Bayram günlərində əsgərlərə məzuniyyət verilib-verilməməsi cəmiyyətdə ən çox maraq doğuran məsələlərdən biridir. Xüsusilə, Yeni il və digər rəsmi bayramlar ərəfəsində hərbi qulluqçuların evlərinə buraxılıb-buraxılmaması ilə bağlı suallar aktuallaşır. Maraqlıdır, bayram günlərində əsgərlərə məzuniyyət verilə bilərmi?
Bu barədə KONKRET.az-a açıqlama verən hərbi ekspert Üzeyir Cəfərov bildirib ki, hərbi qulluqçuların məzuniyyəti “Hərbi xidmət haqqında Əsasnamə” və “Hərbi qulluqçuların statusu haqqında” qanuna uyğun şəkildə həyata keçirilir.
“Zabitlər, gizirlər və müddətdən artıq həqiqi hərbi xidmət keçən şəxslər üçün əsas məzuniyyət qaydaları dəyişməz qalır. Yeganə mühüm yenilik 44 günlük Vətən müharibəsindən sonra qəbul edilən qərarla bağlıdır. Belə ki, Vətən müharibəsi iştirakçısı statusu alan zabitlər, gizirlər və müddətdən artıq xidmət edən hərbi qulluqçular üçün müəyyən şərtlər daxilində 46 günlük məzuniyyətin verilməsi qanunvericilikdə təsbit olunub. Bu mexanizmin 2026-cı ildən etibarən tətbiq ediləcəyi gözlənilir”.
Üzeyir Cəfərov qeyd edib ki, bayram günlərində adətən hərbi hissələrdə gücləndirilmiş xidmət rejimi tətbiq olunur.
“Bu rejim çərçivəsində hərbi hissələrə giriş-çıxış məhdudlaşdırılır və nəzarət tədbirləri sərtləşdirilir. Məqsəd təhlükəsizliyin təmin edilməsi və vəziyyətin tam nəzarətdə saxlanılmasıdır”.
Ekspert vurğulayıb ki, bu, beynəlxalq hərbi təcrübədə də normal hal hesab olunur və hərbi xidmətin tələblərindən irəli gəlir.
“Qanunvericiliyə əsasən, hərbi qulluqçuların illik və digər məzuniyyət növləri komandirlərin nəzarəti altında, əvvəlcədən təsdiqlənmiş qrafik üzrə həyata keçirilir”.
Onun sözlərinə görə, müddətli həqiqi hərbi xidmət keçən əsgərlər də müəyyən qrafik əsasında məzuniyyətə buraxılır və vaxtı bitdikdən sonra xidmət yerlərinə qayıdırlar. Vaxtilə əsgərlərə 20 günlük məzuniyyət verilməsi ilə bağlı təkliflər səslənsə də, hazırda məzuniyyətlər mövcud qanunvericiliyin tələblərinə uyğun şəkildə həyata keçirilir.
“Hərbi xidmətdə hər bir məsələ ciddi nəzarət altındadır və məzuniyyətlər də bu qaydalar çərçivəsində verilir”, – deyə Üzeyir Cəfərov əlavə edib.
