Son illər Azərbaycanda boşanmaların sayı sürətlə artır. Gənc ailələr hələ həyatın əvvəlindəykən yollarını ayırır. Cəmiyyət isə günahı çox vaxt sosial şəbəkələrdə xüsusən də “TikTok”da görür.
Bəs doğrudan da problem telefondadır, yoxsa bizim görmədiyimiz daha dərin səbəblər var? “TikTok” həqiqətən ailəni dağıda bilərmi?
Məsələ ilə bağlı “Yeni Sabah”a danışan psixoloq Vüsalə Rüstəm artan boşanmaların kökündə yalnız sosial şəbəkələrin dayanmadığını bildirib. Onun sözlərinə görə, “TikTok” çox vaxt “günah keçisi” kimi təqdim olunur, əslində isə problem ailə qurulmadan əvvəl yaranır:
“Boşanmaların sayı sürətlə artır. Sosioloq və psixoloqların hər biri öz münasibətini bildirir, tövsiyyə verir proses yenə də səngimir. Gənc ailələrin hələ yolun başındaykəykən yollarının ayırması təəssüf doğurur, bunun da öz səbəbləri var. Yaxın keçmişdə valideynlər oğlunun və qızının evlənəcəyi adamın nəslini, kökünü öyrənir, adam haqqında səhih məlumat toplayırdılar. İndi isə ilk baxışdan xoşlandığı insana sevdiyini zənn edib evlənmək təklif edirlər. Cütlüklər bir-birinin xarakteri haqda dəqiq məlumatları olmur, kobud səslənsə də, bir-birini aldadırlar. Ailələrin uyğunluğu isə ümumiyyətlə oxşar olmur. Biri sərt, qayda-qanunlu bir evdə, digəri isə özbaşına böyüyür.
Evlilikdən sonra artıq bütün qüsurlar üzə çıxır. Kişi çox mülayim görünüb anlayışla qarşıladığı qadını evə qapadır, zor tətbiq edir, şəxsi əşyalarına (telefonuna) toxunmamaq əmri verir. Bütün azadlığı əlindən alınmış qadın çıxış yolu axtarır və böyük bir boşluğa düşür”.
Psixoloq bildirib ki, belə hallarda qadının sosial şəbəkələrə üz tutması bəziləri tərəfindən “əsas günah” kimi göstərilir, lakin bu, problemin yalnız nəticəsidir:
“Bu zaman o, “TikTok” və başqa sosial şəbəkələrdə müxtəlif insanlarla ünsiyyət qurur, hətta uşaqlarını və ərini ataraq evdən qaçır. Burada insanlar tərəfindən günahkar telefon (sosial şəbəkələr) hesab olunsa da, o, sadəcə ağılsız bir qisim qadının çıxış yoludur. Canını qurtarmağın yolunu bu cür hesab edir. Əgər kişi və ya qadın vaxtında ailəyə hörmətlə yanaşıb zor tətbiq etməsə, normal dialoq qursa, bir çox faciələri öncədən önləmiş olur.
Nə yazıq ki, bu baş vermir. Əvəzində, sevgi hesab etdikləri hisslər ölür, əsl insanın xarakteri üzə çıxır və dözümsüz tərəflərdən biri uzaqlaşmaqla ailəni sonlandırır”.
Ekspert hesab edir ki, ailəni qorumağın yolu qarşılıqlı sevgi və anlayışdan keçir:
“Evliliyi qorumağın yolu qarşılıqlı sevgi və anlayışdır ki, bunun olması üçün isə gərək cütlüklər bir -birini yaxşı tanısın və insanı olduğu kimi sevsin. Evlənənədək xarakterində olan bütün mənfi və müsbət keyfiyyətləri bildirsin. Əks halda, maskalanmış insan evlilikdə özünü büruzə verir və evliliyin sonlanması ilə nəticələnir. Sevən insan səbr edir, sevməyən insan isə olan çətinliyi işgəncə hesab edib qaçır. Ən önəmlisi ailə quracağınız insanı doğru seçin. Uğurlu seçim xoşbəxt ailə, travmasız uşaqlar, normal cəmiyyət deməkdir”.
