Kremlə yaxın nəşr Moskvanın Azərbaycan və Mərkəzi Asiyanın türkdilli dövlətlərinə münasibətdə qaba siyasətinin, zorla “rus təbliğatı”nın yanlış olmasını etiraf etdi; “NQ”: “Türk Dövlətləri Təşkilatı öz Avropa İttifaqını qurur”
Almatı “Türk Dünyasının Gənclər Paytaxtı – 2025” statusuna layiq görülüb. Həftəsonu Türk Dövlətləri Təşkilatının (TDT) Beynəlxalq Gənclər Festivalının açılışına start verilib. Qazaxıstan prezidenti Qasım-Jomart Tokayev təbrik məktubunda tədbirin türk dövlətləri arasında əlaqələrin möhkəmləndirilməsi baxımından xüsusi əhəmiyyətini qeyd edib.
Musavat.com xəbər verir ki, Kremlin fəal təbliğat nəşrlərindən olan “Nezavisimaya qazeta” TDT-nin son illər inkişafı barədə məqalə dərc edib. Məqalədə əsas vurğu keçmiş sovet respublikalarında “Rus dünyası” tendensiyasının zəifləməsindən və TDT-nin mövqelərinin möhkəmlənməsindən narahatlığa yönəlib. Qəzetin ekspert kimi seçdiyi Etno-Milli Strategiyalar Agentliyinin direktoru Aleksandr Kobrinskinin açıqlamaları da bu narahatlığı təsdiq edir.
Ekspert xüsusilə Türkiyənin TDT-nin dünyadakı mövqelərinin güclənməsində xüsusi rolunu vurğulayıb. “Türk dəyərlərinin, dilinin və mədəniyyətinin fəal şəkildə təbliği, eləcə də Mərkəzi Asiya ölkələrindən olan gənclər üçün təhsil imkanlarının yaradılması türk dünyasının müsbət imicini formalaşdırmağa və onun regionda mövqeyini gücləndirməyə imkan verir”, – Kobrinski deyib. Onun sözlərinə görə, bu baxımdan, postsovet respublikalarında “rus dünyası”nın təbliği ilə bağlı yanaşmaları yenidən nəzərdən keçirmək lazımdır. “Cəmiyyətdə dəyişən geosiyasi reallıqları və əhval-ruhiyyəni nəzərə almaq, düz və qarşıdurma xarakterli bəyanatlardan qaçmaq vacibdir. Bunun əvəzinə hörmət, bərabərlik və milli maraqların nəzərə alınması prinsipləri əsasında qarşılıqlı faydalı əməkdaşlığın inkişafına diqqət yetirmək lazımdır”, – deyə o bildirib. Bu açıqlama Kremlin son illər Azərbaycan və Mərkəzi Asiyanın türkdilli dövlətlərinə münasibətdə qaba siyasətinin, zorla “rus təbliğatı”nın yanlış olmasının etirafıdır.
Ekspert son illərdə TDT-nin getdikcə daha fərqli siyasi və iqtisadi quruma çevrilməsinə diqqət çəkib. “Etiraf etmək lazımdır ki, türk inteqrasiyası mövzusu bu gün Mərkəzi Asiya ölkələrində “Rus dünyası” mövzusundan daha müsbət qarşılanır. Bu, həm mədəni, həm dil yaxınlığı kimi obyektiv amillərin, həm də Rusiya siyasətindəki yanlış hesablamaların nəticəsidir”, – Kobrinski deyib. Onun fikrincə, keçmiş sovet respublikalarında Rusiyanın maraqlarını müdafiə edən elitanın yetişdirilməsi üçün təhsilə və mədəniyyət mübadiləsinə yanaşmalara yenidən baxmaq lazımdır. “TDT Avropa Birliyinin prototipidir” deyən ekspert təşkilatın güclənməsindən açıq narahatlığını bir daha bu fikirlərlə faş edib. Ekspert deyib ki, Avropa Birliyi yarandıqdan sonra bu təşkilata üzv dövlətlər müstəqilliklərini itirdikləri kimi, Mərkəzi Asiya ölkələri də eyni aqibəti yaşaya bilər.
…Rusiya deyəsən, həm etiraf da, həm də “Turan birliyinə” qarşı yanlış siyasətdə dönüş etməkdə çox gecikib.
Musavat.com
