Azərbaycan Milli Elmlər Akademiyasının (AMEA) Rəyasət Heyətinin növbəti iclası keçirilib.
İclasda AMEA-nın prezidenti, akademik İsa Həbibbəyli, Rəyasət Heyətinin üzvləri, aparatın şöbə müdirləri, elmi müəssisə və təşkilatların direktorları, eləcə də AR Mədəniyyət Nazirliyinin və Bakı Yunus Əmrə İnstitutunun nümayəndələri iştirak ediblər.
Bununla belə, akademik Ramiz Mehdiyevin AMEA-dan xaric olunması ilə bağlı məsələ Rəyasət Heyətinin gündəliyinə daxil edilməyib və iclasda müzakirə olunmayıb.
Qeyd edək ki, AMEA-nın mətbuat xidməti fevralın 13-də R.Mehdiyevin akademiyadan çıxarılacağı ilə bağlı məlumat yayıb.
Əməkdar jurnalist, professor Qulu Məhərrəmli Musavat.com-a açıqlamasında bildirib ki, şəxsi akademik adından məhrum etməyin prosedurları var və ona əməl edilməlidir: “Bizim reallıq bir az fərqlidir. Biz əvvəlki təcrübədə görmüşük ki, cinayətdə ittiham olunan adamları akademik adından məhrum edirlər. Ramiz Mehdiyevin şəxsi, əməlləri və çevrəsində baş verən hadisələrlə bağlı çoxlu müəmmalar var. Bunlardan biri də onun hələ də akademik adının qalmasıdır. Onu da qeyd edim ki, o, AMEA-nın müxbir üzvü olmadan birbaşa akademik adını alıb. Lakin heç kim onun xüsusi elmi uğurlarını görməyib. Bu da ayrı bir mövzudur. Azərbaycanda elm elə günə qalıb ki, yaxşı ilə pis seçilmir. Ramiz Mehdiyevin layiq olmadığı akademik adından məhrum edilməsi onun sadalanan cinayətləri müqabilində başının sığallanması kimi bir şeydir. Barəsində çoxlu ittihamlar var. Məsələnin məğzi bundan ibarətdir ki, onun bu ittihamlarla hələ də akademik kimi qalması qəbul edilən deyil.
Əsas məsələ bu adamın və onun əlaltılarının Azərbaycan xalqına, dövlətə qarşı törətdiyi cinayətlərin üstünü ardıcıl şəkildə açıb göstərmək, sistemli ifşa etməkdir”,-deyə professor bildirib.
Şahanə Rəhimli
Musavat.com
