Xəyanətin başqa adı – rüşvət…
Prezident İlham Əliyev hələ beş il öncə məmurlara xəbərdar edərək demişdi: “Əgər rüşvətxorluq, korrupsiya, yoxlamalar, lisenziyalar, haqqoyma olmasaydı, görün, büdcəmiz nə qədər arta bilərdi?! Buna nə qədər dözmək olar?! Artıq qurtardı, yəni, hövsələ tükənib. Hər kəs nəticə çıxarsın. Nəticə çıxarmasa, cəzalandırılacaq.”
Göründüyü kimi, ölkə başçısı məmurların cəzalandırılacağını açıq mətnlə bəyan etməklə yanaşı, hüquq-mühafizə orqanlarına ciddi tapşırıq vermişdi. Birmənalı şəkildə qeyd etmək olar ki, rüşvət və korrupsiya Azərbaycana Qarabağın işğalı qədər, hətta ondan böyük maddi və mənəvi zərərlər vurub. Çünki rüşvətxor məmur ilk növbədə öz şəxsi maraqlarını dövlətin maraqlarından üstün tutur və sadə insanların vətənpərvərlik duyğularını, dövlətə inamını sarsıdır. Azərbaycanın bugününü düşünən böyük dövlət xadimi Heydər Əliyev öz hakimiyyəti dönəmində məhz rüşvətxor dövlət məmurlarını nəzərdə tutaraq belə fikir söylmişdi: “Rüşvətxor bazarda piştaxta arxasında əyləşib pul qazanmır, o dövlətin maraqlarını satır…”
Artıq təkzibolunmaz faktdır ki, bu gün rüşvətxorluq və korrupsiya hallarına dünyanın hər yerində rast gəlmək olar. Son vaxtlar Azərbaycanda korrupsiya və rüşvət faktlarına görə bir neçə rayonun icra başçılarının, digər vəzifəli şəxslərin həbs olunması sübut edir ki, dövlətimiz cəmiyyəti içindən parçalayıb dağıtmağa xidmət edən bu iyrənc sosial bəlanın kökünü kəsməkdə israrlıdır və ölkə Prezidenti cənab İlham Əliyev bu biabırçı hallara son qoymaq üçün güclü siyasi iradə və qətiyyət nümayiş etdirir. Rəsmi məlumatlarda, eləcə də vətəndaşların müraciətlərində rüşvət faktlarından dolayı ayrı-ayrı adamlara məxsus torpaq sahələrinin bu və ya digər rayonun icra hakimiyyətinin başçısı tərəfindən zəbt olunması da qeyd olunur. Biznes aləmində hər hansı güc və səlahiyyət sahibi tərəfindən vətəndaşın, şirkət sahibi və ya mülküyyətçinin iradəsini nəzərə almadan faktiki olaraq ona məxsuas əmlakı ələ keçirilməsi reyderçilikdir. Reyder – qəsbetmə mexanizmidir (ingiliscə “raider ” basqın edib ələ keçirmək deməkdir). XX əsrin əvvəllərində ABŞ-da Rokfeller ailəsi bu qəsbetmə mexanizmindən yararlanaraq nəinki milyader olmuş, hətta bu ailə və onlara yaxın adamlar müxtəlif vaxtlarda ABŞ-da dövlət katibi, ticarət naziri, müdafiə naziri və bir neçə ştatın qubernatoru olmuş, MKİ – də, Senatda və ABŞ Konqresinin Nümayəndələr Palatasında nüfuzlu vəzifələr tutmuşlar…
Azərbaycanda sahibkarlığın inkişafına mane olan bu cür faktlara dövlət başçısı İlham Əliyev çıxışlarının birində belə münasibət bildirmişdir: “Bəzi hallarda reketlik edilib. Ona heç rüşvət də demək olmaz. Rüşvət o vaxt verilir ki, kimsə nə isə etmək istəyir, işi asanlıqla getsin deyə rüşvət verir…”
Faktlar göstərir ki, korrupsiya ilə rüşvətin ləğvi təkcə və yalnız dövlətin idarəçilik mexanizmindən asılı deyil. Ölkədə korrupsiya və rüşvətxorluğa qarşı mübarizənin effektivliyinin təmin edilməsi şərtlərindən biri də bu mübarizədə hökumət-vətəndaş əməkdaşlığıdır. Amma əfsuslar olsun ki, bu gün dövlət məmurlarının əməllərini görüb susan vətandaşlarımız da az deyil.
Dövlətimizin başçısı İlham Əliyev ölkə televiziyalarına verdiyi müsahibədə bəzi icra hakimiyyətləri başçılarının həbsi ilə bağlı sualı cavablandırarkən demişdir: “Biz ölkəmizdəki vəziyyəti daha da sağlamlaşdırmalıyıq və xoşagəlməz hallara qarşı mübarizə bundan sonra da aparılacaq. Eyni zamanda, həm mətbuatdan, həm ictimaiyyətdən mən həm dəstək görürəm, həm də ki, onlar mənə bu işdə kömək edirlər.”
Azərbaycanda bu sosial bəlanın qarşısını almaq məqsədi ilə qurulmuş mübarizə strategiyasını güc strukturları, xüsusilə son vaxtlar Dövlət Təhlükəsizliyi Xidməti həyata keçirir… Bu dövlət qurumunun keçirdiyi əməliyyat nəticəsində vəzifəli şəxslər tərəfindən xüsusi karantin rejiminin tətbiqi ilə əlaqədar maddi yardıma ehtiyacı olan şəxslərə sosial yardım üçün ayrılan vəsaitin mənimsəməsi faktları aşkara çıxarılmışdır. Prezident İlham Əliyev dövlət tərəfindən ayrılmış ərzaq yardımlarının mənimsənilməsi faktlarına münasibət bildirərkən demişdir: “Kasıbın malına, ərzaq payına göz dikən xaindir, bunun başqa adı yoxdur… Bu, adi cinayətdirmi? Yox. Bu, xəyanətdir. Bunun başqa adı yoxdur. İndiki şəraitdə də bunu davam etdirirlər. Bu adamlarda vicdan deyilən şey yoxdur, vicdanı tam itiriblər. Biz belə ünsürlərə qarşı bundan sonra da amansız mübarizə aparacağıq”
Nurəddin Muğanlı, “İki sahil”
