ABŞ Dövlət Departamenti Yaxın Şərqdə fəaliyyət göstərən və Vaşinqtonun iddiasına görə, İrana bağlı olan bir sıra silahlı qrupları terror təşkilatları siyahısına əlavə edib. Musavat.com xəbər verir ki, bu barədə Dövlət Departamentinin rəhbəri Marko Rubio bəyanat yayıb.
Siyahıya İraqın “Kətaib Seyyid əş-Şühəda” dəstəsi, “Kətaib İmam Əli” qruplaşması, “Hərəkat Ənsar Allah əl-Əufiya” və “Hərəkat Hizbullah ən-Nucaba” kimi birləşmələr daxil edilib. ABŞ tərəfi onları “İranın dəstəklədiyi hərbiləşdirilmiş qruplaşmalar” adlandırır. Qeyd edək ki, Vaşinqton bundan əvvəl də həmin qurumlara qarşı sanksiyalar tətbiq etmişdi.
Dövlət Departamentinin məlumatında bildirilir ki, İran bu təşkilatlara dəstək göstərməklə onların İraqda hücumlar planlaşdırmasına və həyata keçirməsinə şərait yaradır. Sənəddə həmçinin vurğulanır ki, sözügedən qrupların üzvləri ABŞ-ın Bağdaddakı səfirliyinə və regionda Vaşinqtonun müttəfiqlərinə qarşı hücumlarda iştirak ediblər.
Marko Rubionun sözlərinə görə, bu addım ABŞ Prezidenti Donald Trampın 4 fevralda imzaladığı “İrana maksimum təzyiqin bərpası” ilə bağlı fərmana əsaslanır. Sənədin məqsədi İranın nüvə silahı əldə etməsinin qarşısını almaq və ölkənin neft ixracını məhdudlaşdırmaqdır.
Şahanə Rəhimli
Musavat.com
