8 Noyabr Zəfər Günü Azərbaycan Respublikası dövlətçilik tarixinin ən parlaq və şərəfli səhifəsi olaraq qeyd edilir. Bu tarix, 30 ilə yaxın davam edən Ermənistan işğalına 44 gün ərzində Müzəffər Ali Baş Komandan İlham Əliyevin rəhbərliyi ilə son qoyulduğu, Azərbaycanın ərazi bütövlüyünün bərpa edildiyi Böyük Qələbənin rəmzidir.
2020-ci il sentyabrın 27-də Ermənistanın növbəti genişmiqyaslı təxribatına cavab olaraq başlayan Vətən müharibəsi Azərbaycanın haqq işi və beynəlxalq hüququn tələblərinin yerinə yetirilməsi idi. Azərbaycan Silahlı Qüvvələri tərəfindən həyata keçirilən “Dəmir Yumruq” əməliyyatı nəticəsində düşmənin onilliklər ərzində qurduğu müdafiə xətti qısa zamanda yarılaraq Füzuli, Cəbrayıl, Zəngilan, Qubadlı kimi şəhərlər və yüzlərlə yaşayış məntəqəsi azad edildi.
Zəfərə aparan həlledici addım 8 Noyabr 2020-ci ildə Qarabağın tacı sayılan Şuşa şəhərinin azad edilməsi oldu. Bu, Azərbaycan hərb sənətinin ən zirvə nümunəsi, mürəkkəb relyef şəraitində düşmənə qarşı misilsiz əsgər şücaətinin təntənəsi idi. Şuşanın azad edilməsi müharibənin taleyini birdəfəlik həll etdi və düşməni kapitulyasiyaya məcbur etdi.
Şuşa Zəfərindən dərhal sonra, 10 Noyabr 2020-ci ildə Ermənistan rəhbərliyi üçtərəfli Bəyanatı imzalamaqla məğlubiyyətini rəsmən etiraf etdi. Bu sənəd Azərbaycanın siyasi və hərbi qələbəsini hüquqi müstəvidə təsbit etdi, Ağdam, Kəlbəcər və Laçın rayonlarının isə siyasi yolla, döyüşsüz boşaldılmasını təmin etdi.
Prezident İlham Əliyevin 3 Dekabr 2020-ci il tarixli Sərəncamı ilə 8 Noyabrın Zəfər Günü elan edilməsi, bu tarixi nailiyyətin xalqımızın qan yaddaşında əbədiləşməsinə xidmət edir.
8 Noyabr – Azərbaycan xalqının milli qürurunun təntənəsi, dövlətin suverenliyinin və ərazi bütövlüyünün tam bərpasıdır. Bu Zəfər, bölgədə yeni bir geosiyasi reallıq yaratmış, Azərbaycanın qlobal və regional miqyasda nüfuzunu əhəmiyyətli dərəcədə gücləndirmişdir.
Azərbaycanın gələcək inkişafı və davamlı sülh naminə atılan addımlar məhz bu böyük Zəfərin təməlində dayanır.
Yunis Eyyubov
YAP Ağstafa rayon təşkilatının əməkdaşı
