Aprelin 8-də Azərbaycan və Türkiyə Silahlı Qüvvələrinin birgə əməliyyat-taktiki təlimləri keçiriləcək
44 günlük İkinci Qarabağ müharibəsi işğala, 30 ilin torpaq həsrətinə son qoymaqla yanaşı, əsl həqiqət anı oldu. Kimin ədalətin, kimin şərin yanında olduğu bir daha açıqlandı. Atdığı addımları ilə hər zaman Azərbaycanın yanında olduğunu təsdiqləyən Türkiyə dünyaya bu mesajı ünvanladı- Azərbaycan tək deyil. Türkiyə hər zaman yanındadır. Dost, qardaş ölkənin rəsmilərinin dövlətimizin başçısı, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun döyüş meydanında qazandığı tarixi Zəfərləri, ümumiyyətlə, türkün adının dastana çevrilməsi kimi qiymətləndirməsi ölkə Prezidentinin gərgin və yorulmaz mübarizəsinə verilən yüksək dəyərin ifadəsidir. Dağlıq Qarabağdan və ətraf rayonlardan, o cümlədən ermənilər tərəfindən mülki əhalinin atəşə tutulduğu Gəncə, Bərdə, Tərtər və digər yaşayış məntəqələrindən Türkiyə televiziyalarının, informasiya agentliklərinin yaydıqları xəbərlər, cəbhə bölgələrindən qələbə xəbərlərinin böyük sevinc hissi ilə manşetlərə çıxararaq Azərbaycanın haqq-ədalət müharibəsinin dünya ictimaiyyətinə çatdırılmasında əhəmiyyətli rol oynadı. Dövlətimizin başçısının istər Vətən müharibəsi dövründə 30-a yaxın xarici mətbuata müsahibələrinə, istərsə də fevralın 26-da 35-dən artıq yerli və xarici media nümayəndələrinin 50-yə yaxın suallarının cavablandırılmasına geniş imkanlar yaradan mətbuat konfransına diqqət yetirsək böyük əksəriyyətin dost ölkənin media orqanları olduğunu görərik. Türkiyə mediası həm müharibə, həm də postmüharibə dövründə Azərbaycan kütləvi informasiya vasitələri ilə birgə fəaliyyət sayəsində informasiya müharibəsində üstünlüyümüzə, qələbəmizə haqq qazandıran səsimizin əks-sədasıdır. İki qardaş ölkənin media sahəsində əməkdaşlığının daha da möhkəmlənməsinə yönələn addımların atılması da qürurvericidir. Dövlətimizin başçısı İlham Əliyev bu günlərdə Türkdilli Dövlətlərin Əməkdaşlıq Şurasının videoformatda keçirilən qeyri-formal Zirvə görüşündə də Azərbaycan-Türkiyə birliyindən, bu həmrəyliyin türk dünyasının birliyinə töhfələrindən bəhs edərək bu məqama da diqqət yönəltmişdir ki, Azərbaycanın Vətən müharibəsinə başladığı günlərdən dövlətimizə ilk olaraq dəstək verən beynəlxalq qurumların içərisində Türkdilli Dövlətlərin Əməkdaşlıq Şurasının açıq bəyanatı yüksək dəyərləndirildi.
Reallıq göz önündədir. Azərbaycan-Türkiyə əlaqələri bütün sahələrdə uğurla inkişaf edir. Məhz iki dövlətin siyasi iradəsi, qətiyyəti sayəsində reallığa çevrilən enerji layihələri regionda sabitliyi, təhlükəsizliyi möhkəmləndirməklə yanaşı, dünyanın enerji təhlükəsizliyinin təminatına böyük töhfələrdir. Azərbaycan və Türkiyə eyni köklər üzərində böyüyən ulu bir çinara bənzədilirək vurğulanır ki, həmin çinarın kölgəsi həyata keçirilən layihələrlə bu gün Qafqazdan Avropayadək bir çox ölkəyə qədər uzanır. BTC və BTƏ neft-qaz layihələrinin ardınca iqtisadi əhəmiyyətinə görə enerji layihələrindən geri qalmayan BTQ dəmir yolunun istifadəyə verilməsi, eyni zamanda, əməkdaşlığın regional çərçivədən çıxaraq coğrafiyasını genişləndirməsi fonunda Cənub Qaz Dəhlizinin icrasının tam şəkildə başa çatdırılması, “Star” neft emalı zavodunun işə düşməsi və sair kimi biri-birindən önəmli hadisələr Qafqazdan Avropayadək uzanan kölgənin təqdimatlarıdır.
İki qardaş ölkə arasında əlaqələr hərbi sahədə də yüksək səviyyədədir. Azərbaycan və Türkiyə ordularının ənənəvi olaraq keçirilən hərbi təlimləri bu əlaqələrə işıq salır. Azərbaycanın hərbi-siyasi Qələbəsinin, Azərbaycan Ordusunun hansı imkanlara malik olmasının dünyaya təqdimatında mühüm rol oynayan 10 dekabr Zəfər paradında da bu birliyin, həmrəyliyin şahidi olduq. Ermənistan Vətən müharibəsi dövründə nə qədər Türkiyəni üçüncü tərəf kimi təqdim etməyə cəhd etsə də, dövlətimizin başçısı bu dəstəyin yalnız mənəvi dəstək olduğunu əsaslı şəkildə şərh etməklə işğalçı dövlətin planlarını alt-üst etdi.
Onu da qeyd edək ki, Azərbaycan və Türkiyə Müdafiə nazirliklərinin birgə illik planına əsasən aprelin 8-də hər iki ölkənin hərbi qulluqçularının iştirakı ilə əməliyyat-taktiki təlimləri başlayacaq. Ölkəmizdə təşkil olunacaq təlimlər Azərbaycan Ordusunun hərbi birliklərinin cavabdehlik zonalarının müxtəlif istiqamətlərində yerləşən ümumqoşun poliqonlarında keçiriləcək. Təlimlərin əsas məqsədi Azərbaycan və Türkiyə ordularının əməliyyat bölmələrinin qarşılıqlı fəaliyyətinin təkmilləşdirilməsi və döyüş qabiliyyətinin yüksəldilməsi, əməliyyat bölmə komandirlərinin hərbi qərar qəbuletmə, təşəbbüs göstərmə və idarəetmə bacarıqlarının inkişaf etdirilməsidir. Təlimlər aprelin 9-dək davam edəcək.
Ölkə Prezidenti, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən, Azərbaycan və Türkiyə hərbi qulluqçularının iştirakı ilə rabitə qoşunlarının birgə taktiki-xüsusi təlimləri də başlayıb. Təlimlər zamanı hərbi rabitəçilər təlim-döyüş tapşırıqlarının yerinə yetirilməsi rayonlarına çıxarılaraq vahid rabitə sisteminin təşkil edilməsi üzrə tapşırıqları yerinə yetirirlər. Müasir rabitə vasitələrinin və avtomatlaşdırılmış idarəetmə sistemlərinin tətbiqi ilə keçirilən təlimlərdə qoşunların qarşılıqlı fəaliyyətinin təşkili, səhra idarəetmə məntəqələrinin açılması və digər tədbirlər icra olunur.
Azərbaycan-Türkiyə birliyinin möhkəmlənməsinə xidmət edən addımlar sırasında Türkiyə Prezidenti Rəcəb Tayyib Ərdoğanın bu günlərdə müdafiə sənayesində Azərbaycanla əməkdaşlıq haqqında sazişi təsdiqlədiyini də xüsusi qeyd etməliyik. Onu da qeyd edək ki, “Türkiyə Respublikası Hökuməti ilə Azərbaycan Respublikası Hökuməti arasında müdafiə sənayesi sahəsində əməkdaşlıq haqqında” Saziş 31 oktyabr 2017-ci il tarixində Bakıda imzalanıb.
Azərbaycan 44 gündə yazdığı tarixlə haqqı-ədaləti, beynəlxalq hüququ bərpa etdi, işğala son qoydu, “Dağlıq Qarabağ münaqişəsi” ifadəsi tarixə qovuşdu. Ölkə Prezidenti, Ali Baş Komandan İlham Əliyevin daim hücum əmrini gözləyən Azərbaycan Ordusu şücaəti ilə bir daha işğalçı Ermənistana yerini göstərdi, diz çökdürdü, “məğlubedilməz erməni ordusu” mifini dağıtdı, kimin haqlı, kimin saxta tarix yazaraq yalanları ilə həqiqəti inkar etmək yolu tutduğunu dünyaya nümayiş etdirdi. Azərbaycan tarixi Zəfəri ilə 2020-ci ilin heç zaman unudulmayacaq tarixini yazdı. 10 noyabr böyük öndər Mustafa Kamal Atatürkün anım günü olduğu üçün dövlətimizin başçısı İlham Əliyevin Sərəncamı ilə 8 noyabr Şuşanın işğaldan azad olunduğu gün Zəfər Günü kimi təsis olundu. Bu məqam da Azərbaycan-Türkiyə birliyinin təqdimatıdır. Zəfər Paradında iştirak etmək, Azərbaycanın yanında olub, bu sevinci birgə yaşamaq üçün Türkiyə Cümhuriyyətinin Prezidenti Rəcəb Tayyib Ərdoğanın ölkəmizə səfəri, həmçinin ölkələrimiz arasında müxtəlif sahələrə dair bir sıra mühüm sənədlərin imzalanması Azərbaycanla Türkiyə arasındakı dostluq və qardaşlığın daha bir əyani təzahürü oldu. Türkiyə Prezidenti Rəcəb Tayyib Ərdoğanla birlikdə mətbuata bəyanatında “Bu gün Türkiyə-Azərbaycan tarixində çox əlamətdar, önəmli bir gündür. Bu gün biz birlikdə Zəfər paradını seyr edərkən bir-birimizi təbrik etdik. Bu Zəfər münasibətilə xalqlarımızı təbrik etdik. Bu tarixi Zəfər bizim birliyimizin təcəssümüdür” söyləyən dövlətimizin başçısı İlham Əliyev bildirmişdir ki, Türkiyə və onun Cümhurbaşqanı müharibənin ilk saatlarından Azərbaycana, Azərbaycan xalqına öz dəstəyini göstərib. Onun bəyanatları həm Azərbaycan xalqı üçün çox dəyərli, qiymətli, eyni zamanda, bütün dünyaya bir mesaj idi ki, Azərbaycan tək deyil, Azərbaycana heç kimsə mane olmasın. Azərbaycan haqq davası aparır. Bu mesaj, əslində, həmrəyliyin bir təcəssümü idi. Türkiyə Prezidenti Rəcəb Tayyib Ərdoğan qeyd etmişdir ki, Azərbaycanın həm hərbi, həm də diplomatiya sahəsində əldə etdiyi bu uğurda ən böyük paylardan biri şübhəsiz ki, cənab Prezident İlham Əliyevə aiddir: “Qardaşım İlham Əliyev bununla mərhum Heydər Əliyevin ona vəsiyyət olaraq etdiyi arzusunu da yerinə yetirib. Fürsətdən istifadə edərək güclü Azərbaycanın əsasını qoyan ümummilli lider Heydər Əliyevi də burada rəhmətlə yad edirəm. Azərbaycan qardaşım İlham Əliyevin qətiyyətli rəhbərliyi altında, inşallah, dastan yazmaqda davam edəcək.” Bugünlərdə Türkdilli Dövlətlərin Əməkdaşlıq Şurasının videoformatda keçirilən qeyri-formal Zirvə görüşündə Türkiyə Prezidenti ən qısa zamanda Şuşanı ziyarət etmək və yeni bir bayram yaşamaq arzusunu bildirdi.
Bu kimi xoş, səmimi fikirləri xeyli sayda qeyd etmək olar. İki dost, qardaş ölkənin münasibətlərinin inkişafında qarşılıqlı səfərlər və bu səfərlər çərçivəsində imzalanan sənədlər də əhəmiyyətli rol oynayır. Türkiyə Prezidenti Rəcəb Tayyib Ərdoğanın son səfəri zamanı sənədlərin imzalanması mərasimi oldu. “Bu gün imzalanmış sənədlər son illər imzalanmış sənədlər arasında çox kiçik bir yer tutur” söyləyən dövlətimizin başçısı İlham Əliyevin fikirlərinin davamı olaraq Türkiyə Prezidenti Rəcəb Tayyib Ərdoğan bildirmişdir ki, bu gün atılan imzalar, əslində, simvolik imzalardır: “Atılacaq daha çox imzalar var. Bu imzalarla birlikdə inşallah, Azərbaycan Qarabağın tamamilə fərqli şəkildə yüksəlişinə davam edəcəkdir.” Ölkə Prezidenti ölkəmizin həyatında başlanan yeni məhələdə-işğaldan azad edilmiş ərazilərdə quruculuq və bərpa işlərinin uğurla davam etdirib soydaşlarımızın Böyük Qayıdışını gerçəkləşdirmək istiqamətində atılan addımlarda dost ölkələrin iştirakına çağırışlar edir. Azərbaycanın yaratdığı yeni reallıqlar fonunda formalaşacaq əməkdaşlıq formatları bölgədə sülhü, təhlükəsizliyi daha da möhkəmləndirəcək, dayanıqlı inkişafa böyük töhfələr verəcək.
