan zaman bir nəfər yaxınlaşaraq itin sahibi olduğunu deyib. Sonra hadisə yerinə polis əməkdaşları çağırılıb.
Anar iti oğurlamaq fikri olmadığını deyib. Bildirib ki, məqsədi iti gəzdirdikdən sonra yerinə qaytarmaq olub. Amma onun dedikləri inandırıcı olmayıb. İtin sahibi də Anardan şikayətçi olub.
Anar İnzibati Xətalar Məcəlləsinin 227-ci maddəsinə əsasən, 25 sutka həbs edilib.
