Məhkəməsi gedən hərbi canilər arasında intihara cəhd edən olub? – hüquqşünaslardan reaksiya
Azərbaycan xalqına qarşı çoxsaylı ağır cinayətlərdə ittiham olunan ermənilərin məhkəməsi davam edir. Artıq prokuror onlara uzunmüddətli həbs cəzaları (ömürlük, 20-15-10 il) tələb edib. Aydındır ki, belə ağır cəzalar hansısa yumurta oğurluğuna görə istənilmir.
Ermənistanda isə bir sıra radikal qüvvələr hələ də sanki “paralel dünyada” yaşayırmışlar kimi, onları axmaqcasına az qala mələk, “əsir” kimi təqdim edirlər. Onlardan biri də üzdəniraq hüquq müdafiəçisi Siranuş Sakyandır.
Bu axçinin iddiasına görə, Beynəlxalq Qırmızı Xaç Komitəsi Azərbaycanda fəaliyyətini dayandırdıqdan sonra (sentyabr, 2025) Bakıdakı ermənilər faktiki tam təcrid durumuna düşüb, çox nadir hallarda onlara ailələri ilə əlaqə saxlamağa şərait yaradılır, hətta aralarında intihara cəhd halları qeydə alınıb. Guya qohumları bu barədə onlarla nadir telefon danışıqları zamanı xəbər tutublar. Harda, nə vaxt, necə intihara cəhd halları olub? Belə şey mümkünmü?
Çingiz Qənizadə
Demokratiya və İnsan Hüquqları Komitəsinin sədri Çingiz Qənizadə “Yeni Müsavat”a bildirdi ki, o cür iddialar erməni həyasızlığının daha bir nümunəsidir və erməni həyasızlığı hələ uzun illər davam edəcək: “Bu cür uydurma söhbətləri ortaya atan ermənilər həm Azərbaycana böhtan atmaq, Azərbaycanı öz aləmlərində dünyada hörmətdən salmaq, həm də özlərini erməni cəmiyyətinin gündəmində diqqətində saxlamaq məqsədi güdürlər. Beynəlxalq Qırmızı Xaç Komitəsi Azərbaycanı tərk etdikdən sonra erməni cinayətkarların hər şeydən guya tam təcrid olunduqları barədə deyilənlər tamamilə yalandır. Azərbaycan Ombudsmanın nümayəndələri həmin ermənilərə mütəmadi baş çəkirlər. Təcridxanadan onların öz ailələri ilə telefonla danışmalarına şərait yaradılır. Məhkəmə zallarına gələrkən o ermənilərin geyimlərinin necə təmiz, səliqəli olduqları görünür. Onlar vəkillərlə, tərcüməçi ilə təmin olunublar, sərbəst könüllü ifadə veriblər. Bir sözlə onlara qarşı heç bir qanunsuz hərəkət, təzyiq filan olmayıb və yoxdur. Belə olduğu halda guya həmin cinayatkar ermənilərin hansınınsa intihara cəhd etdiyi barədə ermənilərin uydurmaları həyasızılığın pik həddidir. Saxlanılan şəxslərdən heç biri intihara cəhd etməyib. Nə təcridxanada, nə məhkəmə prosesində onlara heç bir təzyiq olmayıb. Məhkəmə onların törətdiyi əməllərə görə adekvat cəza verəcək”.
Xəyal Bəşirov
Xəyal Bəşirov isə bildirdi ki, Azərbaycan dövlətinə və xalqına qarşı ağır cinayətlər törətməkdə ittiham olunan 15 erməni ilə bağlı məhkəmə prosesinin böyük bir mərhələsi arxada qalıb və ittihamedici tərəf olaraq prokurorlar həmin şəxslərə Azərbaycan Cinayət Məcəlləsinin 20-dən artıq ağır və xüsusilə ağır maddəsi ilə cəza verilməsini istəyiblər: “Həmin maddələrin hamısında nəzərdə tutulan cinayətləri o şəxslər həyata keçiriblər və özləri məhkəmədə ifadələrində bunları etiraf ediblər. Onların əksəriyyətinin törətdiyi cinayətlər müharibə cinayətidir. Bu cinayət isə ən ağır cəzanı nəzərdə tutur. Həmin 15 erməninin həm ibtidai istintaqı mərhələsində, həm məhkəmə istintaqı mərhələsində qanunvericilikdən kənar heç bir hal baş verməyib. Bütün proses qanunlar çərçivəsində gedib. Eləcə də təcridxanada onlara qarşı qanunun tələbindən kənar heç bir hərəkətə yol verilməyib. Məhkəmələri şəffaf, ədalətli şəkildə keçib. Baxmayaraq ki, həmin şəxslər Azərbaycan xalqına qarşı çox ağır cinayətlər törədiblər, onların törətdikləri cinayətlərdən 500 mindən artıq zərərçəkmiş tərəf var, onlara qarşı qanundan kənar heç bir hərəkətə yol verilmir. Həmin o şəxslərin, eyni zamanda şahidlərin mümkün qədər iştirakı ilə məhkəmə prosesləri həyata keçirilir. Proseslərdə hüquq müdafiəçilərinin, jurnalistlərin iştirakı təmin edilir. Hətta zərərçəkmiş tərəf olan şəxslər onlara işgəncələr vermiş, məhrumiyyətlər yaşatmış, doğmalarını öldürmüş həmin ermənilərə qarşı məhkəmə prosesində sivil münasibət sərgiləyirlər. Azərbaycan bu məsələdə də dünyaya yaxşı bir nümunə qoyur. Həmin ermənilərin tamamilə təcrid olduqları, hətta guya hansınınsa intihar etdiyi barədə iddialar tamamilə cəfəngiyyatdır”.
Hüquqşünas dedi ki, Siranuş Sakyan adlı qondarma erməni hüquq müdafiəçisinin fəaliyyətinə diqqət etdikdə görürük ki, onun hüquqla heç bir əlaqəsi yoxdur: “Bu adam hüquqa xələl gətirən fəaliyyətlə məşğuldur, daşnak mövqeli birisidir. Bu adam normal hüquq müdafiəçisi olsaydı Bakıda məhkəməsi gedən 15 erməninin əsir olmadığını, törətdikləri cinayətlərə görə saxlanıb istintaqa cəlb olunduğunu bir hüquqçu kimi bilməli idi. Azərbaycanın Ermənistandan, azərbaycanlıların ermənilərdən fərqi həm də odur ki, saxlanılan və ya əsir düşən şəxslərə qarşı işgəncə həyata keçirmir. Ermənistan və ermənilər müxtəlif zamanlarda dumanlı havada azıb onlar tərəfə keçmiş azərbaycanlı əsgərləri ələ keçirib işgəncələr verirdilər, dogma kəndlərini ziyarət üçün Kəlbəcərə getmiş Dilqəm Əsgərovu və Şahbaz Quliyevi girov götürüb onlara qarşı amansız işgəncələr vermişdilər və heç bir əsas olmadan onların üzərinə qondarma məhkəmə qurub onları məhkum etmişdilər. Azərbaycanın təcürbəsində isə heç zaman ermənilərə qarşı bu cür amansızlıqlara yol verilməsi olmayıb. Azərbaycan hətta xalqımıza qarşı ən ağır cinayətlər törətmiş haqqında söhbət gedən 15 erməniyə belə qanun müstəvisində davranır və humanist yanaşır. O ermənilər heç zaman saxlandıqları yerdən, onlara münasibətdən şikayət etməyiblər”.
Etibar SEYİDAĞA,
“Yeni Müsavat”
