Bakıda keçirilən hərbi paradda minlərlə hərbi qulluqçu iştirak etdi. Müasir zirehli texnikanın, təyyarə və raketlərin, gəmilərin və silahların nümayişi Azərbaycan Silahlı Qüvvələrinin Cənubi Qafqaz regionunda alternativinin olmadığını əyani surətdə göstərir.
Bundan əlavə ölkəmiz son illərdə hərbi gücünü intensiv şəkildə artırır.
Paradda çıxış edən Azərbaycan Prezidenti, Ali Baş Komandan İlham Əliyev bununla bağlı paralellər apardı. Dövlətimizin başçısı bildirdi ki, 2020-ci ildə 44 günlük Vətən müharibəsi başlayanda Azərbaycan Ordusunda 2000 nəfərə yaxın Xüsusi Təyinatlı Dəstə üzvləri vardı. Bu gün paradda yalnız meydanda 4000 yüksək təlimli XTQ var idi. Bu isə həmin qüvvənin yalnız bir hissəsidir.
Yaddan çıxarmaq olmaz ki, 1990-cı illərdə Azərbaycan Ordusu yox idi. Könüllül döyüşənlərin əllərində isə primitiv silahlar vardı. Silah anbarları Surət Hüseynov kimi xəyanətkara təhvil verilmiş və silahları Azərbaycanın əleyhinə yönəltməyi əmr etmişdilər.
O vaxt hakimiyyəti zəbt edən və heç bir işə yaramayan bədnam AXC-Müsavat cütlüyünün rəhbərləri ağılsız, başıpozuq hərəkətləri ilə yenicə müstəqilliyini bərpa etmiş ölkəni ictimai, siyasi, hərbi və iqtisadi xaos vəziyyətinə gətirdilər. Çünki onların idarəetmə bacarığı və hədəflənmiş bir siyasəti yox idi. Sadəcə hakimiyyətdə bir dəstə poplist yuva salmışdı. Bundan istifadə edən Ermənistan qoşunları ölkənin dərinliklərinə doğru irəlilədilər. Erməni işğaıçılarına atılmalı olan güllələr iyunun 4-də Gəncədə öz əsgər və zabitlərimizə atıldı. Nəticədə batalyon komandiri Mehman Ələkbərov olmaqla 68 nəfər döyüşçü həmin qarşıdurmada öldürüldü.
Azərbaycan xalqının ümid bəslədiyi tək bir nəfər vardı və ayağa qalxaraq Bakıya gəlməsini tələb edirdi. Xalqın təkidli tələbləri ilə hakimiyyətə ikinci dəfə gələn böyük dövlət xadimi Heydər Əliyev ən zəruri tədbirləri həyata keçirərək ilk növbədə vətəndaş qarşıdurmasını dayandırdı. Ermənistanın işğalçı ordusunun hücumlarını isə bir ildən sonra kəsmək mümkün oldu. Çünki hərbi qurumlara yerləşdirilmiş AXC-Müsavat kadrları cəbhədə panika yayır, hərbi vəziyyətin stabilləşməsinə imkan vermirdilər. Böyük strateq Heydər Əliyev bütün lazımi işləri öz sırasında həll edərək üzünü döyüş meydanına çevirdi. 1994-cü ilin mayında Ermənistan məcbur qalaraq atəşkəsə razılıq verdi. Ulu Öndər həmin illərdə Ermənistanın işğalçı siyasətini və Azərbaycanın haqq işini mötəbər faktlarla bütün dünyaya göstədi.
Prezident İlham Əliyev Ermənistanın inadkarlığı ucbatından münaqişənin sülhlə həll edilməyəcəyini bildiyi üçün hərbi sahənin sürətli inkişafını prioritetə çevirdi. Azərbaycan hərbi sahədə Ermənistandan qat-qat artıq səviyyəyə yüksəldildi. Nəhayət, 2020-ilin payızında başlanan II Qarabağ müharibəsində düşmənin başı əzildi, Azərbaycanın şərtləri əsasında kapitulyasiya aktını imzalamalı oldu. Bir çoxlarının inanmadığı “möcüzə” baş verdi. Azərbaycan Ordusu Ermənistanın işğalçı qoşunlarını və hərbi texnikasını darmadağın edərək qovub ərazimizdən çıxardı. O döyüşlərdə Xüsusi Təyinatlı Dəstənin hazırlıqlı döyüşçüləri Şuşanın alındığı əlbəyaxa vuruşmada da erməni quldur dəstələrini məğlubiyyətə uğratdı. Şəhəri qoruyan qarnizondan əsər-əlamət qalmadı. Bu, əlbəttə, kütləvi qəhrəmanlıq idi. Ona görə də hərbi paradda XTQ dəstələri öz komandanlarının və xalqın qarşısından böyük qürur hissi ilə keçdilər.
Vəli İlyasov, “İki sahil”
