“Təhsil haqqında Azərbaycan Respublikasının qanununun 42-ci maddəsi “Keyfiyyətsiz təhsilə görə vurulan zərərin ödənilməsi” haqqındadır. Keyfiyyətsiz təhsilə görə valideyn məhkəməyə müraciət edə bilər. Mən hələ elə bir hala rast gəlməmişəm ki, belə hadisə baş versin. Keyfiyyətsiz təhsilin nədən ibarət olduğunu cəmiyyət bilməli və öz hüquqlarını tələb etməlidir”.
Bu sözləri Musavat.com-a açıqlamasında sabiq millət vəkili, təhsil eksperti Etibar Əliyev deyib.
O bildirib ki, Azərbaycan universitetlərində çox az sayda tanınan alimlər var ki, bu da təhsilin keyfiyyətinə ciddi təsir edir:
“Hər bir universitetin potensialı onun alim korpusu ilə müəyyənləşir. Son dövrlər xeyli sayda dissertasiyalar ləğv olunur, çoxunun plagiat olduğu ortaya çıxır. Əksər dissertasiyaları başqaları yazır, yəni işi dissertantın özü yox, başqaları hazırlayır. Belə olan halda hansı alim korpusundan danışmaq olar?
Bəzi ali məktəblər fəxrlə deyir ki, beynəlxalq reytinqdə 800–1000 arasında yerləşir. Bəli, inkişaf edən universitetlər var. Ancaq bu, hansı reytinqdir və həmin reytinqlər nəyə xidmət göstərir? Hər universitetdə üst-üstə üç tanınmış alim yoxdur. Universitetlərdə alim korpusu böyük rol oynayır. Deyirlər ki, Amerika universitetləri əksər reytinqlərdə öndədir, çünki orada Nobel mükafatçıları işləyir – bu da reytinq deməkdir. Amma bizdə universitetlərdə çox az sayda. Bu isə təhsilin keyfiyyətinə ciddi təsir edir. Laboratoriyalar ötən əsrin 70–80-ci illərindən qalan avadanlıqlardır.
Universitetlər son 20 ildir ki, kitab almır. Alanlar var, amma əksər hallarda almırlar. Universitetlər yenilənmir. Bəzən tələbələr görür ki, müəllim onlardan az bilir, yəni tələbə müəllimdən daha savadlıdır”.
Xalidə GƏRAY
Musavat.com
