15 yaşlı jurnalın baş redaktoru: “Döyüşdə qazandığımız Qələbəni informasiya məkanında möhkəmləndirməliyik”

Azərbaycanda nəşr olunan REGİON PLUS jurnalının 15 yaşı tamam olur.

Jurnal 2006-cı ildən peşəkar jurnalistlər tərəfindən nəşr olunur. Həmin il fevralın 17-də jurnal rəsmi dövlət qeydiyyatına alınıb, fevralın 21-də isə ilk sayı çapdan çıxıb.

Oxu.Az REGİON PLUS jurnalın baş redaktoru Namiq Mayilov ilə söhbətləşib.

O bildirib ki, jurnal Azərbaycan və dünya gündəminin aktual ictimai-siyasi və sosial-iqtisadi proseslərinin təhlilində, mədəniyyət və idman hadisələrinin işıqlandırılmasında ixtisaslaşıb:

“Nəşrin səhifələrində yerli və xarici jurnalistlər, millət vəkilləri, politoloqlar, iqtisadçılar, sənətşünaslar və idman icmalçılarının yazıları dərc edilir. Nəşrimiz həmçinin dövlət və hökumət rəsmləri, siyasi və iqtisadi ekspertlərlə müsahibələrə geniş yer ayırır.

Əlbəttə, 15 illik yubiley bizim üçün əlamətdar gün olmaqla yanaşı, həm də keçdiyimiz yola nəzər salıb, özümüz-özümüzə və oxucumuza hesabat vermək fürsətidir. Yola başlayanda qarşıya qoyduğumuz əsas vəzifə Azərbaycanın apardığı informasiya savaşına öz töhfəmizi vermək, ölkəmiz barədə həqiqətləri dünyaya çatdırmaqdan ibarət idi.

Jurnalı ilk növbədə rus dilində çap etməyimizin səbəbi də məhz bu idi. Lakin biz bununla kifayətlənmədik və tezliklə REGİON PLUS rus və azərbaycan dilləri ilə yanaşı ingilis dilində də nəşr olunmağa başladı.

Jurnalın abunəçiləri sırasında dövlət qurumları, özəl şirkətlər, qeyri-hökumət təşkilatları, diplomatik nümayəndəliklər, siyasi xadimlər və iqtisadçılar, elmi araşdırmaçılar var. REGİON PLUS jurnalı abunə, pərakəndə satış və VİP-çatdırılma vasitəsilə, eləcədə AZAL aviaşirkətinin beynəlxalq reyslərində, “ASAN Xidmət” mərkəzlərində və Bakı şəhərinin iri biznes mərkəzlərində yayılır”.

N.Mayılov qeyd edib ki, onlar üçün media bazarında yer etmək elə də çətin olmayıb:
“Birincisi, ona görə ki, ölkəmizdə analitik nəşrlərin sayı çox azdır. İkincisi isə, bazarda məhz üç dildə və ayda iki dəfə, sonradan isə artıq həftədə bir dəfə işıq üzü görən ikinci belə jurnal yox idi. Səhv etmirəmsə, elə indi də yoxdur. Lakin REGİON PLUS-a tələbatı şərtləndirən əsas amil bu deyildi.

Apardığımız araşdırmalar, abunəçilərlə söhbətlər göstərir ki, bizi daha çox yerli və xarici diplomatlar, siyasət və iş adamları, alimlər, araşdırmaçılar oxuyur. Onlar jurnaldakı təhlillərdən gündəlik fəaliyyətlərində faydalanırlar. Əgər diplomatlarımızı, siyasətçilərimizi, araşdırmaçılarımızı təhlillərimizlə “silahlandıra” biliriksə, deməli doğru yoldayıq”.

“Çox şadıq ki, 15 illik yubileyimiz Vətən Müharibəsindəki böyük qələbəmizdən sonraya təsadüf edir. Qürurluyuq ki, Azərbaycanın zəfər yürüşünü təhlil etmək bizim də qismətimiz oldu. İkiqat sevindiricidir ki, bu illər ərzində qabartdığımız istər Ermənistanın tarixi saxtakarlıqları, istər erməni faşizmi mövzularında apardığımız araşdırmalar da öz bəhrəsini verdi.

Mətbuat səhifələrində, sosial şəbəkələrdə vaxtilə üzə çıxardığımız fotofaktlardan, hazırladığımız infoqrafikalardan və yazdığımız məqalələrdən istifadə olunduğunu görəndə illəri boşa vermədiyimizi anlayır və qürurlanırdıq. Lakin bu gün onu da bilirik ki, döyüş meydanında əldə etdiyimiz Qələbəni informasiya məkanında möhkəmləndirmək üçün hələ çox işlər görməliyik. Elə REGİON  PLUS jurnalının bundan sonrakı fəaliyyətini də bu istiqamətdə quracağıq”, – deyə o əlavə edib.

Oxu.azkollektivi həmkarlarımızı REGİON PLUS jurnalının 15 yaşı münasibətilə təbrik edir, fəaliyyətlərində uğurlar arzulayırıq!