Bu kommunal xidmətlərin və ictimai nəqliyyatda gediş haqqının qiyməti də qaldırıla bilər – AÇIQLAMA
Tarif Şurasının qərarı ilə fevralın 1-dən Azərbaycanda suyun qiyməti iki dəfə bahalaşıb. Belə ki, Bakı, Sumqayıt, Xırdalan şəhərləri və Abşeron rayonu üçün suyun qiyməti 35 qəpikdən qaldırılaraq 70 qəpik, digər inzibati ərazi vahidləri üzrə 60 qəpik, tullantı sularının axıdılması xidmətinin tarifi isə ölkə üzrə bir kubmetr üçün 30 qəpik səviyyəsində təsdiq olunub. Tarif dəyişikliyinin aylıq istehlak səbətinə 2,50 manat, bir abonentin aylıq xərcinə isə təxminən 5 manat təsir edəcəyi proqnozlaşdırılır. Qeyd edək ki, su təchizatının tarifi bundan əvvəl ƏDV daxil olmaqla, əhali üzrə Bakı, Sumqayıt, Xırdalan şəhərləri və Abşeron rayonu üçün 35 qəpik, digər inzibati ərazi vahidləri üzrə 30 qəpik, qeyri-əhali üzrə əvvəlki səviyyədə – 1 kub metr üçün 1 manat, sudan xammal kimi istifadə edənlər üçün isə suyun istifadə təyinatından asılı olmayaraq (tullantı sularının axıdılması xidmətləri də daxil olmaqla) bir kub metr üçün 8 manat olub. Sudan sonra Azərbaycanda qazın, işığın və ictimai nəqliyyatın qiyməti də bahalaşacaqmı?
ARANTV.AZ xəbər verir ki, Sonxeber.az-ın sualını şərh edən iqtisadçı-ekspert Rəşad Həsənov söyləyib ki, artıq belə bir şüphə yaranıb ki, bu qurumların qiymət artımlarında əsas faktor Azərbaycan İnvestisiya Holdinqidir:
“Çünki bu qurumların hər biri Azərbaycan İnvestisiya Holdinqinin tərkibindədir. Bilirsiniz ki,bezinin və dizelinin qiyməti artırıldı. Yanacaqdan sonra da ölkədə suyun qiyməti 100 faiz bahalaşdı. Əslində bu qurumlar Azərbaycan İnvestisiya Holdinqin tərkibinə verilibdir. Azərbaycan İnvestisiya Holdinqi bu qurumlarıın maliyyə-təsərrüfatı fəaliyyətini, gəlirlərini, xərclərini, mənfəətliyinin təmin edilməsini, maliyyə vəziyyətinin sağlamlaşdırılmasını həyata keçirən və buna cavabdeh qurumdur. Artıq yenicə fəaliyyətə başlayan qurumun tərkibində olan iki müəssisənin xidmətlərinin və əmtəələrinin qiyməti artırılırsa, elə bir fikir məndə formalaşır ki, bu təkliflər Azərbaycan İnvestisiya Holdinqindən gəlir”.
Rəşad Həsənov vurğulayıb ki, bu təklilər həqiqətən Azərbaycan İnvestisiya Holdinqindən gəlirsə, bu o deməkdir ki, dolaysı ilə növbəti mərhələdə “Bakı Metropoliteni” QSC-nin, “Azərişıq” ASC-nin, “Azərenerji” ASC, “Azəristiliktəchizat” ASC-nin, eləcə də telekommunikasiya xidmətlərinin artırılması gözlənilir:
“Yəqin ki, kütləvi şəkildə sərnişin daşıyan avtobuslarda, dəmiyolunda qiymət artımları gözlənilir. Əgər bu proses uzun müddət davam edərsə, AZAL-ın ölkə daxilində həyata keçirdiyi Naxçıvan uçuşunda biletlərin qiymətində də artım ola bilər. Düşünürəm ki, bu qiymət artımı bütün sahələri əhatə edəcək. Sadaladığım bu sahələrin hər birində hər an qiymət artımı ola bilər”.
