“Broyler ətini tez-tez istifadə etməkdən çəkinmək və mütləq yaxşı bişirmək lazımdır” – Qida eksperti

“Broyler toyuqları, yəni süni şəkildə tez böyüməsi üçün xüsusi yem və şəraitdə yetişdirilən quşlar bazarda geniş yayılıb. Lakin qida mütəxəssisləri bu məhsulların sağlamlığa müəyyən zərərləri barədə xəbərdarlıq edirlər.

Qida eksperti Hüseyn Kərimov BiG.AZ-a bildirib ki, broyler toyuqlarının bir neçə həftə ərzində kütləvi şəkildə böyüməsi onların orqanizminin təbii inkişafına uyğun deyil:

“Broyler toyuqları çox vaxt hormon və antibiotik tərkibli yemlərlə qidalandırılır. Bu maddələr ətin tərkibində qala və uzunmüddətli istifadədə insan orqanizmində hormonal pozğunluq, allergiya və immun sisteminin zəifləməsinə səbəb ola bilər.”

Broyler ətində su və yağ nisbəti də təbii kənd toyuğuna nisbətən fərqlidir.Bu ətlərdə zülal miqdarı daha az, su və yağ payı isə daha çox olur. Nəticədə həm dad, həm də qidalanma keyfiyyəti aşağı düşür.Xüsusilə uşaqlar, hamilə qadınlar və xroniki xəstəlikləri olan şəxslər üçün broyler ətinin miqdarına diqqət edilməlidir.
Ən sağlam seçim kənd toyuğudur. Əgər bu mümkün deyilsə, broyler ətini tez-tez istifadə etməkdən çəkinmək və mütləq yaxşı bişirmək lazımdır.İstehlakçılar məhsul alarkən onun mənşəyinə, saxlanma şəraitinə və istehsal tarixlərinə diqqət etməlidirlər”.