Vərəm xəstəsi dispanserdən qaçdı
Xəstəxanadan xəstə qaçıb.
ARANTV.AZ-ın məlumatına görə, 1977-ci il təvəllüdlü İmanov Aydın Sərvər oğlu Buzovnada yerləşən 7 saylı Vərəm Əleyhinə Dispanserdən qaçıb.
Belə ki, Xəzər rayonu, Türkan qəsəbə sakini müalicə olunmaq üçün iyulun 23-də dispanserə yerləşdirilib. İyulun 24-dən 25-nə keçən gecə isə xəstəxanadan qaçıb.
Yaxınlarının saytımıza verdiyi məlumata görə, xəstəxanada Aydınla eyni otaqda qalan şəxs iyulun 24-də onun yaxınlarına zəng edib və bildirib ki, Aydın özünü pis hiss edir. Həyat yoldaşı dispanserə gedən zaman Aydının xəstəxanadan getdiyi deyilib.
Məsələ barədə 7 saylı Vərəm Əleyhinə Dispanserlə əlaqə saxladıq.
Dispanserin həkimi Samir Quliyev Aydın İmanovun xəstəxanadan qaçması xəbərini təsdiq edib:
“Xəstəni zorla dispanserdə saxlamaq mümkün deyil. O, özbaşına çıxıb-gedib. Ona güc tətbiq etmək düzgün deyil. Aydın bəy xəstəxananı tərk edib”.
Dispanserdən qeyd edilib ki, xəstəxanada müşahidə kameraları yoxdur:
“Xəstəxananın yeni binası tikiləcək və orada kamera olacaq”.
oxu.az
