“İnstagram” və “Tik Tok” sosial şəbəkələrində həbsdə olan tanınmış meyxanaçı Rəşad Dağlının azadlığa çıxması və onun məclislərdən birində rəqs etməsi ilə bağlı məlumatlar yayılıb, videolar paylaşılıb.
Musavat.com yayılan məlumatları dəqiqləşdirmək üçün meyxanaçının bibisi qızı, jurnalist Könül Aypara ilə əlaqə saxlayıb.
O saytımıza sözügedən xəbərlərin həqiqəti əks etdirmədiyini və videoların köhnə olduğunu dedi:
“Rəşad həbsdədir, azadlığa çıxmayıb. Sosial şəbəkələrdə bəzi səhifələr ip yığmaq məqsədi ilə belə saxta məlumatlar paylaşırlar. Yaxın günlərdə bununla bağlı oğlu açıqlama verəcək. Rəşadın həyatında hansısa dəyişiklik baş verməyib, həbs həyatı davam edir”.
Xatırladaq ki, Rəşad Dağlı 2022-ci il noyabrın 9-da baş verən dəhşətli hadisədən sonra həbs olunub. Meyxanaçı yaşadığı ünvanda qonşusu, 1979-cu il təvəllüdlü İsgəndər Mehdiyevi avtomobilində bıçaqlayaraq qətlə yetirib. Hadisə ölkə ictimaiyyətində böyük rezonans doğurmuşdu.
İstintaqın yekununa görə, Rəşad Dağlıya qarşı Cinayət Məcəlləsinin 120.1-ci (qəsdən adam öldürmə) və 228.4-cü (qanunsuz soyuq silah gəzdirmə) maddələri üzrə ittiham irəli sürülüb.
Məhkəmə prosesi Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilib. Hökmə əsasən, meyxanaçı 9 il 6 ay müddətinə azadlıqdan məhrum edilib.
Hadisədən artıq iki ildən çox vaxt keçsə də, Rəşad Dağlı ilə bağlı yayılan hər yeni xəbər və görüntü ictimaiyyətin diqqətini cəlb etməkdə davam edir. Onun azadlıqdan sonrakı taleyi və sənət fəaliyyətinə qayıdışı barədə müzakirələr isə hələ də gündəmdədir.
Şahanə Rəhimli
Musavat.com
