COVID-19 pandemiyası ilə bağlı Azərbaycanda tətbiq olunan xüsusi rejim yumşaldılsa da, bəzi qadağalar hələ də qüvvədədir. Bu, insanların bəzi hallarda narazılığına səbəb olur. Bunların içərisində idman zallarının və iri ticarət məkəzlərinin – “Mall”ların işləməməsi daha çox müzakirə olunur, müxtəlif təkliflər irəli sürülür.
Qardaş Türkiyədə pandemiya şəraitində iri ticarət mərkəzlərinin işləməsinin maraqlı mexanizmini tapıblar.
ARANTV.AZ xəbər verir ki, Bakupost saytının əməkdaşı Ankaradakı “Mall”lardan birində çəkdiyi kadrlardan görünür ki, müştərilər nəzarətçilərin ciddi yoxlanışından sonra içəri buraxılır.
Qaydaya görə “Mall”larda yoluxma riskini azaltmaq üçün hər bir kəsdən koronavirus test şifrəsi tələb olunur. Belə ki, ticarət mərkəzlərinə daxil olarkən insanlar testin kodunu ekrana yaxınlaşdırır və ondan sonra içəri buraxılır. Koronavirus olan şəxsdə bu kod olmur və beləliklə, xəstə olan şəxs içəri keçə bilmir.
Bu sistemin tətbiqi həm insanların testdən keçməsini təşviq edir, həm də “Mall”lar fəaliyyət göstərir.
Eyni üsuldan Azərbaycanda da istifadə etmək olar. Amma bu şərtlə ki, gərək, testin qiyməti də Türkiyədəki kimi ucuz olsun.
