SEPAH-a yaxın teleqram kanalları İranın hərbi arsenalına dair sensasiyalı məlumat yayıb.
Musavat.com-un xəbərinə görə, paylaşımda iddia olunur ki, Tehran nüvə silahı haqqında müqavilədən çıxmağa hazırlaşır və eyni zamanda səsdən 12 dəfə sürətli hipersəs raketi üzərində işləyir.
Məlumatda qeyd olunur ki, bu raket eyni vaxtda 80 ədəd döyüş başlığı buraxa bilir. Hər bir başlığın çəkisi təxminən 70 kiloqramdır və onların havada səpələnərək müxtəlif istiqamətlərdə hədəflərə yönəldiyi bildirilir. İddialara görə, bu texnologiyanın qarşısını yalnız hələ mövcud olmayan, son dərəcə mürəkkəb HHM sistemləri ala bilər.
SEPAH iddiasına görə, bu silah kompleksi İsrailin mövcudluğu tarixindəki ən təhlükəli təhdid hesab olunur.
Qeyd edək ki, SEPAH çox vaxt hərbi imkanlarını şişirdilmiş formada təqdim edir. Xatırladaq ki, İsrailin 12 gün davam edən son bombardımanları zamanı, SEPAH baş komandanı Hüseyn Salami də daxil olmaqla 20-dən çox yüksək rütbəli general ilk günlərdən həlak olmuşdu. Bu səbəbdən təşkilatın bu cür açıqlamaları beynəlxalq hərbi dairələrdə çox da ciddi qəbul edilmir.
Bununla belə, İranın hipersəs texnologiyalar üzərində işlədiyi barədə məlumatlar əvvəllər də gündəmə gəlib. Lakin həmin raketlərin real sınaqları və döyüş istifadəsi barədə təsdiqlənmiş faktlar hələlik yoxdur.
Musavat.com
