Bakının Binəqədi rayonu, Biləcəri qəsəbəsi, Asəf Zeynallı 31 ünvanında yerləşən beşmərtəbəli yaşayış binasının sakinləri böyük çətinliklərlə üzləşiblər.
Bu barədə bina sakinləri BAKU.WS-in qaynar xəttinə şikayətlərində bildiriblər. Vurğulanır ki, binanın zirzəmisini su basıb. Qış vaxtı olmasına baxmayaraq, bloklar, mənzillər ağcaqanad və digər həşəratlarla dolub. Üfunət iyindən dayanmaq mümkün deyil. Ən təhlükəli vəziyyət isə binada dağıntıların baş verməsidir. Mənzillərin çoxunun eyvanında uçqun baş verib.
Binəqədi rayon İcra Hakimiyyətindən BAKU.WS-ə verilən məlumata görə, həmin bina xüsusi təyinatlıdır. Bu səbəbdən yaşayış binası 2 saylı xüsusi təyinatlı MKTB-nin 113 saylı mənzil-kommunal istismar sahəsinin balansındadır.
“Onların problemi ilə birbaşa olaraq 113 saylı mənzil-kommunal istismar sahəsi məşğul olmalıdır”, – deyə qurumdan bildirildi.
2 saylı xüsusi təyinatlı MKTB-nin 113 saylı mənzil-kommunal istismar sahəsinin sədri Məhəmməd Qasımov bildirdi ki, həmin bina onların balansında deyil.
“Bu binalar Bakı şəhər İcra Hakimiyyətinin balansındadır. Qurumun balansında 11 minə yaxın bina var. Binaların 80 faizi istismar müddətini başa vurub. Hər il 500-ə yaxın binanın dam örtüyü təmir edilir. Bu işlər əsaslı ardıcıllıq əsasında həyata keçirilir. Natəvan 1, Q. Süleymanov 9 , N.Həşimli 7 ünvanlarında yerləşən binalar əsaslı təmir edildi. İşlər sıralama qaydası ilə həyata keçirilir. Bu il də Asəf Zeynallı küçəsi 31 ünvanında yerləşən bina təmir ediləcək”.
Qeyd edək ki, bu problemdən təkcə Asəf Zeynallı küçəsi 31 ünvanında yerləşən binanın sakinləri deyil, paytaxtdakı bir çox tikililərində yaşayan vətəndaşlar da əziyyət çəkirlər. Ekspertlərin fikrincə hazırda Bakı şəhərində “Xruşovka”ların çoxu istismar müddətini bitirmiş və istismara yararsızdır. Bəziləri isə istismar müddətini bitirsə də, hələlik onlardan istifadə etmək mümkündür. Memarlıq Bürosunun əməkdaşı Çingiz Ağarzayev bildirdi ki, Sovet dövründə tikilən yaşayış binalarının (“Xruşovka”) ömrü 50 il nəzərdə tutulur.
“Bu binaların sökülüb, yerində yeni bina tikilməsi isə müəyyən proses keçməlidir. Həmin binalara Fövqəladə Hallar Nazirliyinin (FHN) əməkdaşları baxış keçirməlidir. Baxışdan sonra tikiliyə qəzalı olub-olmaması barədə rəy verilməlidir. Bu rəydən sonra aidiyyəti quruma məlumat verilməlidir və binanın sökülməsi barədə qərar çıxarılmalıdır. Söküntüdən sonra binanın yerində relyefə və normalara uyğun tikinti aparılmalıdır. Azərbaycan standartlarının normaları var. Bir hektara dörd min kvadrat metr düşür. Bu bölgənin sıxlığından asılı olur”, – deyə ekspert bildirib.
Çingiz Ağarzayevin sözlərinə görə, Bakıda elə binalar var ki, FHN rəy bildirib, lakin hələ də sökülməyib.
Bakı şəhər İcra Hakimiyyətindən isə BAKU.WS-ə bildirilib ki, 2019-cu ildə FHN-nin müəyyə etdiyi və Nazirlər Kabinetinə təqdim etdiyi istismara yararsız olan qəzalı binaların sayı 17-dir.
“Bu 17 binanın çoxu Sabunçu rayonu ərazisindədir. Bundan başqa, Xətai, Səbail, Nərimanov, Yasamal rayonu ərazilərində də belə binalar var. 2020-ci ildə koronavirus pandemiyası ilə bağlı hələlik qeydiyyat olmayıb. Söküntü işləri həyata keçiriləcək. Söküləcək bina hansı rayondadırsa, onun söküntüsü və tikintisi həmin rayon icra hakimiyyətinə tapşırılır. Elə bina var ki, istismar müddəti bitsə də, onun vəziyyəti yaxşıdır. Lakin vaxtından əvvəl istismara yararsız vəziyyətə düşən tikililər də var”, – qurumdan bildirilir.
