Bayram günləri artıq geridə qalıb. Bayram ərəfəsində bazarlarda müşahidə olunan canlanma və qiymət artımı isə öz yerini nisbətən sakitliyə və müəyyən məhsullar üzrə ucuzlaşmaya verib. Bəs hazırda paytaxt bazarlarında vəziyyət necədir? Qiymətlər əvvəlki səviyyədə qalıb, yoxsa eniş var?
Musavat.com-un əməkdaşı olaraq bazarlarda mövcud qiymətlərlə maraqlandıq və satıcılarla, eləcə də alıcılarla söhbətləşdik.
Müşahidələrimiz göstərdi ki, bayram öncəsi bahalaşan bir sıra məhsulların qiymətində enmə qeydə alınıb. Xüsusilə çərəzlər və bəzi meyvələr üzrə ucuzlaşma daha aydın hiss olunur.
Belə ki, bayram ərəfəsində kilosu 10 manata qədər yüksələn qoz hazırda 6–7 manat aralığında təklif olunur. Fındıq 7–8 manata satılır. Əvvəllər 10–12 manata alıcılara təqdim olunan şabalıdın qiyməti isə indi 8–10 manata düşüb. Qoz ləpəsinin qiyməti 16 manatdan 13 manata enib, fındıq ləpəsi isə 22 manatdan 20 manata qədər ucuzlaşıb. Həmçinin bayram zamanı 10 manata satılan iydə hazırda 8–9 manat civarında təklif edilir.
Meyvə bazarında da oxşar tendensiya müşahidə olunur. Bayramdan əvvəl 1 kiloqramı 3,40 manata satılan banan indi 2,50 manata qədər enib. Əvvəllər 2 manata təklif olunan alma hazırda 1,30–1,50 manat arasında dəyişir. Armudun qiyməti də 3,5 manatdan 2,5 manata düşüb. Apelsin və mandarinin qiyməti 3 manatdan 2 manata düşüb.
Qiymətində ən ciddi eniş qeydə alınan məhsullardan biri isə xiyardır. Bayram ərəfəsində 4 manata satılan xiyar indi 2 manata təklif olunur. Hətta bəzi satış nöqtələrində bu məhsulu 1,50–1,80 manata da tapmaq mümkündür.
Ət məhsullarına gəldikdə isə burada vəziyyət sabit olaraq qalır. Hazırda 1 kiloqram dana əti 17 manatdan, quzu əti isə 21 manatdan satılır. Eyni sabitlik kartof və soğan bazarında da müşahidə edilir. Kartofun kilosu 1 manatdan, Gədəbəy kartofu 1,20 manatdan başlayan qiymətlərlə təklif olunur. Soğanın qiyməti isə təxminən 50 qəpik civarında qalır.
Bununla belə, qiyməti hələ də yüksək olaraq qalan məhsullar da var. Məsələn, pomidorun qiyməti 3,50 – 4 manat səviyyəsində qalmaqda davam edir. Göyərti dəstələri isə 25–30 qəpikdən satılır.
Satıcıların sözlərinə görə, qiymətlərdə müəyyən ucuzlaşma müşahidə edilsə də, bazarda ümumi durğunluq hökm sürür.
Alıcılıq qabiliyyəti əvvəlki dövrlərlə müqayisədə xeyli aşağı düşüb:
“Adətən hər il bayramdan sonra bazarda belə bir sakitlik yaranır. Bu, artıq ənənə halını alıb. Amma bu il durğunluq daha çox hiss olunur. Hətta bəzi satıcılar bayramdan sonra ümumiyyətlə bazara çıxmır, çünki satış zəifdir və xərcləri qarşılamaq çətinləşir”, – deyə satıcılar bildirirlər.
Alıcılar isə xüsusilə pomidorun qiymətindən narazıdırlar. Onların sözlərinə görə, bu məhsul hələ də əlçatmaz olaraq qalır:
“Pomidorun qiyməti həqiqətən çox bahadır. Yaxşı keyfiyyətli pomidorun kilosu 4 manatdan başlayır. Bu qiymətə almaq sərf etmir. Digər məhsulların qiymətini isə normal hesab etmək olar, amma pomidor hələ də “əl yandırır’”, – deyə alıcılardan biri qeyd etdi.
Xalidə Gəray,
Fotolar müəllifindir,
Musavat.com
