Prezident İlham Əliyev hər kəsə öz yerini göstərdi

Ölkə başçısının xəbərdarlığı vəzifədə olanlara ciddi mesajdır

Məlum olduğu kimi, Prezident İlham Əliyev tərəfindən başladılan və xalqımız tərəfindən rəğbətlə qarşılanan geniş hüquqi, institusional və kadr islahatlarının başlıca məqsədi inkişafımıza mane olan halları aradan qaldırmaq, dövlət idarəçiliyini daha şəffaf, səmərəli və çevik etməkdir. İslahatların aparıldığı başlıca sahələrdən biri korrupsiyaya qarşı mübarizə, vətəndaş-məmur münasibətlərini daha sağlam əsaslar üzərində qurmaq və vətəndaş məmnunluğuna nail olmaqdır. Bu sahədə atılan addımlar, müvafiq dövlət qurumlarının həyata keçirdiyi tədbirlər bəyənilir. Azərbaycan dövləti əhalisinin rifahı, firavan yaşaması, xoş gələcəyi üçün çox işlər görür, məqsədyönlü siyasət həyata keçirir. Dövlət istəyir ki, idarəçiliyə cəlb etdiyi insanlar əhali ilə normal rəftar etsin, onlara həvalə edilən işləri Konstitusiya çərçivəsində görsün. Ölkəmizin rəhbərinin gördüyü işlər nəinki hər bir kəs üçün, eləcə də bütün dünya üçün bir örnək, nümunədir.

Bu gün Azərbaycan xalqının dövlət başçısından razılığı şübhəsizdir. Amma sirr deyil ki, bəzi məmurlarla əhali arasında ciddi problem yaşanır. Müəyyən mövqe tutan məmurlar var ki, nə özləri, nə də övladları xalqa hörmət etmək istəmir. Onlar tutduqları vəzifədən sui-istifadə edərək insanların haqqını tapdalayır, ən kiçik problemlərinin belə həllinə çalışmırlar. Bu gün Azərbaycanda dövlət səviyyəsində məmur özbaşınalığına qarşı böyük mübarizə həyata keçirilir. Bu siyasət əhalinin narazı qaldığı məmurların islah olunmasına yönəlib. Azərbaycan dövlətinin başçısı İlham Əliyev dəfələrlə səslənib ki, dövlət məmurlarının məsuliyyəti artmalıdır, onlar cəmiyyətdə hər bir vətəndaş üçün nümunə olmalıdır. Təvazökarlıq, saflıq və vətənə xidmət nümunəsi. Dövlət məmurunun peşəkarlığı və mənəvi keyfiyyətləri yüksək səviyyədə olmalıdır. Məmur-vətəndaş münasibətləri hörmət əsasında qurulmalıdır.

Bugünlərdə Prezident İlham Əliyev Azərbaycan Televiziyasına müsahibəsində bir sıra vacib məsələlərə toxunub. Bəzi məmurları sərt tənqid edib. Ölkə rəhbəri müsahibəsində bildirib ki, cəmi 300 hektarlıq ərazidə və qala üzərində zirvədə yerləşən Şuşada aidiyyəti olmayan qurumlar regional şöbə açmaq istəyir. Həmin qurumların rəhbərləri dövlət başçısına müraciət edərək Qarabağ üçün regional mərkəzi məhz Şuşada açmaq istədiklərini bildiriblər. Dövlət başçısının buna reaksiyası çox sərt olub: “Mən Şuşanı mədəniyyət paytaxtı elan etmişəm, məmurlar paytaxtı elan etməmişəm! Ona görə hər kəs otursun yerində, öz işi ilə məşğul olsun, məni də əsəbləşdirməsin. Şuşanın ərazisinin ölçüsü 300 hektardır. Mən qoymamışam ki, bir dənə daş daş üstə qoyulsun. Çünki birinci təhlil aparmalıyıq. Ondan sonra o tarixi binaları bərpa etməliyik, necə bərpa etməliyik, bunu mən də deyə bilmərəm, mütəxəssislər deməlidir, biz indi cəlb etmişik”.

Bu işlərlə indi artıq müxtəlif yerli və xarici şirkətlərin məşğul olduğunu diqqətə çatdıran dövlətimizin başçısı deyib: “Şuşada biz ancaq və ancaq tarixi binaları bərpa etməliyik, mən belə hesab edirəm. Ondan sonra “xruşşovkalar”la bağlı, – indi qabaqlamaq istəmirəm, – mənim fikrim var ki, onların bir çoxu oradan yığışdırılmalıdır. Onların yerində yəqin ki, müasir 4-5 mərtəbəli yaşayış binaları tikilməlidir. Ancaq bununla bağlı mən sadəcə olaraq öz fikirlərimi bölüşürəm. Amma necə olacaq, onu mütəxəssislər, memarlar, tarixçilər, şuşalılar özləri deyəcəklər ki, bu şəhəri necə görmək istəyirlər, çünki bu, onların şəhəridir. Yoxsa, bütün bunlar, bu işlər kənarda qala-qala biri durur ki, mən filial açıram, biri deyir ki, mən zastava açıram, biri deyir ki, mən fövqəladə hallar açıram. Vallah, adam söz tapmır. Mən söz tapmışam, onlara elə söz demişəm ki, onlar o sözü unutmayacaqlar”.

Prezidentin çıxışlarına diqqət edəndə görərik ki, məmurlar, nazirlər qarşısında şəffaflıq, özbaşınalığa yol verməmək və xalqa xidmət kimi məsuliyyətli tələblər qoyulub və dövlət rəhbəri özü şəxsən ölkədə baş verən prosesləri diqqətlə izləyir və bu proseslərdən nəticə çıxarır. Birinci şəxs hansı məmurun nə işlə məşğul olmasından 100 faiz xəbərdardır. Dövlət başçısı görülən işlərlə yaxından tanış olur, problemlərdən anındaca xəbər tutur və nöqsanların təkrarlanmaması üçün ciddi addımlar atır. Vəzifə səlahiyyətindən sui-istifadə İlham Əliyevin bağışlamadığı səhvdir. Prezident çıxışlarında dəfələrlə bəyan edib ki, Azərbaycanda özbaşınalıq, korrupsiya və rüşvətxorluğa yer olmamalıdır. Ölkə rəhbərli nazirlərlə keçirdiyi bütün müşavirələrdə onları təmiz işləməyə səsləyir. Bildirir ki, hər bir dövlət məmuru təmiz işləməlidir, xalqla bir yerdə olmalıdır, təvazökar, işgüzar və vətənpərvər olmalıdır, rüşvət almamalıdır, özünü xalqdan üstün tutmamalıdır, işlədiyi bölgələrdə, sahələrdə hörmət qazanmalıdır və Vətənə sadiq, sədaqətli olmalıdır. Bax, budur əsas prinsiplər.