Xocalı soyqırımının ildönümündə şəhidlərimizi fəxarət hissi və Qələbə duyğusu ilə yad edəcəyik ŞƏRH
Əsli Kazımova: Bu il hüznlə bərabər qəlbimizdəki o ağrını dindirəcək bir Zəfər sevinci də var
“Xocalı soyqrımı kimi azərbaycanlılara divan tutulan cinayətlər erməni siyasətinin əsasını təşkil edir! Xocalı soyqrımı ermənilərin bəşəriyyətə qarşı cinayət əməlidir. 26 fevral 2021 ci il tarixində Xocalı soyqrımının 29-cu ildönümünü dərin hüznlə anacağıq. Amma bu dəfə dərin hüznlə bərabər qəlbimizdəki o ağrını dindirəcək bir Zəfər sevinci də var. Çünki əli yalın qocalarımızı, uşaqlarımızı amansızlıqla qətlə yetirən erməni vandallarını Ali Baş komandan İlham Əliyevin rəhbərlik etdiyi Azərbaycanın müzəffər Ordusu cəzalandırmağa müvəffəq olmuşdur. Bu dəfə Xocalı soyqırımının ildönümü zamanı ilk dəfə olaraq, Şəhidlərimizi utanc hissi ilə deyil, fəxarət hissi və Qələbə duyğusu ilə ziyarət edəcəyik.”
Bunu “İki sahil”ə açıqlamasında Azərbaycan Sosial Rifah Partiyasının sədri Əsli Kazımova deyib.
Ə.Kazımova qeyd edib ki, Azərbaycan Respublikasının Prezidenti cənab İlham Əliyevin rəhbərliyi və uzaqgörən siyasəti sayəsində Azərbaycan regionda sabitliyin təmin olunması baxımında böyük nailiyyətlərə imza atmaqla yanaşı, Dağlıq Qarabağı beynəlxalq maraqların kəsişdiyi bir iqtisadi platformaya çevirməyə müvəfəq olmuşdur: “Bu həmlə, əslində Azərbaycan həqiqətlərinin dünyaya çatdırılması baxımından olduqca effektli bir mərhələnin başlanğıcı kimi qiymətləndirilməlidir. Hesab edirəm ki, hər il Xocalı soyqrımının ildönümündə, bu, bizə birmənalı olaraq ermənilərin yalan və böhtan maşınına qarşı media savaşının aparılmasının vacibliyini, eyni zamanda beynəlxalq təşkilatların Xocalı soyqrımını törədən erməni vandallarını açıq aşkar müdafiə etmələrini xatırlatmalıdır.”
Həmsöhbətimiz əlavə edib ki, Xocalı faciəsi dünya tarixində dinc əhalinin kütləvi qətliamı kimi dərin iz qoymuş Xatın, Holokost, Sonqmi, Lidiçe, Babi Yar, Ruanda və Serebrenitsa kimi soyqırımları ilə ikili standarartlar tətbiq olunmadan anılmalıdır: “Amma nədənsə, bir sıra Qərb dairələri və beynəlxalq təşkilatlar erməni vandallarına qarşı Xocalı soyqrımı ilə bağlı heç bir qəti addım atmayıb. Beynəlxalq hüquq qaydalarını yetərli obyektivlik sərgiləməyərək pozan beynəlxalq təşkilatlar tribunala verilməlidir. Xocalı soyqrımı ilə bağlı ikili standartlar tətbiq edən xarici dairələr bununla da erməni vandalları ilə cinayət ortağı olduqlarını sübut edirlər. Hesab edirəm ki, işğaldan azad edilən ərazilərimizə erməni işğalçıları tərəfindən vurulan zərərlərin hesablanması başa çatdıqdan sonra, Xocalı soyqrımı kimi vandalizmi həyata keçirdiklərinə görə də onlara qarşı təzminat davası açılmalıdir”.
