Yanvarın 18-dən Azərbaycanda COVID-19 infeksiyasına qarşı vaksinasiyaya start verilib. Vaksinlə bağlı qəbul edilən strategiyaya əsasən, peyvənd ilk növbədə yüksək risk qrupuna aid olan tibb işçilərinə vurulur.
Təəssüflər olsun ki, vaksinasiya ilə bağlı cəmiyyətdə yanlış təbliğat kampaniyası aparılır. Sosial şəbəkələrdə bu mövzuda əsassız videolar, fotolar paylaşılaraq ictimai rəyə mənfi təsir etmək istəyirlər. Bu səbəbdən də, insanlar peyvəndlənmədən ehtiyat etməyə başlayıb.
Bəs vaksinasiya haqqında nələri bilməliyik?
“Vaksin yoluxmanın qarşısına almaq üçün həll yolu deyil, həll yolu vaksinasiyadır. Vaksinasiya geniş, əhatəli bir prosesdir. Hər kəsin iştirakı vacibdir. Yoluxma zənciri bununla qırıla bilər. Vaksinasiya bütün dünyanın pandemiyanın ilk günlərindən gözlədiyi bir proses idi.”
Bu fikirləri “İki sahil”ə açıqlamasında “Sağlamlığa Xidmət” İctimai Birliyinin İcraçı direktoru Pərvanə Vəliyeva söyləyib.
Ekspert qeyd edib ki, ölkəmizdə də ilk olaraq tibb işçiləri COVID-19 əleyhinə peyvənd olunurlar: “Xəstəliyi artıq keçirən şəxslərə peyvənd edilmir, çünki onların qanında artıq anticisimlər yaranıb və onları yenidən xəstələnmədən təbii şəkildə qoruyur. Peyvənd vurulacaq şəxs həmin an tam sağlam olmalıdır. Qızdırma, hər hansı respirator xəstəlik olmamalıdır. Belə olduğu halda, peyvəndi keyfiyyətli vaksin hesab edə bilərik. Bununla yanaşı, həm şəxslər peyvənddən sonra heç bir mənfi reaksiya ilə üzləşməzlər. Hamilə qadınlara, 16 yaşdan aşağı uşaqlara, süd verən analara peyvənd vurulmayacaq. Ciddi allergik reaksiyalar verən şəxslərə vaksin vurulmamalıdır.”
P.Vəliyeva vurğulayıb ki, hazırda hər ölkə əhalisinin 20 %-ni vaksinasiya edir: “Çin istehsalı olan Sinovak şirkətinin Koronovak vaksini inaktiv olduğu üçün dünya ölkələri tərəfindən etibarlı hesab edilir, həm də daha çox sınağı aparılıb. Belə ki, aprel ayından kliniki sınaqlarına başlanan Koronovakla müqayisədə digər peyvəndlər bir qədər gec aşkarlanıb. Vaksin elmin məhsuludur və təsiri sübut olunmuş ən uğurlu profilaktika üsuludur. Azərbaycanda da əksəriyyət tibb işçiləri peyvənd alıblar. İkinci mərhələdə digər şəxslərin də peyvənd olunması gözlənilir. Vaksin vurulan 65 yaş üzəri insanlar arasında virusa yoluxma ilə vurulmayan insanlar arasında yoluxma səviyyəsi müqayisə olunur. Ümumi ölkədə vaksin vurulan əhali qrupu ilə vurulmayan əhali qruplarının virusa yoluxma səviyyəsi müqayisə olunur. Yoluxan şəxslər və vaksin vurulan şəxslər qeydiyyata alınır. Təbii ki tədqiqat nəticəsini müəyyən vaxtdan sonra bilmək mümkün olacaq. Xalqımız şanslıdır ki, Azərbaycan dövləti COVAX təsisatına qoşulmaqla vaksini ilk əldə edən ölkələrdən oldu. Digər kasıb və orta gəlirli ölkələr daha sonrakı mərhələdə vaksinasiyadan yararlana biləcəklər. Tövsiyə edərdim ki, vaksindən qorxmasınlar. İndiyədək milyonlarla insana peyvənd edilir. Hələ peyvənddən əmək qabiliyyətini itirən və ya dünyasını dəyişən insan olmayıb.”
